لەبارەی دابڕان/ پەیوەندی/ عربي/ English

بانگخوازێكی مامۆستای زانكۆ: پێمان وایە دڵ سەرچاوەی عەقڵە، نەك مێشك

22/12/2018


یەكێك لە بانگخوازەكانی كوردستان زۆر بەڕاشكاوانە دەڵێت: ئێمە باوەڕمان وایە كە سەرچاوەی عەقڵی مرۆڤـ، دڵیەتی نەك مێشكی!

بانگخواز، د.خالد محەمەد كە پرۆفیسۆری یاردەدەریشە لە هەمان كاتدا، لە یەكێك لە وتارەكانیدا كە بۆ چەند گەنجێكی دەدات، سەرچاوەی گشت بڕیارو سۆز و هەستێكی مرۆڤ دەگەڕێنێتەوە بۆ دڵ و، مێشكیش وەك پارچەیەكی لاوەكی لە جەستەی مرۆڤدا تەماشا دەكات!

ئەو، قسە بە دەمی ئەوروپیەكانەوە هەڵدەبەستێت و دەڵێت: ئەوان دوای ئەوەی هەندێك دۆزینەوەیان كردوە بەو بۆچونەیاندا دەچنەوە كە تائێستا پێیان وابوە مرۆڤ بە مێشك بیردەكاتەوە! بۆیان دەركەوتوە كە مرۆڤ بەدڵ بیردەكاتەوە!!!

ئەو مامۆستایەی زانكۆ كە دەكاتە برای بانگخواز "د.عەبدولواحید محەمەد"، لە وتارەكەیدا چەند نمونەیەك لەسەر قسەكردنی رۆژانەی خەڵك دەهێنێتەوە و گرێی دەدات بە بابەتێكی زۆر زانستییەوە، گوایە لە كاتی قسەكردنماندا زۆرجار بۆ بڕیاردان ئاماژە بە "دڵ" دەدەین نەك "مێشك" ئەمەش دەكاتە بەڵگە بۆ ئەوەی كە دڵ بڕیار دەدات نەك مێشك!!!

ئەو بانگخوازە كە كۆمەڵێك لە خوێندكارانی زانكۆو پەیمانگا و گەنجان بەدیار وتارەكەیەوە دانیشتون، دواتر نمونەی دروستكراو و ناڕاست دەهێنێتەوە و دەیەوێت ڕاستی قسەكانی بە نمونەی ئەو كەسانە بسەلمێنێت، گوایە كەسێك دڵی دەگۆڕدرێت هەمان سیفاتەكانی كەسەكەی پێشو وەردەگرێت! جگە لە ناڕاستی و نازانستی نمونەكانی، ئەوەشی لەبیركردوە كە كەسانێك هەن دڵی دەستكردی "ئامێر"ـیان بۆ دانراوە و هیچ كێشەیەكیش لە بیركردنەوە و هەست و سۆزیاندا ڕوی نەداوە!، ئەمانە و چەندین بەڵگەی تری زانستی هەن كە دەیسەلمێنن دڵ جگە لەوەی ترومپایەكە و فەرمان لە مێشكەوە وەردەگرێت بۆ ڕێكخستنی سوڕی خوێن لەجەستەدا، هیچ كارێكی تری نیە بەتایبەت ئەوەی پەیوەستە بەبڕیاردان و بیركردنەوەوە!

عەبدولواحیدی بانگخوازیش، كە پیشەی پزیشكە و شارەزاییەكی زۆری لەو بابەتەدا هەیە، لە چەندین وتاریدا زۆر بەڕاشكاوانە دەڵێت كە مرۆڤ بە دڵ بیردەكاتەوە و بڕیاردەدات نەك بە مێشك!!!

بەشێكی زۆر لە بانگخوازەكانی كوردستان، زۆرجار بە وتاری تەواو نازانستی و نالۆژیكی مێشكی ئامادەبوان دەئاخنن و هەوڵی بەرەو جاهلبونی كۆمەڵ دەدەن، ڕەنگە چەندین هۆكار لەپشت ئەم مەرامەوە بێت و كەسانی موسڵمانیش لێی بێ ئاگابن.

ڤیدیۆ

© 2016 Dwryan.net. All Rights Reserved.
Developed by Avesta Group and powered by Microsoft Azure