لەبارەی دابڕان/ پەیوەندی/ عربي/ English

دیاردەی سوتاندن و دڕاندنی قورئان...دروستە سوكایەتی بە ئینجیل و تەورات بكەین ؟

پێش 2 هەفتە


سالار تاوەگۆزی

ئەوە چەندین جارە ڕووداوی دڕاندن و سوتاندنی قورئان لەلایەن هەندێك لە هاوزمانە كوردەكانمان و گەلانی دیكەی ناموسوڵمان، دەبینین.

بێگومان ئەمە دیاردەیەكی ئێجگار خراپە و سوكایەتیە بەپیرۆزیەكانی موسوڵمانان، بەڵام دەبێت بزانین سەرەتا ئێمەی موسوڵمان - بەتایبەتی مەلاو بانگخوازەكانی ئیسلامی سیاسی - تاوانبارین لە دەركەوتنی ئەم دیاردەیەو دیاردەكانی دیكەی وەك: تەشەنەكردنی ئیلحاد.

ئاخر ئیلحاد و قورئان سوتاندن دوو كاردانەوەی چاوەڕوانكراوی ناموسوڵمانەكانن لەدژی ئەو هەڵسوكەوتە نەشیاوانەی كە زۆرێك لە ئێمەی موسوڵمان لە كۆمەڵگەی مرۆڤایەتیدا كردوومانن، چونكە ئێمە لەڕێگەی هەڵسوكەوتی ناپەسەندی وەك: نوێژكردن لەسەر جادەكانی ئەوروپاو و ئەنجامدانی كردەی تیرۆریستی و دروستكردنی كۆمەڵگەی موازی و حیزب و گروپی ئیسلامی و بەرهەمهێنانی مەلاو بانگخوازی توندڕەو و بڵاوكردنەوەی خورافە و گوتاری ناعەقڵانی و تیرۆری فیكری و كەسێتی و فیزیكی و بەشەیتانكردنی ئەوانەی كە جیاواز لەئێمە بیر دەكەنەوە، بووین بە سەرچاوەی بێزاركردنی كۆمەڵگای خۆمان و كۆمەڵگاكانی دیكەو ئاسایشی كۆمەڵایەتیمان لەسەرتاسەری جیهاندا خستووەتە مەترسیەوە.

ئێ لەحاڵەتێكی ئاوهادا دەبێت پێشبینی دڕاندن و سوتاندنی قورئانەكەمان و جنێودان بە پێغەمبەرەكەمان موحەممەد (د.خ) و زیاترو زیاتر بڵاوبوونەوەی بێدینی و ناشیرینبوونی وێنەی (ئێمەی موسوڵمان) له كۆهۆشی یان لە زیهنی (ئەوانی ناموسوڵمان)دا، بكەین.

جا سەیر لەئەوەدایە كاتێك ئەو هەمووە كاردانەوە ناپەسەندانەی كە باسمان كردن لەدژی ئاینەكەمان دەبینین، ناچین لەناو خۆماندا بۆ هۆكارەكەی بگەڕێین و بیخەینە بەرباس و ڕێگەچارەی بۆ بدۆزینەوە، بەڵكو كاردانەوەی خراپتر و توندوتیژی دەنوێنین و خەڵاتی ئەو كەسە دەكەین كە بەتوندوتیژیەكە هەڵساوەو وەك (پاڵەوانی ئیسلام) نیشانی دەدەین.

ئەوەتا دەڵێن: چەندین وڵاتی ئیسلامی ئامادەییان دەربڕیوە تاوەكو خەڵاتی ئەو گەنجە بكەن كە هێرشی كردە سەر كابرا نەرویژیە قورئانسوتێنەكە كە ناوی (ئەرنی تۆمێر)ە و سەرۆكی كۆمەڵەیەكە بەناوی (بەئیسلامكردنی نەرویژ بوەستێنن).

لەحاڵەتێكی ئاوهادا كە دوژمنانی ئیسلام توڕەمان دەكەن و ئێمەش كاردانەوەی خراپمان دەبێت، موجاهیدانی ئیسلامی سیاسی ڕووداوەكە وەك هەلێكی زێڕین بۆ هاندانی موسوڵمانان لەبەرژەوەندی خۆیان، دەقۆزنەوە.

ئێ باشە ئەو وڵاتە موسوڵمانانە بۆ بیر لە حاڵی خۆیان ناكەنەوە كە بۆچی بوون بە ژینگەی لەباری تیرۆریستی ئیسلامی و هەناردەكردنی موجاهید ؟!.

یان بۆ بیر لە ئەوە ناكەنەوە كە هەر ناموسوڵمانەكان نین كتێبی پیرۆزی ئێمە دەسوتێنن، بەڵكو لە كتێبەكانی ئێمەی موسوڵمانیشدا سوكایەتی بە كتێبی پیرۆزی مەسیحی و جولەكەكان كراوە، بۆ نموونە لە كتێبێكی ئیسلامی سوننی بەناوی (  الإقناع في حل ألفاظ أبي شجاع) - كە یەكێكە لەكتێبەكانی فیقهی شافیعی و شەرحی كتێبی (غایە الاختصار)ه و هێشتا لە (زانكۆی ئەزهەر) و حوجرەو ناوەندە فێركاریە ئیسلامیەكان دەخوێندرێت - هاتووە و دەڵێت: دروستە لەكاتی تاراتگرتندا كۆمی خۆمان بە لاپەڕەكانی تەورات و ئینجیل پاك بكەینەوە. (الشربینی، ٢٠٠٤، ل ١٥٥).

بێگومان ئەم كارە لەژێر هەر پاساوێكدا بێت، سوكایەتیە بەكتێبی پیرۆزی جولەكەو مەسیحیەكان، ئیتر بۆ كاتێك كە قورئان دەسوتێندرێت یان دەدڕێندرێت ئێمە نایەین بزانین لەكتێبەكانی توراسی ئیسلامی و لەناو موسوڵماناندا چۆن ڕێگامان بەخۆمانداوە سوكایەتی بە كتێبی پیرۆز و بیروباوەڕی جیاوازی ئەوانی دیكە بكەین.
بەڕاستی باشتر بوو كاردانەوەیەكی ئەرێنی و ناتوندو تیژمان هەبووایە بەرانبەر ڕووداوەكەی نەرویژ و تەواوی ئەو هێرشانەی دەكرێنە سەر ئوممەتی ئیسلام، چونكە ئەوەتا هەر خودی قورئان پێمان دەفەرمووێت:"  وَلَا تَسْتَوِي الْحَسَنَةُ وَلَا السَّيِّئَةُ ۚ ادْفَعْ بِالَّتِي هِيَ أَحْسَنُ فَإِذَا الَّذِي بَيْنَكَ وَبَيْنَهُ عَدَاوَةٌ كَأَنَّهُ وَلِيٌّ حَمِيمٌ. (فصلت، ٣٤).

واتە:"بێگومان چاكەو خراپه وەك یەك نین، (تۆ ئەی باوەڕدار) بەجوانترین و چاكترین شێوە، بەرەنگاری خراپەو نادروستی بكە، ئەوكاتە ئیتر دەبینیت ئەوەی لەنێوان تۆو ئەودا دوژمنایەتی و ساردیەك هەیە، دەبێتە دۆستێكی دڵسۆزو گیانی بەگیان ". (أمین، ٢٠٠٤ ، ل ٤٨٠ ).

بەڵام بەداخەوە ئەمجارەش وەك وڵاتانی ئیسلامی و موسوڵمانان بەگوێی خودامان نەكرد و تەنانەت سودمان لەكاردانەوە ئەرێنیەكانی پێغەمبەرەكەمان (د.خ) بەرامبەر نەیارانی لەسەرەتای بانگەواز بۆ ئیسلام وەرنەگرت.

بێگومانیشم كاردانەوەی توندڕەوانەی موجاهیدە ئەلیكترۆنیەكان و دەوڵەتانی ئیسلامی و موسوڵمانان بەگشتی و خەڵاتكردنی ئەو گەنجە موسوڵمانە كە هێرشی كردە سەر كابرا نەرویژیەكە، كۆتایی بەدیاردەی قورئان سوتاندن ناهێنێت، بگرە پەرەی پێدەدات و بەنزین دەكات بەسەر ئاگرەكەدا و هانی توندوتیژی زیاتر دەدات.

بۆیە پێویستە ئەم ڕووداوە بكەین بە وێستگەیەكی بەخۆداچوونەوە و هەوڵبدەین جارێ توراسی دینی خۆمان لە قال و قیلی خراپ پاك بكەینەوە و هەڵوێست كانیشمان لەسەر بنەمای لایەنە پرشنگدارەكانی ئیسلام دەرببڕین.

سەرچاوە:
١- قورئانی پیرۆز.
2-  - الشربيني، الشيخ شمس الدين محمد بن محمد الخطيب. (٢٠٠٤) الإقناع في حل ألفاظ أبي شجاع. ج١. ط٣. بيروت: دار الكتب العلمية.
3- أمین، بورهان محمد. (٢٠٠٤) تەفسیری ئاسان بۆ تێگەیشتنی قورئان. هەولێر: كتێبخانەی ڕۆشنبیر.

نوێترین

© 2016 Dwryan.net. All Rights Reserved.
Developed by Avesta Group and powered by Microsoft Azure