لەبارەی دابڕان/ پەیوەندی/ عربي/ English

زانیاری نوێ لەسەر موفتییەكەی دەوڵەتی خەلافەتی ئیسلامی بڵاودەبێتەوە

18/01/2020


دوای ئەوەی لە چەند رۆژی رابردودا هێزەكانی عێراق مەكنی ئەبو عەبدولباری، موفتی دەوڵەوتی خەلافەتی ئیسلامی (داعش)یان لە موسڵ دەستگیركرد، شانەی راگەیاندنی ئەمنی چەند زانیارییەكی نوێی لەبارەی موفتییە دەستگیركراوەكە بڵاوكردەوە.

شانەی راگەیاندنی ئەمنی عێراقی لە پەیجی تایبەتی خۆی لە تۆڕی كۆمەڵایەتی فەیسبووك بڵاویكردەوە،"تیرۆریست مەكنی ئەبو عەبدولباری وەك وتارخوێن و پێشنوێژ لە ژمارەیەك مزگەوتی موسڵ كاری كردوە" و بە وتاری هاندان لە دژی هێزە ئەمنییەكان ناسرابو.

ئەبو عەبدولباری كێیە؟

بە شەرعیەت یان "شیفای نیعمەت" ناسرابو، لە سەركردەكانی ریزی پێشەوەی داعش هەژمار دەكرا، سەرپەرشتی جێبەجێكردنی پرۆسەكانی لەسێدارەدانی دەكرد، بە تایبەتی لە سێدارەدانی ئەو پیاوە ئاینییانەی بەیعەتدانیان بە داعش رەتدەكردەوە.

لە ساڵی 2014 و لە كاتی داگیركردنی شارەكە لە لایەن داعشەوە، مەكنی ئەبو عەبدولباری فەرمانی تەقاندنەوەی مزگەوتی نەبی یونسی دەركردوە.

وەك دەشزانرێت، مزگەوتی نەبی یونسی مێژویی و شوێنەوارییە و پێگەیەكی تایبەتی لای خەڵكی موسڵ هەبو، دەكەوتە بەری رۆژئاوای گردی تەوبە، یان گردی نەبی یونس، لە هاوینی 2014 لەلایەن داعشەوە تەقێندرایەوە.

ئەبو عەبدولباری كە بەرپرسی دەركردنی فەتوا بوە لە ناو داعش، لە ناوچەی حەی مەنسور لەبەری رۆژئاوای موسڵ لە لایەن فەوجی سواتی سەر بە فەرماندەیی پۆلیسی نەینەواوە دەستگیركرا و بەهۆی كێشە زیادەكەیەوە لە پشتی ئۆتۆمبیلێكی جۆری پیكابەوە لەلایەن هێزە ئەمنییەكانەوە گوازرایەوە.

 پێشتریش شانەی راگەیاندنی ئەمنی رایگەیاند"دوای گەیشتنی زانیاری ورد و گەڕان و پشكنینی بەردەوام، فەوجی سواتی سەر بە فەرماندەیی پۆلیسی نەینەوا توانی ئەبو عەبدولباری، موفتی داعش و ناسراو بە "شیفای نیعمە" دەستگیر بكات.

نوێترین

© 2016 Dwryan.net. All Rights Reserved.
Developed by Avesta Group and powered by Microsoft Azure