لەبارەی دابڕان/ پەیوەندی/ عربي/ English

ئەردۆگان عوسمانییەكی ئیخوانی و ئیخوانییەكی عوسمانی

18/01/2020


هاوكار فایەق

هەمومان كەم تا زۆر ئاگامان لەوە هەیە و دەزانین كە سەرۆكی توركیا هەركات بۆی كرابێت و بۆی لوا بێت بەناوی پاراستنی سنورەكان و ئاساییشی توركیا و سەروەری خاكی توركیاوە، پەلاماری شوێنێك یاخود پارچەیەكی كوردستانی داوە و داگیری كردوەو خەڵكی ناوچەكەی ئاوارە كردوە و ماڵ و حاڵی بەتاڵان بردون، جا ئەم پەلامارانە هەر پارچەیەكی كوردستان بێت بۆ ئەو گرنگی نیە، ئەو تەنها ئامانجی داگیركردنی كوردستان و خاكەكەیەتی و سەپاندنی ئەجێنداكەیەتی، بۆیە لەمەیاندا عوسمانییانە بیردەكاتەوە و لای خەڵكی توركیا وا خۆی نیشاندەدات كە تەنها ئەو قارەمان و ڕزگاركەر و پارێزەری توركیایە و تەنها ئەو فیداكارە و هەر ئەو خەمخۆری توركیایە و هەر ئەویش دەتوانێـت پارێزگاری لەدەسكەوتەكانی ئیمپراتۆریەتی عوسمانی بكات.

خۆشبەختانە ئێستا خەڵكی توركیاش ئەوەندە هۆشیارییان هەیە كە دەزانن ڕاستیەكان لەكوێوە سەرچاوە دەگرن، ئەمەشیان لەهەڵبژاردنەكانی ناوخۆی توركیا بۆ ئەردۆگان و پارتەكەی سەلماند و بەدەنگەكانیان توانیان سزایەكی گەورەی ئەردۆگان و پارتەكەی بدەن، میللەتی توركیاش ئیتر لەوە تێگەشتون كە ئەردۆگان بەسیاسەتە هەڵەكانی بەرەو هەڵدێریان دەبات.

گرژی و ئاڵۆزییەكانی ڕۆژهەڵاتی ناوەڕاست وایكرد كە ئەردۆگان ئەم هەلە لەبەرژەوەندی خۆی بقۆزێتەوەو بەناوی پاراستنی سنورەكانیەوە پەلاماری ڕۆژئاوای كوردستان بدات و زۆر ناوچە و شوێنی داگیر بكات، دوای ئەوە كە زانی ئەو داگیركاریەشی بۆ چۆتە سەر، بۆیە هەر بەوەشەوە نەوەستا و بڕیاریدا بەناردنی هێزی سەربازیی بۆ لیبیا و دەسخستنە نێو ئەو وڵاتەشەوە.

ئەم ڕەفتارانەی توركیا هەر زوو لەلایەن وڵاتانی ئەوروپا و ناوچەكەوە ڕەتكرایەوە و بڕیارەكانی توركیایان شەرمەزاركرد و كەوتە بەر ڕەخنە و گلەیی وڵاتانی جیهان، تەنانەت هەندێك لایەن و گروپی ناوخۆیی لیبیاش هەڕەشەی هەڵگیرساندنی شەڕیان دەكرد لەگەڵ توركیا، گەربێت و هێزی سەربازیی ڕەوانەی ناوچەكە بكات.

ئەردۆگان زۆر هەوڵیدا بەبێ جەنگ دەست بەسەر لیبیا و كەناراوەكانیدا بگرێت كە ئەمەش سەرەتای دروستبونی ناوچەیەكی ئیخوانی بوو لەناوچەكەدا، بۆیە ئەمجارەیان هەوڵەكانی سەرۆكی توركیا بۆ ئیمپراتۆریەتی عوسمانی نەبو بەڵكو بۆ برا ئیخوانییەكانی بوو لەمیسر و ناوچەكە و دەیویست لەشوێنێكدا كۆیانبكاتەوە، بۆیە ئەمجارە ئیخوانانە بیریكردوە، بەڵام هەر زوو خەلیفە حەفتەر ئەم هەوڵانەی ئەردۆگانی پوچەڵكردەوەو لەگۆڕینا.

گەر خەلیفە حەفتەر و ئەلسەرڕاج بگەنە ڕێكەوتنێك توركیا ڕیسەكەی هەڵدەوەشێتەوە، چونكە بەپێی ئەو ڕێكەوتنە دەبێت هێزەكانی توركیا لەلیبیا بكشێنەوە و ناوچەكە جێبهێڵن بەمەش خەونەكەی ئەردۆگان نایەتەدی.

ئەردۆگان دەیەوێت بەهەر شێوەیەك بێت لەسەردەمی حوكومڕانی خۆیدا خۆی بكاتە پاڵەوانی ئیخوانەكان و پێگەیەكی باش بۆ ئیخوانیەكان دروست بكات جا ئەوە لەهەر وڵاتێك بێَت گرنگ نیە، تەنها ئەوە گرنگە كە لەسەردەستی ئەردۆگان ناوچەیەك فەراهەم بكات بۆ بەهێزبونی دەسەڵاتی ئیخوانەكان، جا ئەو دەسەڵاتە شكست یاخود سەركەوتو گرنگ نیە.

ئەردۆگان ئێستا خۆی بەنوێنەر و پێشەوای  ئیخوانەكان دادەنێت لەناوچەكەدا و ئیخوانەكانیش شەڕی هەیمەنەی خۆیان بەئەردۆگان دەكەن.

سەرۆكی توركیا پێشتر دەیویست ئەم ئەزمونە لەمیسر لەسەردەمی مورسی تاقیبكاتەوەو بەهێزیان بكات، بەڵام بۆی نەچوەسەر و سەركەوتو نەبو، بەدەستگیركردنی مورسی و دواتر مردنی، ئیخوانەكان بەتەواوی بێهێَز و پەرتەوازە بون، بۆ ماوەیەكی زۆریش كەوتنەوە دواوە. 


ئەردۆگان لەداگیركردنی ڕۆژئاوای كوردستاندا بەنیازی فراوانكردنی ئیمپراتۆریەتی عوسمانی بوو، بەڵام شكستی گەورەی هێنا، بەهەمان شێوە لەداگیركردنی لیبیا و دروستكردنی ناوچەیەكی ئیخوانیشدا هەر شكستی هێناوە، بۆیە ئەردۆگان لەهەردو نازناوەكەدا شكستی گەورەی تۆماركردوە.

نوێترین

© 2016 Dwryan.net. All Rights Reserved.
Developed by Avesta Group and powered by Microsoft Azure