لەبارەی دابڕان/ پەیوەندی/ عربي/ English

داوای راگرتنی پرسە و نوێژی هەینی و بە كۆمەڵی مزگەوتەكان دەكرێت

26/02/2020


وەزارەتی ئەوقاف و كاروباری ئاینی رایدەگەیەنێت "تائێستا هیچ بڕیارێك نەدراوە بۆ قەدەغەی نوێژی بەكۆمەڵ لەمزگەوتەكان بەهۆی كۆرۆناوە" ئەندامێكی لیژنەی فەتوای سلێمانی-ش ده‌ڵێت: "ئەگەر نەخۆشییەكە گەیشتە ئەو حاڵەتەی كە پێویست بكات بۆ خۆپاراستن، نوێژی بەكۆمەڵی مزگەوت و هەینی نەكرێت، ئەوا ئاساییە ئەو نوێژە بەكۆمەڵانە بۆ ماوەیەك لەمزگەوت نەكرێن".

نەبەز ئیسماعیل، وتەبێژی وەزارەتی ئەوقاف و كاروباری ئاینی حكومەتی هەرێمی كوردستان (ئەمڕۆ سێشه‌ممه‌ 25ی شوباتی 2020)  راگەیاند: وتاری رۆژی هەینی داهاتوو تایبەتە بەهۆشیاری تەندروستی بۆ رووبەڕووبوونەوەی نەخۆشی كۆرۆنا، بەڵام تائێستا بڕیارنەدراوە بەقەدەغەی نوێژی بەكۆمەڵ لە مزگەوتەكان و راگرتنی پرسەكان.

لەبەرامبەردا د. محەمەد پێنجوێنی، ئەندامی لیژنەی فەتوای سلێمانی راگەیاند: ئەم بابەتانە دەچێتە چوارچێوەی خۆپاراستن، بۆیە ئەگەر حاڵەتی نەخۆشییەكە گەیشتە ئاستێكی گەورە، ئاساییە نوێژی بەكۆمەڵ و نوێژی هەینیش لە مزگەوتەكان نەكرێت و لەماڵەوە بكرێن، پرسەش لەمزگەوتەكان رابگیرێت، یان تەنانەت بەوەستانی سەردانە كۆمەڵایەتییەكانیش.

هەر ئەمڕۆ دوو پزیشكی كورد داوای راگرتنی پرسە و كۆبوونەوەی بە كۆمەڵیان لە مزگەوتەكان كرد.
د. گۆران عەبدوڵا، کە پزیشكێكی دیاری كوردی دانیشتووی ئەوروپایە، داوا لە لیژنەی فەتوا دەكات بڕیارێك بدەن كە ئەم هەفتەیە ئیمانداران لە ماڵەكانی خۆیان نوێژ بكەن نەك بە جەماعەت، ئەو پزیشكە كوردەی تاراوگە، بەپێویستیشی دەزانێت بۆ ماوەیەكی كاتی كافتریا و چاخانەكان دابخرێن.

لەلایەكی دیكەوە، د. شەماڵ جەبار یاوەر، بەڕێوەبەری گشتی نەخۆشخانەی شۆڕش لە سلێمانی، داواى لە وەزارەتی ئەوقاف كرد بریاری راگرتنی پرسەكان لە مزگەوت و كۆبونەوەی بەكۆمەڵ لە مزگەوتەكان بدات.

وتیشى: "پێویستە مامۆستایانی ئاینی پشتیوانی كەرتی تەندروستی بن لە پاراستنی هاووڵاتیان".

 

سەرچاوە: دوا ڕۆژ

نوێترین

© 2016 Dwryan.net. All Rights Reserved.
Developed by Avesta Group and powered by Microsoft Azure