لەبارەی دابڕان/ پەیوەندی/ عربي/ English

مامۆستایانی ئاینی كوا ڕۆڵتان لە میراتگری پەیامبەران؟

21/05/2020



قوتەیبە فازڵ

كۆمەڵگەی كوردی یەكێكە لەو كۆمەڵگە ڕۆژهەڵاتیانەی كە تا ڕادەیەكی زۆر پەیوەستە بە ئاین و ڕێكارە ئاینیەكانەوە، بۆنە و جەژن و مەراسیمە ئاینیەكان لە زۆربەی بوارەكانی ژیانی كۆمەڵگەی كوردی ڕەنگی داوەتەوە و كاریگەری هەیە .

لەو نێوەندەشدا زانایانی ئاینی هەمیشە دەم ڕاست و قسە ڕۆشتووی ناو كۆمەڵگە بوونە و كاریگەریشیان لەسەرجەم كایەكانی ژیانی خەڵكیدا هەبووە، سەرەڕای ئەوەی كاریگەری و ڕۆڵی زانایانی ئاینی زۆر دیار بووە لە سەرجەم شۆڕش و سەرهەڵدانەكانی بزووتنەوەی ڕزگاری خوازی گەلی كورد .

پەیا‌مبەری ئیسلامیش (د. خ) لێ بێ لە فەرموودەیەكدا دەفەرموێ (العلماء ورثة الانبياء) واتە زانایان جێنشین و میراتگری پەیا‌مبەرانن، ئەگەر بڕوانینە مێژووی مرۆڤایەتی هەمیشە پەیا‌مبەران ڕۆڵی كاریگەریان هەبووە و لە دژی زوڵم و ستەمكاری زۆرداران وەستاونەتەوە و گەل و نەتەوەكانیان وشیار كردوەتەوە و هەردەم ڕۆڵی چاكسازییان بینیوە، ڕۆڵی پەیا‌مبەران چەسپاندن و داواكردنی مافی ماف خوراوان و ڕزگاركردنی مرۆڤایەتی بووە لە كۆیلایەتی وچەوساندنەوە .

ئەگەر چاوێكی خێرا و چەند نموونەیەك لە پەیامبەران سەیر بكەین دەبینین بۆ سەندنەوەی مافی چەوساوان و چەسپاندنی دادگەری نێو كۆمەڵگە  قوربانی گەورەیان داوە و پێشەنگی نەتەوەكانیان بوونە، پەیامبەر (یەحیا) (سەلامی خوای لەسەربێ ) لە پێناوی وتنی ڕاستی و حەقدا لەلایەن دەسەڵاتدارانەوە سەری لەلاشەی جیاكراوەتەوە، (زەكەریا) (سەلامی خوای لەسەربێ )  بە مشار كراوەتە دووپارچەوە، پێغەمبەری ئیسلامیش (د.خ) جگە لە دەركردن و لێدان و برسێتی زۆربەی ژیانی بە هەژاری گوزەراندووە، ئەگەر سەیرێكی ژیان و بەسەرهاتی زانایانی پێشینیش بكەین هەمیشە ڕۆڵیان هەبووە و پێشەنگی گەل و نەتەوە بوونە بۆ چاكسازی و داواكردنی مافی چەوساوان .

من ئەم پێشەكی و بەرچاو ڕونیەم بۆیە باس كرد وەك وەبیر هێنانەوەیەك و بەراوردێك بۆ زانایانی ئاینی كوردستان و ڕۆڵیان لە جێنشینی پەیامبەران .

ئایا مامۆستایانی ئاینی لە كوردستان ئێستا چی ڕۆڵێك دەبینن ؟

ئایا پێشەنگی خەڵكی ماف خوراون ؟

یاخود دەمڕاست و بەرگریكارن لە ستەم  ؟

بە داخەوە ئەمڕۆ لە هەرێمی كوردستان بەشێك لە زانایانی ئاینی ڕۆڵێكی باش ناگێڕن لە كاری ئیصلاحی و داواكردنی مافی چەوساوان و ماف خوراوان.

ئەمڕۆ خەڵكی كوردستان بە بارێكی ناهەموار و تەنگژەیەكی ئابووری سەختدا تێپەڕ دەبێت زۆربەی  زۆری خەڵكی بژێوی ژیانیان لە مەترسیدایە و بەشێكی زۆر لە خێزانەكان لە ژێر هەڕەشەی هەڵوەشاندنەوەدان، چەندین خاوەن كار مایە پووچ بوونە و دەیان هەزار كرێكاریش بێ كار ماونەتەوە،  سەرەڕای هەڕەشەی پەتای كۆرۆناش كە ترس و بیمی بەسەر خەڵكیدا ماوە و نەڕەویوەتەوە .

بە داخەوە بەشێك لە زانایانی ئاینی لە بری بەرگری و داواكردنی مافی خەڵكی بوونەتە وتە بێژ و دەمڕاستی حكومەت دەیانەوێت خەڵكی داوای مافەكانیان نەكەن.

پەیامبەران هەمیشە لە پێشەوەی چەوساوان و برسیانی میللەتەكانیان بوونە بەڵام تا ئێستا ئێمە لە كوردستان نەمانبینیووە زانایەكی ئاینی بڵێ ئەمڕۆ لەبەر نەبوونی ژیانم ناڕەحەت بووە  كە هەرگیزیش خەڵكی كوردستان لەو ئاستەدا نەبوونە ئەگەر نانی دەمی خۆیان بگرنەوە ناهێڵن زانایانی ئاینی موحتاج و كەمدەرامەت بن، بۆیە پێویستە مامۆستایانی ئاینیش ئەمڕۆ زیاتر لە هەموو سەردەمێك بەرگریكار و داواكاری مافی خەڵكی بن .

من هەرگیز ناڵێم با زانایان و مامۆستایانی ئاینی توند و تیژی بنوێنن و هانی خەڵكی بدەن بەرەو توندڕەوی بەڵكو با دەنگیان و مینبەرەكانیان بكەنە دەنگێكی كارا و كاریگەر بۆ وەرگرتنەوەی مافی چەوساوان و خەڵكی ستەمدیدەی كوردستان . با ڕۆڵیان لە میراتگری پەیامبەران وەربگرنەوە  با ببنەوە بە (ورثة الانبياء) نەك ببنە زانا و مامۆستای كاربەدەستان (علماء السلاطين).

نوێترین

© 2016 Dwryan.net. All Rights Reserved.
Developed by Avesta Group and powered by Microsoft Azure