سەرەتا/ لەبارەی دابڕان/ پەیوەندی/

«دوایین کچ» چیرۆکی خانەوادەیەک لەباشوری کوردستان

30/08/2021


 

شەماڵ بارەوانی

 

«دوایین کچ» چیرۆکی خانەوادەیەک لەباشوری کوردستان، لەشارۆچکەی (شنگال) و لەگوندی کۆجۆ خەریکی ژیانی ئاسایی و کشتوکال و کاری ئاژەڵداری بوون، ژیانێک پڕی لەهێمنی و خەندە و بەختەوەریان هەبوو، نادیە دنیایەک خەونی لەسەر پەنجەرەی ئاییندە هەڵچنیبوو، ئەو دەیخواست لەداهاتوو خوێندنەکەی تەواو بکات و ببێت بەمامۆستای وانەی مێژوو، دووبارە ئەو مێژوو چەوشە ڕاست بکاتەوە، کەنەیاران لەبارەی ئایین و کەلتور و مێژووی ڕاستەقینەی ئێزدییەکان نووسراوەتەوە، مێژووییەکی شێواندراو ناشیرینکراو دەستکاریکراو به ئەهریمەنکرا، یاخود لەشنگال ئارایشتگەیەکی ڕازاندنەوەی خانمان بکاتەوە.

 

 

ئەفسوس، ئەوەی نادیە خەونی پێوەدەبینی و ئاواتی بۆ دەخواست، لەگەڵ ئەوەی ڕۆژگار بۆی دیاری کردبوو دوو دنیای زۆر جیاوازو دژو پێچەوانەبوون، مەخابن لەڕۆژێکی ڕەش و لەچرکەساتێکی نەفرەتاوی، لە١٥/ی ئۆگۆستی/ساڵی ٢٠١٤، کە تەمەنی نادیە هێشتا ٢١ ساڵی تێپەڕنەکردبوو، لەناکاوڕا، چرای ئاواتەکانی نادیە کوژێندرایەوە و کۆتری خەونەکانی تیرۆرکراو هەموو خۆزگەکانی لاقەکران، ڕۆژێکی شووم و ڕەش، کۆمەڵێکی هەمەجی بێ مۆڕڵ و بەربەری داشۆراو لەهەموو قیەم و ئەخڵاقێک، تاقمێکی سادیک و سەرلێشواو سێکسی و نەخۆش، گرووپێکی خەرەفاوی تاریک دید، گرووپێک مێشکیان پڕی لەخوڕافە عەقڵیان بارگاوی به بیری سەدەکانی ناوەڕاست و دەروونیان بارگاوی بەڕق، گرووپێک سێکس و ڕابواردن و بە کەنیزەو کۆیلەکردنی مرۆڤ و خاپورکردنی شارستانیەت و وێرانکردنی ژیان و لەناوبردنی جوانیەکان و سڕینەوەی جیاوازیەکان و لاقەکردنی ئازادی و تیرۆرکردنی تۆلەرانس و سەپاندنی تاقە ئایین و مەزهەبێک، ئەجێنداو ستراتیژی و عەقیدەیانە، گرووپێک تەعریب و داگیرکردن و کوشتن و سەربڕین، ئامانج و ئایدیۆلۆژیا و قەناعەتیانە، گرووپێک جگە لەزمانی توندوتیژی و تیرۆرو سەبڕین و تۆقاندن و سوتاندن و لاقەکردن، لەهیچ زمانێکی تر تێناگەن، گرووپێک لۆژیک، بەکفر و فەلسەفە بەبێ باوەڕی و هونەر به تابو و پەیکەر به بت و ئیرۆتیک بە لادان و ئازادی تاک بە بەڕەڵایی و دیموکراسیەت بە ئەهریمەن دەزانێت!

 

 

ئەو گرووپە وەحشیگەرەی، سپێدەیەکی تاریکی زوو، بەرلەوەی خۆری میترایی لەخەوی ئارامی ڕابێت و ئاسمانی کۆجۆ ڕۆناک بکاتەوە، بەرلەوەی تازە زاواو بوکەخانەکان لەناو وێنی شادی و خۆشبەختیان، هۆشیاربنەوە، بەرلەوەی چۆلەکان دەست بەژەنینی ئاواز بکەن، بەرلەوەی دایکان و باوکان ڕابن، کۆمەلێک دەعبای برسی بەسێکس و تینو بەخوێن و سادیک لەئازاردان و نەخۆش لەدەروون و خەرەفاو لەئەقڵ، کۆمەڵێکی کۆنەپەرست دواکەوتوو، تاقمێکی ڕۆح بۆگەن و سایکۆلۆجی داڕزیو، چەکدارگەڵێکی هۆڤی سیخناخ لەڕق و تاریکی و جەهل، لەناکاو هاتن، خەونەکانی نادیە و هەزاران گەنج و جەوان و ژن و پیاوی ڕۆڵەی میترایان گوللەبارانکرد، ئاواتەکانیان لاقەکردن، مرۆڤ بونیان دەستبەسەرداگرتن، کۆجۆیان شەڵڵالی فرمێسک و خەڵتانی خوێنکرد، کۆجۆیان کۆکوژو جینۆسایدکرد، کۆجۆیان تیرۆرو بێ سەروشوێنکرد، پیاو ژنە بەتەمەنەکانیان، دەستڕێژی گوللەی غەدرو جەهالەتکرد، دایک و شەش برای نادیەیان لەبەرچاوەکانی گوللەباران و شەللالی خوێن کرد و لەگۆڕێکی بەکۆمەڵ و لەپرۆسەیەکی تری ئەنفال، وەڵێ ئەم جارە ئەنفالی بارزانیەکان و گەرمیان نییە، شوێنەکەیشی نوگرە سەلمان و، بیابانەکانی خوارووی عێراق و سەماوەو شارەکانیتری ئەو وڵاتە نییە، بەڵکو ناو جەرگەی کوردستان و لەگوندی کۆجۆو قەزای شنگالە، بەو شێوە تراجیدیکە خانەوەداکەی نادیە و دەیان وسەتان خانەوادەی تری کوردانی ئێزدی، ڕوبەڕووی پاکتاوی رەگەزی و ئایینی دەبنەوە و لەسەرکوردبوون و ئێزدی بوون و دەستگرتنیان بە ئایین و کولتوری باوبپیرانیان و نەچونیان بۆ سەر کەلتوری بیابان و ڕەتکردنەوەی یاسایکۆیلەیەتی و سەبایە و بەرد و سەربڕین و ئەتکردنی مروڤ، کۆکوژ و جیۆسایددەکرێن و فەرمانێکیتری خوێناوی بۆ لیستی فەرمانەکانیان زیاد دەکرێت و تراجیدیایەکیتری ناخ هەژێن دەخرێتە سەر هەفتاو سێ تراجیدیاکەی تریان.

 

 

ئینجا نادیەو دەیان و سەتان و هەزاران کچی تری کوردانی ئێزدی و نەوەی میترایی باپیرانمان، لای ئەو تاقمە هەمەجی و هۆڤە، زۆر نامرۆڤانەو دورر لەهەموو بەهایەکی ئینسانی و ویژدان و ئەخلاقی، چەشنی کاڵایەکی مادی بێ گیان و بەیاساکانی بیابان و بە فیقهی ڕجعی سەدەکانی ناوەڕاست و بە کەلتورێکی کۆنی بۆگەنی بەسەرچوو نامرۆڤانە، دەکرێن بە کەنیزە و دەبرێن بۆ بازاڕەکانی کڕین و فرۆشتن (سوق النخاسة)، لە موسڵ و چەشنی کاڵایەک کڕین و فرۆشتنیان پێوەدەکرێت و ئەو دەست و ئەم دەستیان پێ دەکرێت و بەسەر سەربازانی ڕێگەی تاریکی و سەربڕەکانی دەوڵەتی خورافە(خەلافەت) دابەشدەکرێن و دەیان و سەتان جار لای پیاوە دەروون بۆگەن و ناوگەڵ پیس و ئارەزوو پەرست و جنساویەکانی داعشی تیرۆرست، دەستدرێژی دەکرێتە سەر کەسایەتی و کەرامەت و مرۆڤ بوونیان و لاقەی بەهاو ئینسانی بوونیان دەکرێت و لێیان دەدرێت و توندوتیژی و تیرۆریان لەگەڵ بەکاردەهێندرێت و کاریان پێدەکرێت و مرۆڤ بوونیان بریندار و ئەتکدەرێت. بەزۆر ئایین و عەقیدەیەکیتری نائێزدیان بەسەردا دەسەپێندرێت، جوێنیان پێدەدرێت و پێان دەگوترێت (بێ بڕواو پیس!) جگەرە بەلەشیان دەکوژێندرێتەوە، بەکۆمەڵ دەستدرێژیان دەکرێتەسەر، چ دینێک، چ یاسا و ویژدان و چ ئەخڵاقێک، ڕێگە بەوەدەدات دایک و خوشک و کچ و ژنی خەڵک دەست بەسەر دابگریت و بیانکەیت بەکەنیزەی جنس و بازرگانی ناوگەڵ و سێکسیان پێ بکەیت و ئەو کارە نامرۆڤ و بێ ئەخلاقەیش ناو بنێیت سونەتی ئایین و شەرعی خوا!؟ مەگەر لەمەزهەبی داعشە تیرۆرستەکان نەبیت، ئەو داعشانەی داچۆڕاون لەهەموو مۆڕاڵ و بەهاو ئەخلاقێک، ئەو تیرۆرستانەی ژن و ڕەگەزی مێینە، تەنها لەگۆشەی گون و سەری زەکەریانەوە دەبینن!

 

 

«دوایین کچ». بەسەرهاتنی هەموو ئەو ئێزدیە بێ تاوانانەیە، کەبوونە قوربانی دەستی ئایدیۆلۆژیایەکی شۆڤێنی و بەربەری و بەرژەوەندی وڵاتانی زلهێز، ئەو ئێزدیانەی دوای تێپەڕبوونی حەوت ساڵ، لەو تراژیدیایەی بەسەریان هات، هێشتا چارەنووسی دەیان و سەتان و هەزارانیان بەنادیاری ماوەتەوە! ئەو ئێزدیانەی کەوتنە ناو دەستی تاریکترین هێزی نێو مێژووی مرۆڤایەتی، هێزێکی شەڕانگێز، هێزێکی بەربەری بەرجەستەکەری هەموو ناشرینی و قێزەونیەکان، هێزێک، ئایکۆنی هەمەجیەت و دڕندەیی، هێزێکی بیرتەسک و ئەقڵ داخراو، هێزێکی میراتگری سەفاحەکان و قەعقاعەکان، جەلادو بەڵتەجی و هۆڤی لەنمونەی: ئەبو معاویە، مورتەجا، حیسام، ئەبو عەبدوڵڵا،  حاجی شاکر، حاجی سەلمان، حاجی عومەر، سەلوان، شوعەیب، ئەبو پەتات،ن وفاع ..تاد.

 

 

«دوایین کچ» تراژیدینامەی ژیانی کچێکە، ئەندامانی خانەوادەکەی کۆمەڵکوژ دەکرێن، «دوایین کچ». چیرۆکی پەپولەیەکی شنگالی، لەمالی خۆی و لەسەرزێدی هەزاران ساڵەی خۆی، قەڵەڕەشەکانی بیابان، دێن و سەربەستی دەست بەسەر دادەگرن و ئازادی ئەتدەکەن و دەیکەین بە ئێتیم و سێڤی، کەنیزە، لاقەکراو، ئاوارە.. «دوایین کچ» چیرۆکی ژیانی نادیەیە، نادیە موراد لەگەڵ خانەوادەکەی و ڕوبەڕوبوونەوەیەتی لەگەڵ ڕێکخراوی تیرۆرستی داعش، «دوایین کچ» ئەتکانامەیەکە، ئەتکردنی نادیە، ڕۆژیان، کاترین و نەسرین، جیلان، لەمیا، وەلاء، دیمال، ئەدکێ و ئەڵماس و دەیان و سەتان کچ و ژینیتری کوردانی ئێزدی.. «دوایین کچ». یاداشتەکانی کچێکە، ژیانی ئەتک و مرۆڤ بوونی تیرۆر دەکرێت، چیرۆکێکی تراجیدیکی و خەفەتاوی، چیرۆکێک بەرد دەتوێنێتەوەو دڵ دەکات بەئاو چاوەکان پڕ دەکات لەفرمێسک و گڕ لەویژدانە زیندووەکان بەردەدات و تابلۆی درۆینەی مافی مرۆڤ و دروشمەزەق و زلە بێ ناوەڕۆکەکانی کۆمەڵگەی نێودەوڵەتی و ئەنجومەنی ئاساییش و نەتەوەیەکگرتووەکان خەجاڵەت و شەرمەزاردەکات، مرۆڤ بوون و شیعارو پێوەرو پڕنسیپەکانیان دەخاتەژێر پرسیارەوە. «دوایین کچ» چیرۆکێکی تاقەت پڕۆکێن و بەئازار، چیرۆکێک لەگەڵ ڕودانی مۆڕاڵەکان کەوتن، پرنسیپەکان مردن، ڕووی ڕاستەقینەی شیعارە موزەییەفەکانی وڵاتە زلهێزەکان ئاشکرابوو، ئەو وڵاتانەی لەپێناو دوو بەرمیل نەوتی ڕەش، بازرگانی بەخوێنی سووری هەزاران کوردی ئێزدی و مرۆڤی ئێزدی دەکەن!

 

 

«دوایین کچ» گەشتی ئیبادەو کۆکوژی و مەرگە،مانیفێستی چەوسانەوەو ئازارو ئەتکە، حەکایەتی خێو تارمایی و تاریکپەرستیە، سەرگوشتەی کەوتنی قیەمەکان و مۆڕاڵی مرۆڤ بوون و پێشێل کردنی بنەماکانە، بەسەرهاتی خانەوایەکی بەلەنگازی بێزیان و ستەم لێکراوە، خانەوادەیەک، زمان و کلتوریان، مەسحەفی ڕەشیان، نزاو نوێژ و سروتە ئایینیەکانیان، هەمووی زاراوەی کورمانجی و بەزمانی کوردیە، ئەوان کوردی ڕەسەن و نەوەی میتراییەکان و، چاوگی کوردایەتی ئێمەن. خانەوایەک (ئێزدیەکان) سەرەڕای زیاتر لەهەفتا و سێ فەرمان و جینۆساید، وەلێ ئەوان ڕادەستی هیچ هێزێکی تاریکی و گروپێکی هۆڤەکان نەبوون، دەستبەرداری زمان و نەریت و ئایین و کولتور و ڕابردوو و مێژووی کوردانەی خۆیان نەبوون، گەرچی دووژمن، عەرەب ،تورک و پارسە ڕاسیزم و ڕەگەزپەرستەکان، بەچەندین ڕێگەی جۆربەجۆرەوە، سەتان ساڵە، هەوڵدەدەن هەستی نەتەوەیی ئێزدیەکان لاوازبکەن و کوردبوو لەناخیان بکوژن و لەکورد بوونیان جیابکەنەوەو بیان کەن بەعەرەب، یان هەرهیچ نەبێت، وایان لێبکەن بڵێن ئێمە کورد نین! گەرچی لەو هەوڵە نەزۆکەیان توانیان وا لەهەندێک لەکوردانی ئێزدی لەچەشنی (نادیەموراد) بکەن، بڵێن ئێمە کورد نین، بەڵام نەیان توانی بەو پیلانە شۆڤێنی و نەگریسە و هەوڵە فاشیستەیان تۆی ئەو قەناعەتەباتل و بەتال و بۆشە، لەدڵ و دەروونی زۆربەی ئێزدیەکان بچێنن، بۆیە شکستیان خوارد. نادیه خان، ڕاستە دڵشکاو، بریندار  و ماتەمدارە، ئێمە لەئازار و موعاناتەکانی تێدەگەین، بەڵام دەبێ ئەوەش بزانێت، هەر هەوڵێک، جا هەر کەسێک بێت بۆ جیاکردنەوەی کوردانی ئێزدی لەکوردبوون و دابڕانی شنگال لەکوردستان، ئەوە پیلان و ئەجێندای نەیارەو لەبەرژەوەندی ئامانچەگڵاوەکەی دوژمنانە و بەزیانی کوردانی ئێزیدی دەشکێتەوە و چاکە و فەزل و حەسەناتەکەی هەمووی دەچێتەوە سەبەتەی گلێشی نەیار و گیرفانی دوژمنانی خاتو نادیە و هەموو کوردەوە، ئەو دوژمانەی (تورک وپارس و عەرەب)ە ڕەگەز پەرست و دەمارگیرەکان، گەر لەهیچ شتێک یەک و یەکگرتوو نەبن، ئەوا بۆ پەرتەوازکردن لاوازکردن و پاکتاوکردن و و لێدان و لەناوبردن و جینۆسایدکردن و فەرمانکردن و قڕکردن و ئەنفالکردن و دووژمنایەتی کردنی کورد تەباو براو زۆر یەکگرتوون، و ئەوەی لەدەستیان بێت و هاتبێت، کەمتەرخەمیان لێ نەکردووەو ناشیکەن هەرگیز، ئەودوژمنانەی چۆن لە ڕژهەڵات، لەمێژە هەوڵدەدەن کوردنی بەختیاری لەکوردبوون دوور بخەنەوەو وایان لێ بکەن بڵێن ئێمە کوردنین، لەباکوری کوردستانیش هەوڵدەدەن وا لە کوردە عەلەوی و زازاکیەکان بکەن، لەڕۆژئاوایش ئێزدیەکان، لەباشوریش ئێزدیەکانی ئێرەو کوردانی شەبەک و کوردانی فەیلیش، جا بە پیلانی ئایینی، یاخود مەزهەب، یان ترساندنو تیرۆرو بەزۆر سەپاندنی ئایین، یان داگیرکردن و گۆڕینی دیموگرافیاو جوگرافیای کوردستان. یاخود بەشۆرینەوەی دماغ و ئەقڵ بێت، ئەوە دوژمنانمان لەهەوڵدان ناکەون و بەردەوامن لە جێبەجێکردنی پیلانە دۆزەخیەکانیان، لەدەرەنجامی ئەو هەوڵە بەردەوام و نەفرەتاوی و نەزوکەیان،گەر بەڕێژەیەکی کەمیش بێت،توانییان ئەفسوس بەشێکی کەمی کوردانی ئێزدی، شەبەک ،فەیلی،(تەنانەت لەناوکوردانی هەورامیش دەنگێکی نەشاز درووست بووە دەڵێت ئێمە کورد نین) والێ بکەن لەخشتەبەرن و فریوی نەیاران بخۆن و بڵێن ئێمە کورد نین،بەڵام دواجار ئەوە کەمێکی زۆر کەمن و زۆرینەی ئەوانەیتریان شانازی بەکوردبوونی خۆیانەوەدەکەن.

 

 

نوێترین


کاریکاتێر

وێنەهەواڵ

© 2016 Dwryan.net. All Rights Reserved.