سەرەتا/ لەبارەی دابڕان/ پەیوەندی/

رۆژی قیامەت!

6 رۆژ پێش ئێستا



عەبدوڵا عەباس

لەبیرمە و لەو رووداوانەی تەمەنی سەرەتای فامكردنەوەیە بە پێنانە تێگەیشتن لە دیاردەكان و فێربوونی پرسیار و بەدوادا چوونی وەڵام وا دەكات لەبیر نەچن.

ئێوارەیەكی پایزیی وەك ئێستا و ساڵی 1958 بوو، ماڵمان لە چوارباخ و لای مەزاری شێخ مستەفا بوو، كەخەڵك پێیان دەوت (قسنەكەی شێخ مستەفا )، لە ساحەكەی سانەوی سلێمانی دوای یاری و راكە راك بەدوای تۆپدا بەرەو ماڵ بڵاوبووینەوە، كە گەیشتمە ماڵەوە دەرگا داخرابوو، ئەملاو لایەكم كرد كەس بەدەرەوە نەبوو، بەكۆڵانەكەی خۆماندا بەرەو خوار بوومەوە كە لە مەزارەكە نزیك بوومەوە بینیم، بە ژنانی گەرەك دەورە دراوە.

ئەوەی بەكوڵ دەگریا و ئەوەی دەستی بەرز كردبووە بۆ ئاسمان و دۆعا و نزای دەكرد، لەناویاندا دایكم دۆزیەوە بەكوڵ دەگریا، هەركەمنی بینی پەلی راكێشام و لای خۆیەوە داینام و سەرمی نا بەسنگیەوەو گریانەكەی بەكوڵتر كرد و تێگەیشتم نزای بەدووربوونمان لە ئاگری جەهەنەم دەكات و هەر ئەو نزایە زمان حاڵی هەموویان بوو!

بەهەرحاڵ، بەقسەی بچڕبچڕی دەمگریانەوە لەو و ژنەكانی دی تێگەیشتم (ئاسكۆڵ خانی ناسراو بە ژنە ئیمانداری گەڕەك دەمە و عەسر خەو بردوویەتیەوە و لەخەویا پێیان وتووە : ئیمانداران حازربن ئەمشەو شەوی قیامەتە ..دنیا نغرۆ دەبێ‌.

كەس نەیزانی چۆن خەونەكەی بەكۆڵان و گەڕەكدا بڵاو بوویەو روویان لە مەزاری شیخ مستەفا كرد، بەهیوای ئەوەی نزیكی لەو ئەولیا ساڵحە قیامەتیان بەئاسانی بەسەر بێت!

ئەم دیمەنە عەنتیكەیە بەردەوام بوو تا مامۆستای مزگەوتەكەی چوارباخ و دوو سێ پیاوی گەڕەك هاتن و فەتوای ناشەرعی ئەم ترسەی تێگەیاندن و ترساندنی گوناهیان زیاتر دەبێ‌ ئەگەر بڵاوەی لێنەكەن و تەحدیدی رۆژی قیامەت لە عیلمی غەیبدایە ئیشارات و نیشانەی هەیە هەر پەروەردگار دەیزانێ‌ و …هتد.

ئەم تراجیدیایەم بیركەوتەوە دوای خوێندنەوەی هەواڵێ دەڵێ‌ : (زانایەكی فەلەكی رایگەیاندووە نیهایەتی كەون و ژیان نزیكە و بەهۆی گەردەلولێكی خۆرەوە روودەدات و هیچ كام لەزانا شارەزاكان هەستی پێناكەن و لەپڕ دەقەومێ‌ و دنیا فەنا دەبێ‌). ئەم هەواڵەم بۆ پیرەژنێكی نورانی و ئیمانداری ئەم سەردەمە خوێندەوە زۆر بە بێباكانە وتی : ناماقوڵی كرد! تەنیا پەروەردگار رۆژی قیامەت دەزانێ‌!

دوا قسە:
دەربڕینی رەئی و هەڵوێست ناوەڕاستی نێوان زانست و جەهلە!
ئەفلاتون

نوێترین


کاریکاتێر

وێنەهەواڵ

© 2016 Dwryan.net. All Rights Reserved.