شەماڵ بارەوانی
کتێبێکی ژنە نوسەرو وەرگێڕی میسری( ئەسما‌موستەفا کەمال)ە یەکەم چاپی لە:٢٠١٨/١١/١١ لە دوو توێی کتێبێکی قەبارە مام ناوەندی ٣٠٦ڵاپەڕەییدا لێ بڵاوبووەوە نوسەر لەنوسینەوەو کۆکردنەوەی چیرۆک و بەسەرهات و گێڕانەوەکانی لەو پەڕتوکەدا پشتی بە چەندین کتێب،دیالۆگ و چاوپێکەوتنی تەلەفزیۆنی و ڕۆژنامەکان کە لەگەڵ قوربانی و کۆنە داعشەکان ئەنجامدراون بەستووە،هەموو ئەو وتارانەی لەڕۆژنامە ئەوروپیەکان بە تایبەتی فەڕەنسیەکان بڵاوبوونەتەوە وەرگێراوەتە سەر زمانی عەرەبی و پاشان لەدوو توێی ئەم کتێبەدا کۆی کردونەتەوە.
خوێنەر لەخوێندنەوەی «ژنانی داعش دیل و كەنیزەن» ڕوبەڕووی کۆمەڵێک پرس دەبێتەوە وەک:ڕێکخراوی تیرۆرستی داعش کێن؟ لەکوێوە هاتوون؟ دیدە نیگاو هزرو بیرو ئایدیۆلۆژیایان؟ بۆچی ئەو تاقمەی خەلافەتی ژنبازی پشت بە توندو تیژی و سەربڕین و کوشتن و سوتاندن و تۆقاندن دەبەستن و کردویانە بەستراتیژی خۆیان؟
ئایە ئەوەی ئەو گرووپە فەندەمێنتالیست و ڕادیکاڵە دەیکات هیچ ڕایەڵەو پەیوەندیەکی بەئایینەوە هەیە؟ ئایە ڕەگ و ڕیشەی ئەو هەموو توندو تیژیەو کاری سەربڕین و کوشتن و بەکەنیزەکردن و بەکۆیلەکردنەیە لەناو کەلەپووری ئایینی و مێژوویی ئایینیدا هەن کە وەک میراتێک بۆمان بەجێ نەماوە؟
ئەو کەلەپورو توراسە دەستکاری نەکراو بەهێڵ و پیرۆزو بەبڤەکراو وەک خۆى ماوەتەوە ڕووبەرووی هیچ پێدا چونەوە و ڕەخنەیەک نەکراوەتەوە، بۆ نمونە لەسەدەکانی ناوڕاست، بۆمانی دەگوازێتەوەو بەو شێوەیە شۆڕو درێژ بۆتەوە بۆ زەمەنی ئێستا!.
«ژنانی داعش دیل و كەنیزەن»نۆڤلێتێکی فانتازی و ڕۆمانێکی خەیاڵی و بەرهەمی بیرکردنەوەو هۆنینەوەیەکی ڕوت و ئەپستراکتی خەیاڵ و هزری نووسەرنین، بەڵکو ڕۆمانێکە لەڕووداو گەڵێک و کۆمەڵێک چیرۆکی ڕاستەقینەی کە لەناو جەرگەی ژیانەوە هەڵقوڵاون وەرگیراوە، هەموویان لەناو حەقیقەتی بوون و لە هەناوی واقعدا لەدایک بوون و هەربەراستی ڕویانداوە،تەجرەبەو ئەزمونی هەموو ئەو ژن و کچانەیە کە بەدیل کەوتونەتە دەستی ڕێکخراوی تیرۆرستی داعش، یاخودفریودراون و بەویستی ڕەهای خۆیان چوون بۆناو ئەو ڕێکخراوە هەمەجی و هۆڤە،چیرۆکگەلێکی تاڵ و تاقەتپڕۆکێن و ناخۆش و بەسوێن.
چیرۆکی ئەو کچ و ژنانەی ڕایانکردووە، یاخود ڕزگارکراون، چ ئەوانەی بوون بە هەڵگری بیری داعشگەرێتی و دواتر هۆش و ئیدراکیان بۆگەڕاوەتەوەو وازیان لەو دیدە تاریک و عەقڵیەتە خوڕافی و فیکرە بۆگەنەی داعشی تیرۆرست هێناوە، چی ئەوانەشی کەپێشووتر کراون بەدیل و کەنیزەو دواتر ڕایانکردووەو یاخود ڕزگارکراون، چی ئەوانەشی لەکەمپەکاندان و هێشتا باوەڕیان بەو دیدە کۆنەخوازو تاریک پەرست و ئایدیۆلۆژیا تیرۆرستیەی داعش هەیه،گەشتی مەرگ و ئازاری کچ و ژنە ئێزدیەکانە، لەژێر چنگی دێوەزمەی دەوڵەتی خەلافەتی ئیسلامی و دۆزەخی داعشی تیرۆرست، ئەو ژن و کچانەی ڕووبەروی چەوسانەوەو تووندوتیژی جەستەیی و دەروونی و لاقەکردن و لێدان و دنیایەک سوکایەتی و بێ ڕێزی دەبنەوە، لەسەر دەستی تاریکپەرستەکانی دەوڵەتی جەهالەت و خەلافەتی نەزانی.
نوسەر کتێبەکەی «ژنانی داعش دیل و كەنیزەن».بەسەر چەند بەشێک دابەشکردووەو لەهەر بەشەو باسی بابەتێکدەکات، لەدرێژی بەشەکان و گێڕانەوەی چیرۆکەکان دا، خاتوو ئەسما، لەو کتێبەدا لەڕێگەی چ ئەو ژن و کچانەی وەک کچ و ژنە ئێزدیەکان،کەداعشی تیرۆرست، لەشنگال دوای ئەوەی داگیری دەکات و بەزۆر دەیانکات بە دیل و بەکەنیزەو دەیانبات لەو شارانەی تر کەداگیری کردوون لەنمونەی موسڵ و ڕەقەو شوێنانی تر، لەبازاڕی کەنیزەو سەبایە، کڕین و فرۆشتنیان پێوە دەکەن، چی ئەو ژن و کچانەی کە باوەڕو قەناعەتیان بە عەقیدەی تووندو تیژی و بیری ڕادیکاڵی و باوەڕی داعشگەرێتی و کاری تیرۆرستی و دەوڵەتی خەلافەتە گۆڕبەگۆڕەکەی بەغدادی تیرۆرست هەیە و بە ئارەزوی دڵی خۆیان ڕۆشتوون بۆ ناو ئەو ڕێکخراوە تیرۆرستە و هەڵخەڵەتێنراون و لەخشتە بردراون و کەوتونەتە داوای بیری توندڕەوی و بوون بەتیرۆرست و دوای داعشی تیرۆرست کەوتوون، ئەو کچ و ژنانەی هاتوون جیهادی نیکاح و خزمەتی ناوگەڵی پیاوە داعشەکان و فیکری تیرۆرو دەوڵەتی خەلافەتی جنسبازی تیرۆرستانی داعش و بەغدادی بکەن.
بەو چەشنە نووسەر بەسەرهات و چیرۆکەکانمان بۆ دەگێڕێتەوەو تیشک دەخاتە سەر ڕووداو حەکایەتەکان و لەحەکایەتی ژیان و چارەنووسی ئەو زارۆکانە دەدوێت، کەلەژێر دەسەڵاتی داعش و لەناو بازنەی خەلافەتەکەیان مەشقی مێشک شۆرینەوەو پڕۆڤەی خۆکوژی و خۆ تەقاندنەوەو بەربەری بوونیان پێکراوە دەدوێت، ئینجا هەڵوێست و هەڵسوکەوتی وڵاتانی ڕۆژئاوا دەخاتە ڕوو لەبارەیانەوە، کە لەگەڵ ژنە داعشەکان گەڕاونەتەوە،یان دەگەڕێنەوە، بۆ وڵاتە ڕۆژئاواییەکان ، بەتایبەتی وڵاتی فەرەنسا، ئەو منداڵانەی نەک هەر تەنها ئەوروپاو فەرەنسا، بگرە لەداهاتوودا دەبن بەگەورەترین هەڕەشەو مەترسی و کارەسات و کێشەو بەڵاو بەرۆکی ژیان و تەواوی جیهان و هەموو مرۆڤایەتی دەگرن، ئەو منداڵانەی لەژێر تەمەنی یاسایی لێپێچینەوەو دادگاییکردندان، ئەو منداڵانەی داعش مێشکی بە هزری داعشگەرێتی و تۆی توندوتیژیی بۆگەنکردوون و جیهانی پاکی و دونیای پەپولەیی و بەرائەتی منداڵی لێفڕاندوون و ماناکانی ژیانی لێ شێواندون،ئەو منداڵانەی لەتەمەنێکی زۆر بچوک و زووەوە داعش غەسلولدەماغی کردوون و مێشکی بە بیری فەندەمێنتالیستی شۆردونەتەوەو ڕاهێنانی لەسەر دڕندەیی و چەک و کوشتن و سەربڕینی مرۆڤەکان پێکردوون و دۆگمی ڕادیکاڵی و بیری بناژوخوازی لەخانەکانی مێشکیان چاندوون و دەروون و سایکۆلۆجی و عەقڵی لێ تێک و پێکداون و بەو تەمەنە زووەوە کردونی بەمەرگ دۆست و دوژمنی ژیان و دژی ژیان! ئەو منداڵانەی زۆری دەوێت تا دووبارە لەڕێگەی پەروەردەیەکی سیکۆلارو لیبڕاڵی نامەزهەبی و نائایدیۆلۆژی، پەروەردەیەکی هێمن و بارگاوی بەڕۆحی سەردەم و فەلسەفەی لێبوردەیی، پەروەردەیەکی سیخناخ لەهێزی خۆشەویستی و یەکتری قبوڵکردن و لێوان لێو لەتولەرانس و پلۆرالیەت، لەڕێگەی ئەو پەروەردە شارستانی و مۆدێرنێتەوە جارێکیتر چارەسەربکرێن و بگەڕێندرێنەوە سەر ڕاستە ڕێی ژیان و باوەشی مرۆڤایەتی.
ئەو مناڵانەی جگە لەبۆمب گەلێکی ترسناک و تەوقیتکراو چیتر نابن، قومبەلە گەڵێک لەداهاتوودا ژیان وێران و خاپووردەکەن، گەر دووبارە لەپرۆسەیەکی بنیاتنانەوەی کەسایەتی و لەڕێی پەروەرەیەکی مەدەنیدا دیموکراتیکدا،دروست نەکرێنەوە و بەپڕنسیپەکانی مرۆڤبوون شادو ئاشتنەکرێنەوە و قفڵی ئەقڵ و هۆشیان نەکرێتەوەو جارێکیتر تێکەڵ بەکۆمەڵ نەکرێنەوە، ئەومنداڵانەی ئەقڵیان لەقاڵب دراوەو درک و هۆشیان بە کۆمەڵێک تێکستی خوڕافی بەربەریانەو بیری توندڕۆیی ئیفلیج کراوەو بە دۆگم و دۆکترینی فەندەمێنتاڵیستی تەلقیندراون و توانای بیرکردنەوەو وزەی گەشەکردنی ئەقڵیان خەفەکراوە.
هەروەها نووسەر لەو کتێبە بەوردی لەئازارو موعانات و چیرۆک و تراژیدیای هەموو ئەو کچ و ژنانەی کوردانی ئێزدی دەدوێت، کە لەسەر دەستی ئـەو تاقمە تیرۆرست و دڕندەیە دووچاری چەوسانەوەو لاقەکردن و دەستدرێژی سێکسی دەبنەوە،دوای ئەوەی سەربازانی ڕێگەی تاریکی و جوندەکانی دەوڵەتی خەلافەتی خەرەفاو لەشنگال خاک و ماڵ و حاڵیان داگیردەکەن و ژنە بەتەمەنەکان و هەموو پیاوەکان دەکوژن و ژنە کەم تەمەن و مام ناوەندو گەنجەکانیش دەکەن بەدەستکەوتی داگیرکاری و کەنیزەی ناوگەڵ و سەبایەی سێکسی و دەست بەسەر ئازادی و کەرامەت و کەسایەتیان دادەگرن و ئازادی و ژیانیان لێ زەوتدەکەن و بەفقهێکی کلاسیکی کۆنی کۆنەخوازی نامرۆڤانەی سەدەکانی ناوەڕاست، ئەو فیقهە نافیقهەی ،ئەفسوس کە تائێستایش لەقوتابخانەو پەیمانگە ئایینیەکان و کۆلێژی زانستەئیسلامیەکان و زانکۆ ئیسلامیەکان دەخوێندرێت!
فقهێک کە بەرهەمی عەقڵیەتیەتێکی نامرۆڤانەو عەقڵێکی دۆگمای دژە ئینسان و ئاست نزم و داخراو تاریک،عەقڵێک،لەو سەردەمی عەقڵانی بوون و بەسەنتەربوونی عەقڵ و سەدەی شۆڕشی زانستی و تەکنەلۆجی و جیهانگیریدا، هێشتا بەستەڵەکی خوڕافەو بەنجی نەزانی و غەیبوبەی جەهالەت و کۆنەخوازی سەدەکانی ناوەڕاست بەرینەداوەو باوەڕی بە دۆکترینی چەسانەوەی مرۆڤ و کوشتن و سەربڕین و بەردباران کردن و ئەتکردنی مرۆڤ هەیەو سیستەمی کۆیلایەتی و بەکەنیزەبوون و ژێردەستەبوونی مرۆڤ،حەڵاڵ و ڕەوادەکات و پشتگیری لە یاسای کۆیلایەتی و بەکەنیزەکردنی مرۆڤەکان دەکات! عەقڵێکی بارگاوی بەتیرۆرو زۆر سادەو تەسک و داخراو تاریک، عەقڵێکی تاک ڕهەندی پۆپۆلیست، عەقڵێکی خلەفاوی خورافەگەر، عەقڵێکی بەربەری و ناشارستانی، عەقڵێک ڕێگە بەخۆی دەدات دەست لەژیانی مرۆڤەکان و تایبەتمەندی و ئازادی تاکەکانەوە وەربدات،ژن و دایک و کچ و خوشکی خەڵک، بکات بەجاریەو کەنیزەی موتعەو جنس، عەقڵێک لەنزمترین و بەربەریترین و فاشیسترین و فاشیلترین و نا مرۆڤترین ئاست لەژن و ژیان و مرۆڤ دەڕوانێت!