سەرەتا/ لەبارەی دابڕان/ پەیوەندی/

ئیسلامی سیاسی لە كوردستان بۆ خەمی نەتەوەو خەونی دەوڵەتی نەتەوەیی دروست نەبوون

07/11/2021


شەماڵ بارەوانی

«الاسلام السیاسی في اقليم كوردستان-العراق. ملاحظات وانطبعات تأريخية و سياسية» 

کتێبێکی قەبارە مەزنی نووسەر مامۆستا (عەبدولفەتاح عەلی عومەر بۆتانی)یە.بەڕێزیان لەو کتێبە بەنرخەیان کۆمەڵێک بابەتی گرنگ و پێویست دەربارەی ئیخوانولموسلمین و ئیسلامی سیاسی بەگشتی دەوروژێنێت و باس لە ئەجێنداو ئایدیۆلۆجیاو پەیڕەو پرۆگرامیان دەکات و لەو دەست و دەعمە مەعنەوی ومادیە دەرەکیە دەدوێت کە لەپشتى ئەوهێزە ئیسلامیه سیاسیانەی کوردستاندان و بەبەڵگەو لۆژیک و ئەرگویمێنتەوە، مەترسی و هەڕەشەی ئیسلامی سیاسی لەسەر  پێکەوەژیان، ڕۆحی لێبوردەیی، فرەیی و تەعەدودیەت، دیموکراسی و ئاشتی و ئاساییش و ئاییندەی وڵات، بە تەعریبکردنی ناو نەریت و کلتوری کورد و خەفەکردنی هەستی نەتەوەیی لەناخی تاکی کورد و بەلاڕێدابردنی گەنج و نەوجەوانی کورد،دەکات وبەڕێزیان هەر لەو سۆنگەیەشەوە تیشک دەخاتەسەر کێشەی کورد، وەکو نەتەوەیەکی خاک دابەشکراو پارچەپارچەکراو لە مافی بڕیاری چارەی خۆنووسین و دەوڵەتی نەتەوەیی بێ بەشکرا.

 

ئینجا مامۆستا عومەر لەبەشێکی«الاسلام السیاسی في اقليم كوردستان-العراق» باس لەمێژووی دەرکەوتنی ئیسلامی سیاسی دەکات لەکوردستان و باس لە هەڵوێستی ئیسلامی سیاسی دەکات لەبارەی کێشەی نەتەوەیی کورد و پێمان دەڵێت "لەگەڵ ئەوەی کێشەی کورد، کێشەیەکی نیشتمانی و نەتەوەییە، کێشەی چەوسانەوەی کورد و بێبەشکردنیەتی لە مومارەسەکردنی مافە سروشتیەکانی خۆی لەسەر زێدی خۆی، کە کێشەو ململانێیه لەگەڵ داگیرکران و دابەشکەرانی خاکی کوردستان، لەو دەوڵەتە ئیسلامیانەی وەکو"عیراق، سوریا، تورکیا، ئیران..و پێمان دەڵێت" ئەو هێزەیلە ئیسلامگەرایانە هیچ پرۆژەیەکیان لانییە بۆ چارەسەری کێشەی نەتەوەیی کورد.٦١).و "بەرنامەیان خاڵیە لەهەر چارەسەرێک بۆ پرسی کورد.١٠٠).

 

چونکە ئیسلامی سیاسی لە بنەڕەتدا بۆ خەمی نەتەوەو خەونی دەوڵەتی نەتەوەیی و ڕزگارکردنی خاکی کوردستان، لەژێر چنگی داگیرکەران و کۆڵۆنیالیزم دروست نەبوون و دانەمەزراون، بۆیە ئەوان هەڵگری پرۆژەی نەتەوەیی نین و بۆ بەرگری کردن لەخاکی کوردستان و کلتوری کوردەواری و داب و نەریتی کوردەواری و خەم و ئازارو نەهامەتیە ناسیۆنالیستەکانی کورد دروست نەبوون، ئیسلامی سیاسی بۆ ئەوە نەهاتوون تا باسی حەپسەخانی نەقیب و لەیلاقاسم و سینەم بەدرخان و قازی محەمەدو سەیدڕەزای دێرسمی و شێخ سەعیدی پیران و شێخ مەحمودی حەفیدو سمکۆی شکاک و ڕەفیق حیلمی و دەوڵەتی مادو دیاکۆ کەیخەسرەو ئەستیاگ ..تاد..، بۆ نەوەو ڕۆڵەی کورد بکەن، هەرگیز ئەوە ئامانج و پرۆژەو بەرنامەو فیکرو ستراتیژی ئیسلامی سیاسی نەبووەو ناشبێت، کەحزبێک و دوان و سیانیشتان بەم دواییە وەک دیفاکتۆو لەژێر فشارو بڕیاری واقیع و به ناچاری بڵێت بەڵێ بۆ دەوڵەتی کوردی، دڵنیابن، ئیسلامی هەر ئەو دەوڵەتەیان مەبەستە. کە بەپێی شەریعەت و ئایدیۆلوجیاکەی ئەوانەوە بەڕێوەبچێت و فقهی شافعی و  عەقیدەی ئیخوان و بیری حەسەن بەناو، دۆگمی سەید قوتب و تێگەیشتنی ئەمیرو ئەمیندارو ڕابەرەکانیان تێیدا حاکم و باڵادەست و بڕیاری ڕەهاو هەموو شتێک بێت ،دەوڵەتێک تەنها بەناو کوردی بێت و فڕی بەسەر دەوڵەتی نەتەوەییەوە نەبێت، فڕی بەسەر کلتورو زمان و داب و نەریتی کورددەوارییەوە نەبێت،فڕی بەسەر دیموکراسی و ئازادیەکان و مەدەنیەت و عەلمانیەتەوە نەبێت، دواتر ئیسلامی سیاسی درێژکراوەی ئیخوانیزم و  ئیخوانولمسلیمین"بەباوک یاخود(دایک)ی ڕۆحی هەموو بزوتنەوە ئیسلامیەسیاسیەکان دێتە ژماردن لەجیهان. واتە هەموویان لەژێر پاڵتۆی ئیخوان هاتونەتەدەر.١١٩)هەموو بزوتنەوە فەندەمێنتالیستەکان ، هەموو گرووپە ڕادیکاڵ و بناژۆخوازەکان، کەهەموویان لەبنەمادا بۆ زیندووکردنەوەی خەلافەتی ئیسلامی و دروستکردنی ئەمارەت و دەوڵەتی سیوکراتی و جێبەجێکردجی شەریعەت دروستبوون و حیزبە ئیسلامیەسیاسیەکانی کوردستان. حزبگەڵێکی ئایینی و مەزهەبی و ئایدیۆلۆژین،  هاتوون تا باسی زەینەب غەزالی و سوڵتان عەبدولحەمیدو سوڵتان مورادو هارون ڕەشیدو خەلیفەعەباسی و ئەمەوی و عوسمانی و ئیسلامیەکانی ترمان بۆ ...بکەن، سەفاح و  قەعقاع و فلان و فيسارتری عەرەبی و ناومێژووی عەرەب و دەیان داگیرکەری تری خاک و مێژوومان، زۆر چەواشەکارانە،وەک پاڵەوان و قارەمانگەلێک بەڕۆڵەو نەوەی کورد بناسێنن و یەزدەکورد بەرگریکارانی خاک و شەڕەفی کوردیش، لەجەنگەکانی قادسیەو جەلەولا(گوڵاڵە)و نەهاوەندو حەلوان ..تاد. وەک کافرو بێ بڕواو، مێژووی عەرەب بەناوی ئایینەوە بکەن بەمێژووی کوردو ڕۆڵەی کورد لەمێژووی باب و باپیرانی خۆی نەبان و نەناس بکەن و دووری خەنەوەو دایببڕن و لەبیری بەرنەوە.

 

بۆیە دەبێ ئەو حەقیقەتە بزانین،کە ئیسلامی سیاسی نەهاتوون تاباسی دەوڵەتی ماد، خوریەکان، گوتی و لولویی و کاشی و..تاد..بکەن، ئەوان لەپاڵ باسکردن لە دەوڵەتەکانی تری وەک عەباسی و ئەمەوی و بوەیهی و عوسمانی و ..تاد. ئیسلامی، تەنها باسی دەوڵەتی مەروانی و ئەیوبی و هاوشێوەکانیان دەکەن، ئەو دەوڵەتانەی جگە لەپرۆژەی عەرەب و  خزمەتکردنی مەزهەب و کلتورو هەموو شتێکی عەرەب، هیچ شتێکیان بۆ کورد نەکوردووە، ئەوانەی تەنها دەتوانین وەک بەشێکی خزمەتکاری مێژووی عەرەب و لایەنە نێگەتیڤ و نەرێنیەکەی ناو مێژووی کورد سەیریان بکەین و پۆڵێنیان کەین.

هەروەها بەڕێز بۆتانی له بەشێکیری کتێبەکەیدا، قسە لە مەرام و مەترسی و ئامانجەکانی ئەو هێزە ئیسلامگەرایانە دەکات لەسەر ئێستاو ئاییندەی هەرێمی کوردستان و پێمان دەڵێت حیزبە ئیسلامیە سیاسیەکان چەندە مەترسین لەسەر پرسی نەتەوەی کوردو داهاتووی کوردستان و "ٚدەیانەوێ خەباتی نەتەوەیی کورد لەدەلالەتی نەتەوەیی و ومانا ڕاستەقینەکەی خۆی بەتاڵ بکەنەوە.وێنەی تاکی کورد. لەتاکێکی نەتەوەیی بشێوێنن و بگۆڕن بۆ تاکێکی تەنها موسڵمان-ئیسلامی.١٧)

 

بەو چەشنە دەیانەوێ تاکی کورد بەلاڕێدابەرن و ئاڕاستەی کورد لەکێشە بنچینەیی و ڕاستەقینەکەی خۆی بگۆڕن، بەرەو لای ترو ئاڕاستەی تر و شتی تر، کە لە بنەڕەتدا کێشەی کورد و تاکی کورد نییە، لەکاتێکدا کورد بەهۆی ئینتیمای نەتەوەیی بۆنەکەی و خاک و زمان و مێژووەکەی دەچەوسێندرێتەوەو ئیبادەو کۆکوژدەکرێت و فەرهەنگی دەشوێندرێت و خاکی داگیردەکرێت، نەک بەهۆی ئینتمای ئایینی ،و کور کێشەی نەتەوەو خاک و زمان و سنوری هەیه، نەک ئایین،لەکوردستان ئازادی ئایین و بیروباوەڕو عەقیدە لەلوتکەدایه، هیچ کەس و هێزو حیزبێک ڕێگری لەوە نەکردووە نوێژ بکەیت، بڕۆیت بۆ حەج، زەکات بدەیت، لەچک بپۆشیت و نەیپۆشیت، دەچیتە کەنیسه، ئاتەشگه مزگەوت..تاد.ناچیت، کەواتە بوونی ئیسلامی سیاسی چ زەرورەت و واتایەیەکی هەیه لەهەرێمی کوردستان!؟ ئەو ئیسلامیه سیاسیەی "هاوردەیەکی نەخوازراوی دەرەوەی.١١٢)کێڵگەی ژیانی کوردستانن و نامۆ بەکلتوری کوردو(گەلی کورد ئەوڕۆ وڵاتەکەی پارچەپارچەکراو دابەشکراوەو پێویستی بەوەیە نەتەوەکەی، زمان و کلتورو کەلەپورەکەی بێتە پاراستن.١١٢). و هیچ کێشەیەکی ئایینی نییە تا ئیسلامی سیاسی بێت و بڵێت من نوێنەری ئاسمان و شمشێری ئایینم و بەرگری لە ئایین دەکەم،" گومانی تیا نییە دروستبوونی حیزبی ئیسلامی سیاسی لەکوردستان و دەرکەوتنی ئایدیۆلۆجیای ئیسلامی سیاسی لەدایکبوویەکی پێویست و دیاردەیەکی بابەتی نەبوو، بەڵکو درووست بوونیان بەهاوکاری و پشتگیری دەستی دەرەکی و هاندانی دەرەوە بووە،بە پلەی یەکەم ئەو دەوڵەتانەی کوردستانیان دابەشکردووەو چاڵاکیەکانیان بێ گومان لەبەرژەوەندی بزوتنەوە نەتەوەییەکانی فەرمانڕەوای ئەو وڵاتانە دەبێت لەناوچەکە.١٠٣) چونکە ئیسلام لای ئەمان(تورک و پارس و عەرەب، تەنها ئایینێک  نییەو بەس،بەڵکو لەبۆتەی ئیدیۆلۆژیایەکی قەومیش بەکاریدەهێنن لەپێناو بەرژەوەندیەنەتەوەییەکانی خۆیان، "ئاڕاستەی بزوتنەوە نەتەوەییەکان لە ئیران  و تورکیاو دەوڵەتە عەرەبیەکان ئاڕاستەو تەوجیهی ئیسلامی سیاسی یاخود(فوندەمێنتالیستەکان) دەکات،نەک پێچەوانە، پێچەوانەی ئیسلامی سیاسی ئاڕاستەکراو لەهەرێمی کوردستان، کە هەوڵدەدات ڕووی کورد لەسەر کێشە بنچینەییەکەی و قەزیەنەتەوەییەکەی لاببات.١٠٣٠١٠٤)

 

ئینجا بەڕێزیان زیانێکی تری ئیسلامی سیاسی باس دەکات، بۆ پێکەوەژیان و ڕۆحی یەکتری قبوڵکردن، ئەو پێکەوەژیان و تۆلەرەنس و پلورالیەتە جوانەی لەکوردستان هەیە، پێکەوەژیان و لێبوردەییەک، لەتڕۆپکدایەو لەهەموو وڵاتانی ڕۆژهەڵات نموونەی نییه، ئەویش ئەوەیه حیزبەکانی ئیسلامی سیاسی تۆی تەشەنوج و دژایەتی لەنێوان پێکهاتەکان و ئایینە جیاوازیەکانی کوردستان دەچێنێت و ڕق و فیتنەو دەمارگیری و دووبەرەکی دروستدەکات. نەک هەر لەنێوان بەتەنها موسڵمانێک و نا موسلمانێک، بگرە لەنێوان بازنەی ئیسلامیش.١٢٥)، مەزهەب و حیزب و گروپە جیاوازەکان دەکات بە دوژمنی یەکتری و کۆمەڵ بەرەو ترازان و شێوان دەبات و گیانی تەبایی و برایی لەنێوان مرۆڤەکان وێران دەکات.

 

خاڵێکیتر کە بەڕێزیان ئاماژەی بۆ دەکات. ئەویش ئەوەیە کە ئیسلامی سیاسی دیوێکیتری تەعربیەو ڕۆڵێکی گرنگ و  ناڕاستەوخۆی هەیه لە پرۆسەی بەتەعریبکردنی کوردو بزاڤی تەعریب و، ئەنفالکردنی ناو ناسنامەو کلتوری کردو لەلاوازکردن و خەفەکردن و کوشتنی هەست و شعوری نەتەوەیی لە دڵ و دەروونی تاکی کورد و ئیسلامی سیاسی هەرگیز هانی خەڵک نادات بۆ ئەوەی ناوی کوردی  لەمناڵەکانیان بنێن و بە پێچەوانەوە بەڵکو بۆناوی عەرەبی کورد هاندەدات و بەڕێزیان لەو بارەوە پێمان دەڵێت لەساڵی١٩٩١ ڕێژەی ناوی کوردی لەناوکوردا ٦٥٪بووەو،بەهۆی چاڵاکی ئیسلامی سیاسی  لەکوردستان، ڕێژە  بۆ ٣٣٪  دابەزیوە لەماوەی نۆساڵ،واتە  لەساڵی٢٠٠٠،ئەی دوای بیست و یەک ساڵ و ئێستاو  لەساڵی ٢٠٢١،دەبێت ڕێژەکەی بۆچەند دابەزیبت؟ "لەسەردەمی بەعس، سەرەڕای دڕندەیی و ترسی بەعس و نەبوونی ئازادی،ئینجا خەڵک وەکو تەحەدایەک بۆ دۆژمن و  قەناعەتێکی نەتەوەییش ناوی کوردیان لەمناڵەکانیان دەنا،ناوگەلێک کەهەڵگری دەلالەت و واتای نەتەوەی و مێژوویی و  بەرخودان بوون وەک تەحەدایەک بۆ ڕژێمی بەعس و بەڕێگەیەکی ئاشتیانەو سلمی خەباتیان دەزانی، لەگەڵ ئەوەی بەعس دژی ئەو ئاڕاستەو ناوانەش بوو، ئەوە بەڵگەی بەهێزو بەرزی هەستی نەتەوەیی و هۆشیاری نەتەوەی کورد دەگەیەنێت، ناو اتای ناسنامەی نەتەوەیی هەڵگرەکەی دەگەیەنێت، وەلێ ئیسلامی سیاسی بەپێی بەرنامەو پیلانێک کاردەکات، لەپێناو ئەوەی ناوە عەرەبیەکان بگەڕێنێتەوە بۆ مناڵی کورد..و لەڕاپەڕین ڕووداوی١١ی سێپتەمەر بەپێی تۆمارەکانی لەدایکبوون و تۆمارەکانی باری شارستانی گۆڕانێکی زۆر لەناوی مناڵانی کورد ڕوویداوەو  دەیان  مناڵی تازە لەدایک بوو ناونراون ئوسامە.١٠٠-١٠١). و"زۆربەی ئەو ناوانەی ئیسلامی سیاسی لەمناڵەکانی خۆیان ناون لەنەوەدەکانی سەدەی ڕابردوو ناوگەلێکی وەک:سوهەیب و موسعەب و خوبەیب و خەباب و ڕەیان و لەو شێوە بوونە.١٠١).سەیرە، لەسەردەمی بەعس و ترس و نەبوونی ئازادیدا،کورد وەکو تەحەدایەک بۆ تەعریب و دوژمن ناوی کوردی بۆمناڵەکانی خۆی هەڵدەبژارد، کەچی  دوای ڕاپەڕین و سەردەمی ئازادی کوردو ئازاد بوونی هەرێمی کوردستان، لەژێر کاریگەری ئایدیۆلژیاو ئەجێنداو وەعزو وتاروخیتابی ئیسلامی سیاسی موتوربەکراو بەتەعریب و لێوان لێو لەبیری عروبە،ناوی عەرەبی لەمناڵەکوردەکانی خۆی دەنێت!بۆیە دەتوانین بڵێین هیچ کەسێک بەقەد ئیسلامی سیاسی زەربەی لە داب و نەریت و کلتوری کوردی نەداوە، ئیسلامیەسیاسیەکان هانی خانەوادەکان دەدەن ناوی مناڵانیان بکەن بەعەرەبی و بەپرۆژەو بەرنامەو پیلان ناومان لەدیاکو و کامەران و گۆران و سیروان و دلێرو دڵدارو بەنازو بەهارو ئاوازودڵخواز و ..تاد.. لەژێر پەردەی پیرۆزی و بەناوی ئایینەوە دەگۆڕن، بۆ ناوی عەرەبی،کە نەپەیوەندیان بەکلتوری کوردەواریەوە هەیەو نە ئایینی ئیسلامیش، ناوگەلێک تەنها خزمەت بە بیری عروبەو ئەجێندا شۆڤێنیەکەی عەرەب دەکات، کە ئەوان ناڕاستەوخۆ جێبەجێکارین و شەڕی بەوەکالەتی بۆ دەکەن و،گومان لەسەر پیرۆزیە نەتەوەییەکانمان درۆست دەکەن و بوۆنەکوردیەکانمان و جەژنی نەتەوەیی نەورۆزمان بەتابۆو حەرام دەکەن،جل و بەرگی ژنانی کورد بە جبەو لیباسی عەرەبی و خەلیجی دەکەن،  داب و نەریتی کوردەواری دەشێوێنن و ڕیسوادەکەن، بەو شێوەیە ناڕاستەوخۆ سیاسەتی بە عەرەبکردنی ناو کلتوورو زمان و بوون و فەرهەنگی کوردیمان پەیڕەو دەکەن،خاڵێکی تر بەڕێز مامۆستا بۆتانی باسی لێوە دەکات، لەمەترسی ئیسلامی سیاسی، لێک جیاکردنەوەی کچ و کوڕە لەناوەندەکانی خوێندن، بەر لەهاتنی ئیسلامی سیاسی و وەهابیزم  بۆکوردستان،لەناو کورد شایی ڕەشبەڵەک ، تێکەڵاوی کچ و کوڕ لەکارکردن و لەتەواوی کایەکانی ژیان.. تاد. هەبووەو شتێکی نۆڕماڵ و ئاسایی بووە، وەلێ ئیسلامی سیاسی دەیانەوێ تەشەنوجات و دووبەرەکی و دەمارگیری لەکۆمەڵ دروستبکەن و حەساسیەت بخەنە نێوانی هەردوک ڕەگەزەوەو کۆمەڵ بەرەو فکری توندڕۆیی و داخران و گەڕانەوە بۆ سەدەکانی ناوەڕست بەرن و دەیان و سەتان و هەزارانیانمان بینی، پیرۆزباییان لەتاڵیبان کردو خۆشحاڵی خۆیان بەهاتنەوەی ئەو گرووپه تونڕۆو تیرۆرستە دەربڕی و تەلەفۆنیان بۆ کردن و پیرۆزباییان لێکردن (ئیحسان مەعەلا علی)و لەقەتەر لەگەڵیان دانیشتن(عەلی قەرداغی)و لەکورستانیش هەمان شێوەی ئەفگانستان وحوکمی تاڵیبان داوای جیاکردنەوەی خوێندنی کچان و کۆڕانیان کرد (شەریف عەلی باپیر) و هەزارانیتریان کە لەسۆشیال میدیا،پشتگیری بڕیاڕە دواکەوتوەکەی تاڵیبان دەکەن لەجیاکردنەوەی کچ و کوڕەکان لەناوەندەکانی خوێندن ! ئیسلامی سیاسی جارێ گەڕەکێکی بەدەستەوە نییە، ئەو داوا نامۆیە دەکەن ، ئەی گەر وڵات بکەوێتە دەستیان دەبێ چ کابولستانێک بخوڵقێنن؟! بۆیە نووسەر پێمان دەڵێت" لەسایەی حوکمی ئیسلامی سیاسی خوێندن دەبێت بە کۆمەڵێک فیکری تۆتالیتاری و مێشکەکانی پێ پڕدەکرێن، و هونەرەجوانەکان لادەبەن و هونەرمەندان لە مومارەسەکردنی ئاواتەکانیان قەدەغەدەکەن.١٢٠).

 

خاڵێکی تر کە بۆتانی ئاماژەی بۆدەکات لەکتێبەیدا، ئاڕاستەی فیکری و ئایدیۆلۆژی ئیسلامیەسیاسیەکان لەبەرامبەر دیموکراسیەت و عەلمانیەت و کۆمەڵی مەدەنی و مافەکانی ژن و هەڵوێستی نەرێنی و نێگەتیڤیان لەهەمبەر ئەو چەمکانەداو بەڕێزیان پێمان دەڵێت" ئیسلامی سیاسی باوەڕی بە دیموکراتیەت و فرەیی نییە.١١٨).و "ئیدعاکانیان بۆ دیموکراتیەت و بەژداریکردن لە هەڵبژاردن و، ڕێکخراوەکانی کۆمەڵی مەدەنی جگە لەدرووشمگەلێکی فریودەرانەی قۆناغێکی دیاریکراو(قۆناغی الضرورات تبيح المحظورات)چیتر نییەو پێویستە وەک تاکتیک هەڵسوکەوت لەگەڵ دۆخەکە بکەن لەپێناو ئەوەی بگەن بەدەسەڵات..و ئیسلامی سیاسی وەک تاکتیک لەو واقعەی دەژین، خۆیان بەو ڕەنگەی دەوروبەرو واقیع و ئەو زروفەی تیدان ڕەنگ دەکەن، نەک وەکو بیروباوەڕو قەناعەت، بەڵکە وەک سودبینینێک و قۆزتنەوەیەک بۆ گەیشتن بە مەبەست و ئامانجەکانیان.١١٦-١١٧)و بەو شێوەیە ئیسلامی دیموکراسیەت تەنها وەک پەیژەیەک و ئامڕازێکی کاتی بۆ گەیشتن بە هەڕەمی دەسەڵات بەکاردێنێت و هەر کەگەیشتن بە دەسەڵات، ئیدی کودەتا بەسەر بنەماکان و چەمک و ڕەهەندەکانی دیموکراسی دا دەکەن و دیموکراسیەت چون بەرخێکی بەستەزمان چوارگۆشە سەردەبڕن
و عەقیدەی سیاسی و ئایدۆلۆژیای ئایینی خۆیان، وەک ئەلتەرناتیفی دیموکراسیەت و پرنسیپەکانی لەدەستورو یاساداجێگیردەکەن و حوکمی ئایینی دەسەپێنن و یاسا مەدەنی و دیموکراتیەکان هەمووی لەپەت هەڵدەواسن!  بەوشێوەیە "بەزیادبوون و بەهێزبوونی پێگەی ئیسلامی سیاسی ئازادییەکان پاشەکشێ دەکەن و لەنێو دەچن، بەهۆی دەستوەردانیان لەهەموو وردو درشتێک و دەستبەسەرداگرتنی ئازادیەکان.١٢٥). بەڕێزیان پێمان دەڵێت "چەندی حیزبی ئیسلامی سیاسی لەکوردستان،بەو پەڕی ئازادی لەگۆڕەپانەکە ، کەخاوەنی چەندین کەناڵی تەلەفزیۆنی لۆکاڵی و ئاسمانی و چەندین ئێزگەو ڕادیۆ و دەیان گۆڤارو ڕژنامەی ئیسلامین ، کاری خۆیان دەکەن و چاڵاکی دەنوێنن و ئیسلامیە سیاسیەهاوفکرو براکانیان لە وڵاتەعەرەبی و ئیسلامیەکان ئیرەییان پێدەبەن، ئایە ئەگەر ئەو ئیسلامیە سیاسیانە هاتوو لێرە جڵەوی حوکمڕانی کەوتەدەستیان(بەهیوام لەخەونیشدا ئەو کابوس و تراژیدیایە نەبینم)، ئایە بەهەمان شێوە مامەڵەی حیزبە دیموکراسی و نەتەوەیی و لیبڕالی و عەلمانیەکان دەکەن و ئەو ئازادی کارکردن و چاڵاکی نواندن و ئەنجامدانی کاری حیزبی و  ڕێکخراوەیی و  جوڵەی مەدەنی و ئازادییان پێدەدەن؟ بەدڵنیاییەوە نەخێر.١٠٧)

 

لەکۆتاییدا، بەڕێز بۆتانی پێمان دەڵێت" ئیسلامی سیاسی هەڕەشەیەکی جدین لەسەرهزری نەتەوەیی، هەست و سۆزی نەتەوەیی و ئاسایشی نەتەوەیی و بزاڤی نەتەوەیی.١٢٠).و "ختورەت و هەڕەشەی ئیسلامی سیاسی هیچی کەمترنییە لەسەر داهاتوو ئایندەی سیاسی کوردستان، لەمەترسی و هەڕەشەی ئەو دەوڵەتانەی خاکی کوردستان دابەشدەکەن و بەبەشێک لەخاکی خۆیانی دەزانن.٩٩).ئەو ئیسلامیەسیاسیانەی " لەدەرفەتێک دەگەڕێن نوخبەی عەلمانی و نەتەوەیی کورد لەدەسەڵات لابەرن و هەموو شتێک قۆرخ بکەن و  دیکتاتۆریەت لەکوردستان، بەناوی ئایینەوە بەرپابکەن.١١٥). بۆیه پێویستە چیتر "ڕێگە نەدەین ئایین، بکەن بە چەکێک و دژمان بەکاری بێنن.١١٢)و"ئاراستەیەکی ئایینی ڕاست و دروست بە پشت بەستوو بە ئینتیمای نەتەوەیی نیشتمانی کەهیچ دژایەتیەکی نییە هەرگیز لەئایین. لەکوردستان برەو پێ بدرێت و پێتڤیە هەست و ڕۆح و وئینتیمای نەتەوەیی ،لای تاکی کورد بەهێزکەین و وا لەتاکی کورد بکەین"کە بیربکاتەوە پێشئەوەی هەر شتێکیتربێت ئەو کوردە.١٢٥)و لەلایان ئیسلامی سیاسیەوە چیتر" ویژدانی ئایینی و هەست و سۆزی ئایینی تاکی کورد نەقۆزرێتەوەو، بیانخەنە ژێر کاریگەری خۆیان و لەدەرەنجامدا بیانگۆڕن و بیانکەن بە دوژمنی گەل و نەتەوەکەی خۆیان و بیانکەن بەکوسپ و تەگەرەو ڕێگر لەبەردەم ڕێگای بزاڤی نەتەوەیی.١٢٧)و ببن بە سوارەی حەمیدی..!

نوێترین


کاریکاتێر

وێنەهەواڵ

© 2016 Dwryan.net. All Rights Reserved.