سەرەتا/ لەبارەی دابڕان/ پەیوەندی/

فێمێنیزم وەك رەوتێكی مرۆیی

20/11/2021



كنێر عەبدوڵا

لەگەڵ بوونی قوتابخانەی جیاوازی فێمێنیزمی و تێڕوانینی هەمەجۆر لەو بارەیەوە، بەڵام بەگشتی دوو رەوتی جیاواز بەدیدەكرێت لەو بارەیەوە، هەندێكی لەگەڵ بوونی بزوتنەوەی فێمێنیزمین بۆ بەدەستهێنانی مافەكانی ژنان و هەندێكی دیكە دژ بەچەمكی فیمینیزمن لەو روانگەیەی دەوترێت دژ بە پیاوانە و دەسەڵاتەكانی دەخاتە ژێر مەترسی و هەڕەشەوە، لە راستیدا فیمینیزم بزوتنەوەیەكی كۆمەڵایەتییە و پەیوەستە بە گشت بوارەكانی تری سیاسی، ئابوری، یاسایی و كەلتورییەوە بەهۆی ئەو جیاكاریی و جیاوازی و ناباڵانسییەوە دێتە ئاراوە كە دەرهەق بە ژنان دەكرێت لە هەر پێگەو شوێنێكی كاركردندا بن، بێگومان ئەوەش گرێدراوی ئەو كەلتور و دابونەریتە پەروەردەییەی كۆمەڵە كە بەهۆی چەندین فاكتەری جۆربەجۆرەوە بۆتە رەفتار و شێوازی ژیانی مرۆڤەكان و رەنگدانەوەی هەیە لە ژیانی رۆژانەیاندا.

لە واقیعدا ئامانجی فێمێنیزم بۆ لاوازكردن و سەندنەوەی دەسەڵاتی پیاو و زاڵێتی دەسەڵاتی ژن نییە، بەڵكو بۆ گەڕانەوەی شكۆ و پاراستنی كەرامەتی مرۆڤەكانە بێ جیاوازی رەگەزیی، ئاینیی، ئایدۆلۆجی و شوێنی جوگرافی و هتد، بۆ نەهێشتنی چەوساندنەوە، زاڵێتی، سەپاندن، ژێردەستەیی و چەپاندنی رەگەزێكە بەرامبەر ئەویدیكە، بۆ سەیركردن و مامەڵكردنە لەگەڵ ژناندا، وەك مرۆڤ، نەك كورتكردنەوەی لە جەستە و سێكس و رازاندنەوە ‌و بوكەڵەبوونی، سەیركردنێتی، وەك لایەنی هزریی و عەقڵ و فكر، نەك تەنها رواڵەت و رووخسار، یەكسانبوونی مرۆڤەكانە لە ئەرك و ماف، بەشداربوونیانە لە بڕیاردان و چارەنووسی خۆیان لە ژیاندا، ئازادبوونی مرۆڤەكانە لە كۆت و بەند و هێڵەسوورەكانی بەهۆی كەلتورو دابونەریتەوە دادەنرێت، وێناكردنیانە بەپێی بەها باڵاكان و مافەكانی مرۆڤ، هەموو ئەمانە و چەندینی ترە كە وایكردوە بزووتنەوەی فێمێنیزمی بوونی هەبێت و خەبات بكرێت، لەپێناو هێنانەدی ئامانجەكانی كە گشتگیرە و لە خزمەتی مرۆڤدایە بێ جیاوازی.

بێگومان كاركردن بۆ ئەوەش بە هۆشیاری تاكەكانەوە بەندە، بە بوونی خودناسی كەسەكان دێتە ئاراوە ‌و بە سیستەمێكی حوكمڕانی دیموكراسی و مەدەنی سەرچاوە دەگرێت، هۆشیارییەكی كۆمەڵایەتی ئەوتۆ كە گۆڕینی كەلتوریی بهێنێتە ئاراوە و دواتر كار بۆ گۆڕینی یاساكان و بواری هزری تاكەكان بكات و ئیدی درێژەی هەبێت بۆ سەربەخۆیی و ئازادی ژنان و داماڵینی لە وابەستەبوون و پاشكۆیەتی و بەندێتی، بێگومان ئەم خەباتەش درێژخایەنە ‌و بەردەوامییەتی دەبێت ‌و تەنها ئەركی ژنان نییە بەتەنها و هەروەك چۆن تەنها بۆ ژنانیش نییە، بەڵكو گشتگیر و فرەبوار و لایەنە، چونكە هەروەك چۆن بوونی پەروەردەی جیاوازی نێوان رەگەزەكان وایكردوە عەقڵیەتی پیاوسالاری زاڵ بێت بەسەر هەردوو رەگەزەكەدا و دەرئەنجام كاریگەری نەرێنیشی تەنها بۆ خودی ژنان نییە، بەڵكو وایكردوە پیاوانیش لە مرۆڤبوون داماڵێت، بەشێوەیەك ئەوەندەی وەك پیاو رۆڵ دەگێڕێت نەیتوانیبێت وەك مرۆڤ مامەڵە بكات، بۆیە چۆن ژن پێویستە ئاشنا بێت بەخۆی و خۆی بناسێت و پێناسەی خۆی بكاتەوە، وەك مرۆڤ، ئەوەندەش پێویستە پیاو خۆی داماڵێت لە پیاوێتی و لەناو خۆیدا بیسڕێتەوە و بتوانێت بگەڕێتەوە بۆ دۆخی راستەقینەی وەك مرۆڤ.

نوێترین


کاریکاتێر

وێنەهەواڵ

© 2016 Dwryan.net. All Rights Reserved.