سەرەتا/ لەبارەی دابڕان/ پەیوەندی/

تاڵیبان 100 پۆلیسی ئەفغانی بێسەروشوێن كردووە

02/12/2021


چاودێری مافەكانی مرۆڤ ڕایدەگەیەنێت، كە لەو كاتەوەی تاڵیبان لە ئەفغانستان دەسەڵاتی گرتووەتەوە دەست زیاتر لە 100 پۆلیس و كارمەندی ئاسایشی حكومەتی پێشووی كووشتووە، یان ڕفاندووە.

لە راپۆرتی ئەو ڕێكخراوەدا ئاماژە بەوە دراوە، لە كاتێكدا تاڵیبان لێبوردنی گشتی دەركردووە، بەڵام بەڵگە سەلمێنراوەكان ئاماژە بەوە دەكەن، كە تاڵیبان 47 ئەندامی هێزە سەربازییەكان، پۆلیس و هێزە ئاسایشییەكانی لە 15ی 8وە تا كۆتایی مانگی 10 كوشتووە.

لەم ڕاپۆرتە 25 لاپەڕەییەدا ئاماژە بەوش دراوە كە ژمارەی كووژراو و بێسەروشوێنكراوەكان لە غەزنی، هەلمەند، قەندەهار و كوندوز لە ئەفغانستان بە تەنیایی زیاتر لە 100 كەسە.

ڕێكخراوەكە لە زمانی فەرماندەیەكی تاڵیبانەوە بڵاویكردووەتەوە، ئەو كەسانەی لە هێزە سەربازی و ئاسایشییەكانی پێشوو كە تاوانیان ئەنجامداوە، لێبوردن نایانگرێتەوە.

لەسەر بنەمای ئەو ڕێكخراوەی مافەكانی مرۆڤ، تاڵیبان لە هەڵمەتەكانی پشكنین و هێرشە شەوانەییەكانیدا بەرپرسانی پێشووی دەستگیر و بێ سەروشوێن كردووە.

پاتریكا گاسمەن بەڕێوەبەری بەشی ئاسیای چاودێری مافەكانی مرۆڤ وتویەتی "ڕاگەیاندنی لێبوردنی گشتی ڕابەرانی تاڵیبان ڕێگر نەبووە لە لەسێدارەدان و بێ سەروشوێن كردنی هێزە ئاسایشییەكانی حكومەتی پێشوی ئەفغانستان. بەرپرسیارێتی ئەو كارە لە ئەستۆی تاڵیبانە بۆ ئەوەی ڕێگە لە كوشتاری زیاتر بگرێت و بكەران سزا بدات و قەرەبووی خێزانە زیانلێكەوتووەكان بكاتەوە".

ئەنعاموڵا سمنگانی جێگری وتەبێژی تاڵیبان پێشتر ڕایگەیاندبوو، لەوانەیە ژمارەیەك چەكداری تاڵیبان یاساكانیان پێشێل كردبێت، بەڵام كوشتن و بێ سەروشوێن كردنی ئەندامانی پێشووی هێزە ئاسایشییەكان كاری ئەوان نییە.

ناوبراو جەختی كردووەتەوە لەسەر ئەوەی كە حكومەتی تاڵیبان بە شێوەیەكی جدی لەم ڕوداوانە دەكۆڵێتەوە و بكەران دادگایی دەكرێن و وتویەتی "ئێمە پابەندی لێبوردنە گشتیەكەین. ئێمە هێشتا دەزگای ئاسایشمانی نییە و هەندێك سوود لەو بۆشاییە و ناوی ئیمارەتی ئیسلامی وەردەگرن و ئەو تاوانی كوشتنانە ئەنجامدەدەن".

نوێترین


کاریکاتێر

وێنەهەواڵ

© 2016 Dwryan.net. All Rights Reserved.