سەرەتا/ لەبارەی دابڕان/ پەیوەندی/

جەنگی ڕەشەكوژیی دەسەڵات، لە نێوان برا موسوڵمانەكاندا

07/02/2022



دكتۆر حوسێن موحەممەد عەزیز

بەشی چوارەم و كۆتایی

ئەنجام

لە كۆتایی وتارەكەدا، (ئەبوسەمەر) نووسیوێتی:


لە ئەنجامی ئەو باسەی پێشكەشكرا، ئەوەمان بۆ دەردەكەوێ: پیاوكوژەكان و كوژراوەكان هەردوولایان، لەپێناوی كورسی دەسەڵات و جێنشینیی دەوڵەتی ئیسلامییدا، یەكدییان كەلەپاچە كردووە. بەڵام پیاوكوژەكان، بە ناوی (ئەڵڵاهو ئەكبەر)ەوه،‌ خەڵكیان دەكوشت. كوژراوەكانیش، بە دەم ئازاری تاڵاوی مەرگەوه، شایەتمانیان دەهێنا!

ئەمە زنجیرە درامایەكی زۆر كۆنە، ترسناك و تۆقێنەرە، ڕەگی قووڵی مێژوویی خۆی هەیە. بەڵام ئێمە مێژوو ناخوێنینەوە و پەندی لێ وەرناگرین، تەنیا هەر ئەوانە دەخوێنینەوە و پەندیان لێ وەردەگرین، كە دەمانەوێ و پێویستمانە!)

چەن باسێكی سەردەم، لەبەر ڕۆشنایی وتارەكەی نووسەردا

یەكەم: كێشەی كورد و عەرەبە موسڵمانەكان


ئاشكرایە، لە ئەو ڕۆژەوە، پەروەردگاری مەزن، تیرە و هۆزەكانی عەرەبی ئەفراندووە، پێش ئەوەی موسوڵمانبن و دوای ئەوەی موسوڵمانیشبوون، هەمیشه لە نێوخۆدا ناكۆك و پەرتپەرت بوون، دەسیان بە خوێنی یەكدی و گەلانی نێوچەكە سووربووە، هەر خەریكی جەنگ و ئەنفالكردنی سەروماڵی یەكدی و گەلانی دوور و نزیك بوون، تاڵانوبڕۆ پیشەیانبووە، دەسیان‌ بۆ ئابڕووی ئافرەتانی عەرەب، ناعەرەب، موسوڵمان و ناموسوڵمان درێژكردووە، هەرگیز بە هێمنیی و ئاشتیی نەژیاون.

هێندێ لە مەلا موسوڵمانە عەرەب و كوردەكان، گوتاردەدەن و فەتوادەردەكەن، گوایە (داعش)، لە ئەم سەردەمەدا درووستبووە و هیچ پێوەندییەكی بە ئایینی ئیسلامەوە نییه، ئەمەش خۆهەڵخەلەتاندن و گەوجاندنی خەڵك نەبێ، هیچی دیكە نییە‌!

لە ڕاستیدا،‌ (داعش) نەوەی ئەو پیاوكوژانەن، درێژە بە ئەو تراژیدیا و ڕە‌شەكوژییانەی موسوڵمانە پێشینەكان دەدەن. بەڵێ (داعش) موسوڵمانی ڕاستەقینەن، چونكه لەسەر دەقەكانی هەمان قورعان، فەرموودەكانی پەیامبەر، فەتوای هێندێ لە پێشەوایانی ئیسلام دەڕۆن و بە موو لایان نەداوه. ئایا ئەمانیش وەك ئەوان، مل نا‌پەڕێنن، مرۆ بە زیندوویی نا‌نێژن، ماڵی خەڵك تاڵان نا‌كەن، بە هەزاران ئافرەت نافڕێنن و دەسیان لەگەڵ تێكەڵ ناكەن؟!‌!‌ ئاخر هەمووی (7-8) ساڵ لەمەوبەربوو، ڕێكخراوی توندڕەوی (داعش)، شارۆچكەی (شەنگار)ی كوردیان داگیركرد، بە هەزاران مرۆیان كوشت، بە هەزاران ئافرەتی (ئێزدی)یان ڕفاند، وەك كەنیزەك شەوانیان لەگەڵ ڕۆژدەكردنەوە و پاشان دەیانفرۆشتن. [دوای ئەوەی (ڕێخكراوی تیرۆریستیی داعش)، شاری (موسڵ)ی داگیركرد، ڕۆژی (3. 8. 2014)، پەلاماری شارۆچكەی (شەنگال)ی دا و داگیریكرد. لە ماوەی (2) ڕۆژدا، (293. 1) كەس ڕەوانیان شادبوو، (417. 6) ژن و پیاو و مناڵیشیان ڕفاند.] **

بەڵی دەقەكانی قورعان، فەرموودەكانی پەیامبەر و فەتوای مەلاكانی ئیسلام، لە هەموو شوێن و سەردەمێكدا، هەلیان بۆ ئەو ڕەشەكوژییانە ڕەخساندووە، بۆیە تا ئایینی ئیسلام مابێ و لە هەر شوێنێ گرووپە توندڕەوەكان، دەسەڵاتیان هەبێ، ئەو كارە نامرۆییانە، هەر دووبارەدەبنەوە!

دووەم: كێشەی كورد و تووركە موسوڵمانەكان

به ‌هەمان شێوەی عەرەبە‌ موسوڵمانەكان،‌ موسوڵمانە مەگۆلەكانی ئیمپراتۆتریای (عوسمانیی) و دەوڵەتی (تووركیا)ی نوێ ڕەفتاریانكردووە. چونكە گەر ساڵی (1938)، سەرانی دەوڵەتی داگیركەری (تووركیا)، گەورەترین ڕەشەكوژیی كوردانی (دەرسیم)یان كردبێ، ئەوا ئێستەش ڕۆژانه، سەركردەكانی فاشیزمی ئیسلامیی (AKP)، وەك باپیرە گەورەكانیان، لە خۆراوا و باكووری (كوردستان)،‌ كوڕی كورد دەكوژن، بە نوێترین چەك، هەمان ڕەشەكوژیی دووبارەدەكەنە‌وە، بێ ئەوەی سڵ لە كەس بكەن‌ و كەسیش لەسەر كورد هەڵباتێ! 

ئاخر ئیمپراتۆریای مەگۆلە ئیسلامییەكانی (عوسمانیی)، نزیكەی (700) ساڵ فەرمانڕەوایی نێوچەكەیان كردووە‌، جگە له داگیركردنی وڵاتان،‌ تاڵانیی و كوشتنوبڕین، چ یاد و بیرەوەرییەكی جوانیان، بۆ گەلانی نێوچەكە و جیهان بەجێهێشتووە؟! كامەیە ئەو داهێنان و كارە زانستانانەیە‌ی كردوویانە؟!

پێم وایە، تووركە مەگۆلەكان، پێش هەموو شتێ، بیریان لە بەرژەوەندیی تایبەتیی و دەسەڵاتی بنەماڵەكانی خۆیان كردووەتەوە، ئایینی ئیسلامیشیان، وەك دێوجامەیەك بەكارهێناوە، ڕاوی هەست و هۆش، بیر و باوەڕی گەلانی بندەسیان پێ كردووە، تا بیر لە سەربەخۆیی و سەربەستیی نەكەنەوە. خۆشیان خۆشترین ژیانیان بەسەربردووە و زۆر بە تەنگ ئەركە ئایینییەكانیشەوە نەبوون. چونكە هێندەی من بزانم، هیچ جێنشین و سوڵتانێكی (عوسمانیی) نەبووە، حەجێكی كردبێ!

پێم وایە، باری ڕامیاریی و دەسەڵاتی كاربەدەسانی (تووركیا)، هەر وەك خۆی دەمێنێتەوە و هیچ گۆڕانكارییەكی چاوەڕوانكراوی بەسەردا نایە، گەرچی دەسەڵاتیش بگۆڕێ. چونكە ئەم دیكتاتۆر دەڕوا و دیكتاتۆرێكی دیكەی ڕەگەزپەرست و شۆڤێنی دێ، هەر ئەوەش دید و بۆچوونیان دەبێ، چونكە توورك بیری شۆڤێنیی و مەزنخوازیی، توندوتیژیی و ڕەشەكوژییان، بە شیرەوە خواردووە و لەگەڵ ئاییندا تێكەڵاویانكردووە!

ئەوڕۆ نموونەی ئەو عەرەب ‌و مەگۆلە‌ موسوڵمانانە، زۆر بە ئاشكرا، بە چاوی خۆمان دەبینین، چۆن لە هەموو دابونەریت، یاسا و ڕێسایەكی مرۆیی و نێودەوڵەتی لایانداوە، لەپێناوی بەرژەوەندییە تایبەتییەكانی خۆیاندا، دەس لە كاروباری نێوخۆی گەلان و دەوڵەتەكانی نێوچەكە وەردەدەن، مافە ڕەواكانی گەلە بەشخوراو و بندەسەكان پێشێلدەكەن. لەبەرئەوە باوەڕناكەم، لە مێژووی كۆن و نوێی دەسەڵاتدارانی نێوچەكەدا، لە ئەو موسوڵمانە عەرەب و مەگۆلە دواكەتووە ئەنفالچییانە، دڕندەتر و خوێنڕێژتر هەبووبێ و هەشبێ! 

سێێەم: كێشەی كورد و سەركردایەتی پارتەكان

بە داخەوە، سەركردایەتی پارتەكانی باشوور، لەبری ئەوەی لەنێوخۆدا، ڕێك و تەبا بن، داكۆكی لە خاكی (كوردستان) بكەن، هەموو كار و پیشەیەكیان ئەوەیە، چۆن ملی یەكدی بشكێنن، زۆرترین پۆستیان لە پەرلەمان و میریی (عیراق)دا دەسكەوێ! ئەوە جگە لە ئەوەی، نیشتمانەكەمان بە خراپترین شێوە و بە ئاشكرا، بەعەرەبدەكرێ و تووركەكانیش، خۆیان بە خاوەن ماڵ دەزانن، كەچی سەركردایەتی پارتەكانیش، مێش میوانیان نییە!

ئاخر ئەو عەرەبانەی، لە (عێراق)ی عەرەبییەوە، لە ترساندا هەڵهاتوون و لە وڵاتە كاولبووكەی خۆیاندا جێیان نابێتەوە، ڕوویان لە شار و شارۆچكەكانی باشووری (كوردستان) كردووە، پارەیەكی زۆریان هەیە، دووكان و بازاڕیان داناوە، باخ و خانووبەرەیان كڕیوە و لە كوردیش باشتر دەژین، هیچ یاسایەكیش نییە، بەر بە ئەو شاڵاوە داگیركارانەیە بگرێ!

ئەمە چیرۆكی كۆچوڕەوی جووەكانم بیردێنێتەوە. چونكە لە دوای یەكەمین جەنگی جیهانەوە، سەرەتا جووەكان وردەوردە، لە هەموو جیهانەوە بۆ خاكی (فلەستین) گەڕانەوە، زەوی و خانووبەرەیان لە عەرەبەكان دەكڕی، تا وردەوردە جێگیربوون و ژمارەیان زیادیكرد، لە ئەنجامیشدا عەرەبەكان هەڵاتن و جووەكانیش، دەوڵەتی (ئیسرایل)یان دامەزراند! ئاخر شار و شارۆچكە بەعەرەبكراوەكانی (كوردستان)، چ لە كۆندا و چ ئێستە، هەر بە ئەو شێوەیە بەعەرەبكراون. كەچی سەركردایەتی (پارتی) و (یەكێتی)، هەر لەسەر بەرنامەی (عێراقی نوێ) و (عێراقی هیوا و ئاشتیی) بەڕێوەدەڕۆن. ڕاستیان فەرمووە: تا خوا كێو نەبینێ، بەفری تێ ناكا!

سەیر ئەوەیە، فڕۆكە جەنگییەكانی دەوڵەتی داگیركەری (تووركیا)، چەندین ساڵ دەبێ، نێوچە جیاجیاكانی باشووری (كوردستان) بۆمباراندەكەن، خەڵكێكی زۆر ڕەوانیانشاد و بریندار بوون، لە زێدی خۆیان هەڵكەندراون، تەنانەت بە ئارەزووی خۆیان و بێ ترس، دارستانەكان دەبڕنەوە و دارەكان دەدزن، كەچی نەك هەر دەنگی ناڕەزایی، لە هیچ لایەكەوە بەرزنابێتەوە، بەڵكوو لێپرسراوانی پارتەكان و میریی هەرێم، تا ئیستەش پێوەندییەكی باشیان، لەگەڵ سەرانی ئەو دەوڵەتە داگیركەرەدا هەیە!     

چوارەم: مەلا كوردەكان و ئیسلامی ڕامیاریی

كەچی تازە مەلا موسوڵمانە كوردەكان، ڕۆڵەكانی ئەم گەلە هەژارە بندەسە خاك داگیر و دابەشكراوە، بە قسەی پڕوپووچ هەڵدەخەڵەتێنن، پشت لە نەتەوە و نیشتمانەكەی خۆیان دەكەن، لاساییەكی بێ تامی عەرەبه موسوڵمانە داگیركەرەكان دەكەنەوە، بە شانوبازووی سەرانی عەرەب و تووركە مەگۆله داگیركەر و خوێنڕێژە‌كاندا هەڵدەدەن، شانازیی بە ئەو مێژووە خوێناویی و داگیركارە قێزەونانەوە دەكەن! 

مەلا كوردەكان بە گشتیی و ئیسلامی ڕامیاریی بە تایبەتی، هەرگیز باسی زۆرداریی و كەموكوڕییەكانی ئایینەكە و دەسەڵاتدارانی ناكەن، بەڵكوو ڕوخسارە دزێوەكانی دەڕازێننەوە و جوانی دەكەن، چونكە هەم جەسارەتی ئەوەیان نییە، ڕاستییەكان بۆ خەڵك باسكەن، لەبەرئەوەی سوور دەزانن، خەڵك لێیان دەتەكێتەوە. هەم وا دەزانن، گوناحە گەر بە خراپە، باسی ئەو جێنشین و سوڵتانە خوێنرێژ و داوێنپیسانە بكەن.

لە كۆتاییشدا دەڵیم:

ڕەنگە ئێستەش، هێندێ موسوڵمانی كوردی جاشبیر هەبن، (فاتحە) بۆ گیانی پۆخڵی ئەو سەرە بۆگەنانە بنێرن، كه لەپێناوی كورسی دەسەڵات و خۆشیی ژیانی خۆیاندا،‌ لایەكی موسوڵمانانی ئەو سەردەمانەیان قڕكردووە!

نەفرەتی خوا لە هەموو ئەو دەسەڵاتدارە داگیركەرانەی عەرەب و توورك بێ، كە لەپێناوی دەسەڵات و بە ناوی ئایینەوە، بە نووكی شمشێرە دووفاقە تیژەكانیان، ورگی یەكدیان هەڵدڕی!

نەفرەتی خوا لە هەموو داگیركەرانی گەلانی جیهان بە گشتیی و داگیركەرانی (كوردستان) بە تایبەتی بێ، كە دان بە مافە ڕەواكانیاندا نانین و بە هەر ناوێكەوە بێ، بە خراپترین شێوە دەیانچەوسێننەوە!

نەفرەتی خوا لە هەموو ئەو موسوڵمانە كوردانە بێ، كه بە ناوی ئایینەوە،‌ ڕۆڵەی ساویلكەی كورد هەڵدەخەڵەتێنن، هاودەنگ و چەكدار بۆ (داعش) و فاشییە گوورگە بۆرەكانی (تووركیا) پەیدادەكەن، دژی نەتەوە و نیشتمانەكەی خۆیان هانیاندەدەن!

* ابوسمر، حقًـاً هـذا هو تأريخنـا؟! صفحات سوداء من تأريخنـا الإسلامي. بەڵام ناونیشانی گوتارهكە بە كوردیی، خۆم هەڵمبژاردووە.

** پرس میدیاو داڕشتنەوەی: رەوەز سەڵاح.

 

بەشی یەكەم   جه‌نگی ڕه‌شه‌کوژیی ده‌سه‌ڵات، له‌نێوان برا موسوڵمانه‌کاندا

بەشی دووەم  جەنگی ڕەشەكوژیی دەسەڵات، لەنێوان برا موسوڵمانەكاندا

بەشی سێیەم  جەنگی ڕەشەكوژیی دەسەڵات، لەنێوان برا موسوڵمانەكاندا

نوێترین


کاریکاتێر

وێنەهەواڵ

© 2016 Dwryan.net. All Rights Reserved.