ئەژین عەبدولخالق
کێشەکە لەوە قوڵترە کە دەبینرێ، نە دەسەڵات و نە مەلا و نە دایک و نە پیاو و نە هیچ یەکێ لە ئێمە بێ تاوان نییە. کۆمەڵگای کوردی لەسەر بنەمای هەرەوەزی و یەکخانەوادەیی دروست بووە. واتا هەموومان لە پێناو یەکێک و یەکێ لە پێناو هەمووان. واتا تاکگەرایی و ئازادی خودی تا ئێستا وجودی نییە. "من" لە کۆمەڵگای کوردی نییە و دروست نەبووە، "ئێمە" هەیە.
ئێمەی حزب، ئێمەی خانەوادە، ئێمەی مەلا، ئێمەی لیژنەی فتوا.... لەم جۆرە کۆمەڵگایانە کە هێشتا خێڵێکە و کۆمەڵێکە، "تاک" من دروست نەبووە. لە هەر شوێنێکیش "ماریا "ێک دروست بێ نامۆ و نا دروست دێتە بەرچاو و دیسانەوە بە جێگای "من" ئێمە بڕیار دەدات و ڕەجمی دەکا یان فتوای کوشتنی بۆ دەردەکات. مادام "من" وجودی نییە و "ئێمە" هەیە بەم شێوەیە هەموومان ئاگامان لە ناو ماڵ و حاڵی ئەویترە، هەموومان چاودێری شەڕەفی یەکتر دەکەین، هەموومان لە خۆمانەوە شانازی بە سەرکەوتنی ئەویتر دەکەین.
کە مناڵ بووم بە حیساب لە گەڕەکێکی ڕاقی هەولێر دەژیاین،بەڵام دراوسێکان بۆیان هەبوو داتکاری منداڵی یەکتر بکەن، گەر هەڵەی لێ ببینێ.
لە هەرچی مەکتەبی ئەهلی و حکومی هەیە، مامۆستا بۆی هەیە لە مەعریفە و بابەتەکەی خۆی دوورکەوێتەوەو ڕۆڵی مەلاێک ببێنێ و باسی دۆزەخ و نوێژ و بەهەشتت بۆ بکا، بێ ئەوەی گوێ لە بۆچوون و عەقیدەی تۆی تاک بگرێ. یان مامۆستاێک لە خۆیەوە ڕۆڵی دایکت دەبینێ و گوێت ڕادەکێشێ.
کورد بەقەد نێوانی ئەرز و ئاسمان لە چەمکی تاکگەراییەوە دوورە. کەس خاوەنی خۆی نییە، هەمووشتێ خاوەنی کۆمەڵێک کەسە. هەمانە بە چاوی دایکی دونیا دەبینێ و بەزمانی باپیری قسەدەکاو بە عەقڵی دراوسێکەی بیردەکاتەوە.
کەس بەرپرسیارێتی ناوی خۆی هەڵناگرێ، چونکە ئێمە هێشتا وەک تاک نابینرێین لە چاوی هیچ یەکێکیتر. من خانەوادەکەم پێناسەم دەکا کێم. من بەرپرسیارێتی خانەوادەو،خێڵێکم لە ئەستۆیە. تۆ بە ناوی خانەوادەکەتەوە ژنت پێدەدەن، تۆ دەبیتە دکتۆر و خۆت نا خانەوادەکەت شانازیت پێوەدەکەن، هەموو هەڵەیەکت ئەوان شەرمەزار دەکات و تەنانەت زۆرجار دەگاتە قۆناغی حاشالێکردنییش.
یەکخانەوادەیی لە نێو کورددا، نەک تەنیا ژنکوژی و کۆمەڵگایەكی تاسەر ئێسقان سۆسیال و خێڵەکی لێدەرچووە، بگرە ئەمە دەسەڵاتیشی گرتۆتەوە و دەسەڵاتی کوردی تا ئێستا لە حوکمی خانەوادە دەرناچێ. تەنانەت ڕۆشنبیری کوردی لە نێو پاشگری ناوی خانەوادە بەهێزتر دەبینرێ و دەخولێتەوە.
ئەم یەکخانەوادەییەی کورد بە جۆرێک قوڵبۆتەوە گەر جون لوک زیندووبێتەوەو سەر لەنوێ چەمکی لیبڕالیزم بۆ کۆمەڵگای کوردی دابڕێژێتەوە، کاریگەری نابێ و فەشەل دێنێ، چونکە کەس ناتوانێ ئاسان لە خانەوادە دەرچێ. هەمووی خزم و هاوڕێ و دراوسێی یەکترە، هەر هیچ نەبێ هاوڕێی سۆشیال میدیایین.
گەنج هەیە لە زانکۆ دەخووێنێ، کەچێ نابێت بە خوێندکارێکی تاک و لە ژێر ناوی خۆی ناخوێنێ، بگرە لە ناو پۆلدا جامانەکەی باپیری و حەیرانەکانی خاڵی و دەسترۆکەکەی نەنکی پێیە، چوار ساڵ دێت و دەڕوا ئەم گەنجە سەرما و گەرما دەکێشێ و ئەم چوارچێوە خێزانییە تێپەڕناکات.
هەرزەکار هەیە تەمەنی پازدە ساڵە و لەسەر شەقامەکان دەبینرێ، زمانی هی مامێتی، چاوی هی باوکێتی، نیگا و تەماشاکردنی بۆ دونیا و بۆ ژن هی باپیرەێتی.
کەسایەتی تاکی کورد کەسایەتیێکی دەستە جەمعییە، موڵکدارێتی تاپۆکراوە لەلایەن خانەوادەوە بگرە زۆرجار لەلایەن گەڕەک و خێڵەوە.
"لە نێو ئەو ئەوروپایەدا کوڕێکی کورد کچێکی کورد لە نێو باڕێک ببینێ هەستدەکا شەرەفی کەوتۆتە مەترسی، بێ ئەوەی بیناسێ تەنیا لەسەر ئەساسی ئەوەی ئەو کچە کوردە و ئیتر بە مولک و شەرەفی خۆی دەزانێ" پێم وا نییە کەس بێ بەری بێ. هەموومان پشکمان هەیە لە دروستنەبوونی فەزاێکی ئازاد. مەلا پێم دەڵێ چۆن بژیم، چۆن بخۆم، چۆن بڕۆم چی لەبەربکەم.
باوک پێتدەڵێ چۆن پێبکەنی، کێ بناسی و ببیت بە چی.
دایک پێتدەڵێ خزمەکانت چۆن دەتبینن و چۆن دەتخوێننەوە و دراوسێکانت چیت لەبارەوە دەڵێن.
بەڕاستی هێندە لە نێو یەکین، کەس چاوی لەسەر ژیانی خۆی نییە، هەمووی چاوی لەسەر ژیانی ئەویترە.
هەمانە پێیوایە زۆر ئازاد بیردەکاتەوە، بەڵام بیری دەچێ ڕۆژێ دە جار کچە مۆدێلێکی داماوی سەرلێشێواو دەشکێنێ و بە قسە دەیکوژێ.
هەمانە دەنوسێ سەدجار بنوسە اللە خودا دەرگەی بەهەشتت بۆ دەکاتەوە، هەر پێنج دەقە دواتر بە جنێو بە یەکێ دەدات و دەرگای دۆزەخەکەی بەڕوودا دەکاتەوە.
هەمانە بووە بە سکرتێری خوداو محاسەبەی هاوڕەگەز و ژن و منداڵ و زانست و مەعریفەت بۆ دەکات، بێ ئەوەی سەریشی لە هیچی دەربچێ.
هەمانە شەو و ڕۆژ کۆمێنتی ناشیرین دەنوسێ و بە عەقڵی خۆی پێیوایە شەڕەفی کورد بەرزدەکاتەوە و مناڵی خەڵک تەمێ دەکات لە نێو سۆسیال میدیا.
ئێمە پێکەنین، جوانیی، کەسایەتی، کتێب، نووسین، چالاکی، ماندووبوون، هەموو شتێکی یەکتر ڕۆژی دەجار دەسڕینەوەو تیرۆری دەکەین.
چونکە زۆر لە ناو یەکین، سەر و قاچمان لێکئاڵاوە کەس خۆی پێ دەرباز ناکرێ. پێموا نییە هیچ تاکێکی کوردی بە تەواوی کەوتبێتە نێو چوارچێوەی ئەو دێرە" ئازادی من لەوێدا کۆتایی دێ، کە پێشێلی ئازادی کەسێکیتر دەکەم "