سەرەتا/ لەبارەی دابڕان/ پەیوەندی/

عەبدول لەتیف سەلەفی لەسەر مەنعی تەبیعی و لەولەب و خەلەلی جینەتیكیش قسەی خۆی كرد

27/03/2022


 

 

بابان حەمە 


ئیدی تۆ حەز ئەكەی پرسیاری فیزیای كوانتەم و ئەتۆم و چەكی هایدرۆجینی و دیئێنئەی و ئیڤۆڵوشن-ی لێ بكە، ئەو هەر ئامادەیی تێدایە وەڵام بداتەوە..


ئەوەی لەم پەیوەندییە تەلەفۆنییەی خاتوونێك و بانگخوازێك بەناوی (مەلا عەبدول لەتیف سەلەفی)دا دەبینرێت و دەبیسترێت، خاتوونێكە پرسیاری ئەوە دەكات، ئایا ڕێگری لە خستەوەی منداڵ حەرامە یان حەڵاڵە؟ بەواتایەكی تر وەك خاتوونەكە دەپرسێت (دروستە یان نادروستە)؟..

 جەنابیان فەرموودەیەك دێننەوە، (ئەگەر دیقەتیش بدەن فەرمودەكەش بە هەڵەو پاش و پێشخستنەوە دەخوێنێت!) ئەو فەرمودەیەی كە ئێمە لێرەدا راستەكەی دادەنێین كە تێیدا هاتووە (تزوجوا الودود الولود؛ فإنی مكاپر بكم اڵامم)..


دواتر عەبدول لەتیف سەلەفی ئەم ڕستانە دەڵێت:
1/ دروست نییە ڕێگری منداڵبوون بكرێت.. بڕۆ خۆتی! تا ئەكرێ منداڵ بخەرەوە..
2/ ئەگەر دایكێك یەك منداڵی هەبوو، كچەكەی مەخوازە  یان خوشكەكەی مەخوازە! (چونكە بەو ماناو لێكدانەوەیە بێت خەلەلی جینەتیكی هەیە)!
 
بۆیە ئێمە واز لە هەموو كۆی قسەو باسەكانی تری ئەم مەلا سەلەفییە دەهێنین، تەنها لەسەر ئەو دوو خاڵەی سەرەوە هەڵوەستەیەك دەكەین و بە زانست و لۆژیك وەڵام دەدەینەوە:

خاڵی یەكەم: كە دەڵێت (دروست نییە ڕێگری منداڵبوون بكرێت.. تا پێت ئەكرێ منداڵ بخەرەوە!) .. قوربان جەنابتان ئەگەر لە وڵاتێكی وەك (چین) هاوسەرگیرییەكی نوێ ئەنجامبدەن (وەلەو جەنابتان چوار هاوسەرتان هەیەو ژمارە ڕێگەپێدراوەكەش لە شەرعدا قەپات بووە و ناتوانیت) .. ئەمە تەنها وەك گریمانە باس دەكەین! ..ئەگەر گریمان شتێكی وا ببێ! ئەو وڵاتە ڕێگەت پێنادات لە ناوپارێزگا و شارە جەنجاڵەكاندا لە یەك منداڵ زیاترت ببێت و لەدەرەوەی شارو پارێزگاكانیش، واتە لە شارۆچكەو گوندەكان، كە پێویستیان بەدەستی كار زیاترە، تەنها دوو منداڵ ڕێگە پێدراوە.. 


ژمارەی ئەو وڵاتە (چین) لە یەك ملیارو چوارسەد ملیۆن تێپەڕیوە، هەرچەندە زیاتر لە 10 ساڵ زیاترە ئەو یاسایەی جێگیركردنی ڕێژەی منداڵ پیادە دەكات .. بەڵام سەیری وڵاتێكی وەك هندستان بكە كە باوەڕی ئاینییان بەو ڕێگرییە نییەو  هیچ ئاینێك (لە كۆی زیاتر لە 3 هەزار ئاین و بیروباوەڕ لەو وڵاتە)  لەگەڵ جێگیركردنی ڕێژەی منداڵ و بەربەستی منداڵبووندا نیین، بەڵام 76% منداڵانی هندستان خۆراك و كەل و پەلی پێویست و پۆشاك و داو و دەرمانی پێویستیان نییەو لەمەش بەدتر لە خوار هێڵی هەژارییەوە دەژین! .. بەو دۆخەشەو داتای پەرەسەندنی دانیشتوان بۆ ساڵی 2021 ئاماژە بۆ ئەوە دەكات لە 40 ساڵی داهاتوودا هندستان پێش (چین) دەكەوێت لەژمارەی دانیشتوان.. بەمەش قوڕبەسەریی و چەرمەسەریی زیاتریان ڕوبەڕوو دەبێتەوە و سەدان هەزار منداڵی تر برسی و بێ لوقمە نان دەبن و دەڕژێنە سەر زبڵخانەو سەرالوێنكەكان و بەدخۆراك دەبن و..  ڕەنگە ئەوەش بگاتە كۆژانی مرۆیی!


باشە تۆیەكی موسڵمان ئەگەر لە كوردستاندا نەبیت و لەو هندستان و  صۆماڵ و هایتی و ئەریتیریا-یەدا بژیت، جەنابتان چوار ژن و 15 منداڵتان دەبێتە شتێكی پێویست و پێتان پەروەردەو بەخێو دەكرێت؟!


  ئەی قسەتان چییە لەسەر ئەو دەیان ملیۆن منداڵەی لە وڵاتانی موسوڵمانی وەك صۆماڵ و سۆدان بەدخۆراكن و لوقە نانێكیان نییە بیخۆن و هەزارانیان لەبرسا دەمرن؟! ئەمەیان چییە؟ هەر خودا بەخێویان دەكات؟؟!  یاخود نەخێر خودا تاقییان دەكاتەوە؟!!!
 

ژنێكی داماو  كە تەلەفۆن دەكات و بە زمانی خۆی دەڵێت من سێ منداڵم هەیەو بچوكەكەم هەشت ساڵەو بۆیە تەلەفۆن ئەكەم حوجەم هەیە (ڕەنگە نەدار بێت.. تاتەندروست بێت .. نەتوانێت .. سەدان حوججەو ڕێگرییەكی دیكە) كە عەبدول لەتیف سەلەفی هەر لێێێێشیییی نەپرسیی ئەرێ حوججەو رێگرییەكانت چیین! .. بیخەرەوەو خودا بەخێوی دەكات و دەستی لێبەردەو بڕۆ خۆتی!


بەڵێ هەمان ئەو لۆژیكەیان  باڵایە كە ژن كاڵایە.. كاڵایەك بۆ منداڵخستەوەی بێشومار و لەقاڵبدان و ئاڵاندنە ملی بەرپرسیارێتی بەخێوكردنی دەیان منداڵ و پەروەردەو بەخێوكردن و فێربوونیان ..
ئیدی ئەم لێشی قەدەغە دەكات حەبی مەنع بەكاربهێنێت و لەولەب و ڕێكارەكانی بەربەستی منداڵبوون بگرێتە بەر و قسە لەسەر ئەمەش دەكات!


باشە! ئێمە دەپرسین پەروەردەو فێركردنی منداڵێك یان دوو منداڵ سانا و ئاسانترە یان حەوت هەشتێك؟! .. ئێ بەدڵنیاییەوە كابرای موسوڵمانی (هند)یش هەر ووتوێتی خوا بەخێویان دەكات! بەڵام منداڵەكانی لەسەرانوێلك و زبڵدان و خۆڵ و خاشاك و پاشماوە فڕێدراوەكاندا بەدوای لوقمەنانێكدا دەگەڕێن؟!


خاڵی دووەم:  كاتێك مەلا عەبدول لەتیف سەلەفی دەڵێت: ئەگەر یەكێك یەك منداڵی هەبوو خوشكەكەی یان كچەكەی مەخوازە! (چونكە بەو ماناو لێكدانەوەیە بێت، خەلەلی جینەتیكی هەیە) .. 


ئەم قسەیە هەرچییەك بێت، بەپێی ئەم راپۆرتە فڕی بەسەر زانستەوە نییەو قسەس گیرفانە و پولێك ناهێنێت.. چونكە گواستنەوەی بۆماوەیی نەزۆكی لە باوانەوە بۆ وەچەكان دەگمەنە.. ئەگەر روشبدات نابێتە تاكە هۆكار و تەنانەت نابێتە هۆكاری سەرەكیش..
هەربۆیە چاوەڕوانكراوە كە بانگخوازانی هاوشێوەی عەبدول لەتیف سەلەفی، رۆژێك لە لایڤ و بەرنامەی راستەخۆدا ئامادەییان تێدابێت قسە لەسەر فیزیای كوانتەم و زانستی پەرەسەندن و رێكارەمێژوویەكانی ئیڤۆڵوشن و تەنانەت چەكی هایدرۆجینش بكەن!

ڤیدیۆ


کاریکاتێر

وێنەهەواڵ

© 2016 Dwryan.net. All Rights Reserved.