سەرەتا/ لەبارەی دابڕان/ پەیوەندی/

كۆمپانیایەك فێڵ لە عومرەكاران دەكات

21/04/2022


یەكێك لەو كۆمپانیایانەی كاری بردنی موسڵمانانە بە شێوەی گروپ بۆ سعودیە بە مەبەستی عومرە كردن، فێڵ لە عومرەكاران دەكات بە بیانووی گۆڕینی هۆتێلەكەیان خواردنیان بۆ دابین ناكات، وەزارەتی ئەوقافیش هەڕەشەی سزادان لە كۆمپانیاكە دەكات.

بەپێی ئەو زانیارییانەی لە زاری چەند عومرەكارێكەوە لە سعودیەوە بڵاوكراوەتەوە، كۆمپانیاكەیان فریوی داون و خواردنیان بۆ دابین ناكات لە كاتێكدا ئەوان هەر لە كوردستان پارەی خواردن و گواستنەوە و هۆتێلیان داوە، بەڵام بە پاساوی گۆڕینی هۆتێلەكەیان، ئێستا خواردنیان پێنادەن و وتویانە ئەو هۆتێلە نوێیەی گرتویانە گرانترە و زۆر لەسەریان دەكەوێت 

دەشڵێن"ئێستا خەرجی خواردن كەوتوەتە سەر خۆمان و كۆمپانیا قۆڵی بڕیوین، چونكە 1200 دۆلارمان داوە بۆ خزمەتگوزارییەكی باش، بەڵام لێرەش خواردن و خەرجی كەوتەوە سەر خۆمان و هەموو شتێكیش لە سعودیە گرانە".

نەبەز ئیسماعیل وتەبێژی وەزارەتی ئەوقاف و كاروباری ئاینی هەرێمیش رایگەیاند "لە بەڕێوەبەرایەتی گشتی حەج و عومرە بەشی سكاڵا هەیە و هاووڵاتییان دەتوانن لە كاتی گەڕانەوەیان سكاڵا تۆمار بكەن دژی هەر كۆمپانیایەك كە فریوی داون، بە دڵنیاییش سزای توند چاوەڕێی ئەو لایەن و كۆمپانیایانە دەكات كە هاووڵاتییان فریو دەدەن".

وتیشی"بابەتی جیاوازی نرخەكان لە نێوان 700 دۆلاری ئەمریكی بۆ 1200 دۆلار و هەندێك كات زیاتریش، پەیوەندی بە ئێمەوە نییە و نرخەكان لەلایەن كۆمپانیاكانەوە دادەنرێن، ئەو نرخانەیش لەسەر بنەمای خزمەتگوزاری دانراوە كە پێشكەشی عومرەكار دەكرێت، بۆیە كە كێشە لەو ڕێككەوتنەدا دروست بوو، دەتوانن سكاڵا تۆمار بكەن و ئێمەش بەدواداچون دەكەین".

كۆمپانیاكان بۆ گەشتی عومرە ماوەی حەوت تا 15 ڕۆژیان هەیە، نرخەكانیش بەگوێرەی رۆژەكان دەگۆڕێت، بە پاس نرخ لە 490 دۆلار تا 600 دۆلار دەستپێدەكات، بە فڕۆكە لە 700 بۆ 1200 دۆلار و ەندێك جار زیاتریش و دەگاتە 1500 دۆلار، پارەكەش سەرەتا هەمووی وەردەگیرێت، دواتر خزمەتگوزارییەكانیان بەباشی جێبەجێ ناكەن و هاووڵاتییان فریو دەدەن.

شێخ نیاز نەقشبەندی بەڕێوەبەری گشتی حەج و عومرەی هەرێمی كوردستانیش، وتی"هەر هاووڵاتییەك لە مەككە یان مەدینە لەلایەن كۆماپانیاكانەوە فریو درابوو، دەتوانێ پەیوەندی بە ئێمەوە بكات، چونكە بەردەوام فەرمانبەری تایبەتمان لەوێ هەیە و ڕاستەوخۆ دەگەنە شوێنەكە و كێشەكان چارەسەر دەكەن".

وتیشی"بۆ ژمارەی ئێمە بە ئاسانی دەتوانن لە دەزگاكانی ڕاگەیاندن یان پەیجی فەرمی وەزارەتی ئەوقاف یان هەر كارمەندێكی سەر بە بەڕێوەبەرایەتی گشتی حەج و عومرەی هەرێمی كوردستان وەربگرن، بێگومان بەدەنگیانەوە دەچین، پێشتر و بەردەوامیش كۆمپانیای زۆر لەسەر فریودان سزا دراون".

نوێترین


کاریکاتێر

وێنەهەواڵ

© 2016 Dwryan.net. All Rights Reserved.