سەرەتا/ لەبارەی دابڕان/ پەیوەندی/

مەترسیی ڕۆشنبیری ترسنۆک و مەلای داعشبیر لەباشوور
بۆچی بیری نەتەوەییمان لەقوشبندایە ؟

10/05/2022


د.سالار تاوگۆزی
ڕۆشنبیری ترسنۆک و  بێدەنگ مەترسیدارترە لە مەلای داعشبیر. 

ئەگەر ترسنۆکیی زۆرێک لەڕۆشنبیرانی کورد نەبایە، ئێستا مەسەلەن لەکوردستاندا ئەبو جیهاد و  مەلا حەنزەڵەى توندڕەو لەگەڵ بانگخواز تەڵحەی داعشبیر سوکایەتییان بەنەتەوەو نیشتیمان و ئاڵا و کەمینەکان و ژن نەدەکرد و کلتووری جنێو و سوکایەتییان بڵاو نەدەکردەوە و بەڕاست و چەپدا خەڵکیان کافر نەدەکرد و فەزای گشتی و سۆشیاڵ میدیایان داگیر نەدەکرد و نەیاندەکردن بە گۆڕەپانی بۆڕبۆڕێنی خۆیان. 

 

گەر ڕۆشنبیر لەکایەکەدا بوێرانە بەرانبەر بە کلتووری مەرگدۆستیی و ڕوخێنەری سەحرانشینەکان و خورافەچییەکان و حەکایەتخوانە ترسناکەکان بوەستایە و کلتووری ژیاندۆستی بڵاو بکردایەتەوە، هەنوکە دەسەڵاتیش نازی بانگخوازێکی عەوام خەڵەتێن و مەلایەکی سەلەفیی موشتاقی هەڵنەدەگرت کە سەر لەبەری پەرتوکەکانی ناو پەرتوکخانەکەی وەک بۆمبی چێنراون لەناو عەقڵی مسوڵمانانی کوردستانی باشووردا، ئەو باشوورەی کە گوتاری سەلەفیزمی کۆنەپارێز تێیدا تەکی بەگوتاری نەتەوەیی هەڵچنیوە، ئەو باشوورەی کە تارمایی دێوەزمەی تۆقێنەری سەلەفیی و ئیخوانیی باڵی بەسەردا کێشاوە، بەشێوەیەک بیری نەتەوەیی خستووەتە قوشبنەوە. 

 

من ئەم قسانەم ناگشتێنم، بەڵام بەشێوەیەکی گشتی ڕۆشنبیرانی باشووری کوردستان دەستیان بەکڵاوی خۆیانەوە گرتووە و گۆڕەپانەکەیان بۆ مەلا و بانگخوازی هەڵگری ڤایرۆسی بیری سەلەفیزم و ئیخوانیزم چۆڵ کردووە، بۆیە دەسەڵاتیش ناچارە نازی مەلایەکی سەلەفیی موشتاق و بانگخوازێکی مەرگدۆست زیاتر هەڵبگرێت. 

 

خۆزگە گشت ڕۆشنبیرانی باشوور هێندەی (شێرزاد حەسەن) بوێری ئەوەیان هەبووایە بەبێ ماسک پەنجە لەسەر برینە فیکری و پەروەردەیی و زانستیی و دەروونیی و کۆمەڵایەتییەکانمان دابنێن.



 

 

نوێترین


کاریکاتێر

وێنەهەواڵ

© 2016 Dwryan.net. All Rights Reserved.