سەرەتا/ لەبارەی دابڕان/ پەیوەندی/

وەڵامێكی گونجاو بۆ كرداری سوتاندنی قورئان

7 رۆژ پێش ئێستا


 

پەیكار عوسمان 

 

 

وەڵامی گونجاوی "قورئان سوتاندن" جوملەیەکی زۆر سادەیە، (خودایە بیبەخشە ئەو نازانێت).

 

لەڕاستییدا ئەگەر خودی موحەمەد، بکەوێ بەسەر حادیسەیەکی قورئان سوتاندا، لەو جوملەیە زیاتر ناڵێ و ڕەنگیشە هەر لە دڵی خۆیدا بیڵێ و کەس گوێ ی لێنەبێ، ئەوەش بۆئەوەی نەکەوێتە مەوقعی کاردانەوەی جاهیلێکەوەو بۆی بسەنێتەوەو یارییەکەی بۆ تەواوبکات.

 

تا ئێرا وەڵامی عەقڵەو حەکیمەکانی مرۆڤایەتی، لەو نەوعە دۆخانەدا، لەوە زیاتریان نەکردوە.
ئەی وەڵامی (دەمارگیری و حەشامەت) چیبووە؟ هەمیشە بەرامبەر توندڕەویی توندڕەوییەکی زیاتر، بەرامبەر جەهل جەهلێکی زیاتر، بەرامبەر خواریی خوارییەکی زیاتر.. بۆچی؟ چونکە مرۆڤ، زیاتر لەسەر عەقڵی جەماعەتە نەك لەسەر عەقڵی خۆی، کاهین و حیزب و دوکان و بازاڕەکانی دینیش، بەردەوام تۆپەڵ و هەستیارو ڕقاوییت ئەکەن و بەرەو دەمارگیری و عەقڵی جەمع پاڵت ئەنێن، نەك بەرەو حیکمەت و عەقڵی خۆت،، ئاخر ئەگەر حیکمەتت هەبێ و عەقڵی خۆت میوانبێ، ئیتر ئەوان ناتوانن لێتخوڕن و کاسپی و دوکانەکەیان زەرەر ئەکا.

 

سەیرکە لە ڕووداوەکانی فەلەستین، بۆرما، کاریکاتێرەکە، سوتاندنەکە.. چۆن لافاوی ڕق هەڵئەستێ و چۆن قانت ئەیەن بە حەماسەت، لەکاتێکا باشترین وەڵام، ئارامی و بچوککردنەوەی مەساحەی دەمارگیری و پوچەڵکردنەوەی گیانی توندڕەوییە، بەڵام چونکە "ئارامیی" بەکەڵکی تیجارەتی جەماعەتبازی نایەت، ئیتر "وروژاندن" ئەکەوێتە کار!
"ڕاستڕەوی پەڕگیر" سەرەتانێکە لە جەستەی غەربدا، وەکچۆن "دەمارگیری دینی" سەرەتانێکە لە جەستەی عالەمی ئیسلامیدا، ئەم دوانەش بۆ یەکی ئەسێننەوەو هێزو جەماوەر لە یەكتر وەرئەگرن و بازاڕی یەکتری گەرم ئەکەن. فاشیزم قەت ساغ نیە، هەمیشە لەتەو بەدوای لەتەکەی تریدا ئەگەڕێ، ئینسانی هۆشیاریش، هەردو فاشیزمەکە ئەخاتە زبڵدانەوە، نەك ئەوەی بکەوێتە داوی یەکێکیانەوەو بەرەو ناو زەلکاوەکەی بەرێت.

نوێترین


کاریکاتێر

وێنەهەواڵ

© 2016 Dwryan.net. All Rights Reserved.