سەرەتا/ لەبارەی دابڕان/ پەیوەندی/

خۆشم دەوێی پیاو

12/05/2022



خەندان جەزا

كێ دیووییە مەل بە باڵێك بفڕێ؟ كێ دیووییە مریەم زیندووبێتەوە؟ ژیان بێ رەگەزی بەرامبەر ناهاوسەنگە نا هاوسەنگ !

شەڕی من لەگەڵ تۆی پیاو نیە، دڵنیابە من نەئێستا و نە رابردوو هیچ رقوكینە و جەنگێكم لەگەڵ تۆ نەبوەو نییە.

من ساڵانێكە هاوارمە كە تۆی پیاوم خۆش دەوێ، عاشقتم و عاشقمی، وەلێ كەس بڕوام پێناكات.

شەڕی من لەگەڵ ئەو دابونەریتە داڕزاوەیە كە لە مێژە فەلەجە و قرخن بووە، شەڕی من لەگەڵ ئەو شەرەفەیە كە هێشتا خۆڵی بیابانی لەسەرە، لەگەڵ ئەو سیستەمە لەرزۆكەیە كە ساڵەهایە سەری شۆڕە بێ ئابڕووە بێ شەرەفە.

هیچ كات تۆی پیاو بە بەختەوەرتر لەخۆم نابینم ! هیچ كات تۆ بە پاڵەوانی دێوكوژەكان ناناسم ! لەچەقۆ و تەورەكەی دەستت بە قاتل نابینم دڵنیابە، تۆ لەمن بەدبەخت تری، دەزانم ژن دەسوتێ، دەفرۆشرێ، لەچاڵ دەنرێ، ناوگەڵی خوێناوی دەكرێ، سەردەبڕدرێ، دەزانم زۆر لە وەزیاتر ژن هەلاهەلا دەكرێ بەڵام دەبێ بزانیت ژن قوربانیە و تۆی پیاو باجەكەی دەدەیت! تۆ بەدبەختی چیتر ئابڕوتنییە لە سوچێكی تەڵخترین ئاوێنەدا خۆت ببینی.

ئەوە تۆی بەدبەختی كەدەبێ تەواوی ژیانت پاسەوانی نیوسانتی مەتر ناوگەڵی من بی، شەڕی من لەگەڵ تۆی چارە ڕەش نیە هاواری من روی لەتۆی بێ باڵ نیە، تۆدەزانیت چەنێك بەدبەختی هەی پیاو؟

لەئاسمانی وڵاتێكی پڕ رەنگوبۆندا تەنها بە باڵێك دەبێ بفڕیت، لەبری چڵێ وەنەوشە دەبێ شمشێر و چەقۆ تیژكەیت لەبری ئامێزێكی پڕ متمانە باوەشێك ترس دەگری.

زانیوتە تۆی پیاو لە پانتاییەكی بێسنوردا تەنها خۆت بەڵێ تەنها تۆ دەبێ وەك بولبولێكی لاڵ لە قەفەسی ئابرودا بخوێنی؟

تۆ بە تەنها دەبێ پێشەوای هەمو جەنگەكان بی، دەبێ تۆ بەرپرسی هەمو حیزبەكان بی، دەبێ هەرتۆ پێش نوێژی مزگەوتەكان بی، بە تەنها تۆ بە تەنها.

ئای چەنێك بەدبەختی پاسەوانی شەرەف، ئاخر نەدەكرا چ من چ تۆ لەبری شەرەف پارێزگاریمان لە سەروەری مرۆڤ بكردبا؟

دەبێ لەم زمانەم حاڵی بی من شەڕم لەگەڵ تۆ نیە، شەڕی من ساڵانێكە لەگەڵ ئەو فەرهەنگ و یاسا داتەپیوانەی نیشتمانن كەتۆیان بەتەنها كردۆتە كۆیلە و دەبێ پاساوانی ناوگەڵی من بی.

شەڕی من لەگەڵ ئەو مینبەرانەیە كەتۆیان كردۆتە دێودرنج ! تۆیان كردۆتە بكوژ و قاتڵ ! تۆیان كردۆتە تیری كەوانی جەهلپەرستی! باجی دۆڕاندن لەپێناو پاراستنی قەڵای شایەكی شەهوەتباز دەدەی.

شەڕی من لەپێناو ئازادی تۆو سەربەستی خۆمدایە.

ئاخر كێ دیویە مەل بەباڵێك بفڕێ؟ نە تۆی پیاو نەمنی ژن بێ یەكتر هاوكێشەیەكی ناتەواو دەبێ.. تۆیەك هێندە عاشقی رۆژی هەزارانتان خۆی دەكاتە قوربان سنگومەمكەكانی ژنانی وڵات تۆیەك، بە سەدان جار دێڕی هۆنراوەی حەزت بە باڵای پرچما هەڵدەواسی! ئاخر تۆیەكی پیاو هێندە بەخشندەی دەتەوێ من لەئامێزی ورژانتا غەرقی چێژ بكەی! چۆن دەبێ ببیتە بكوژم؟

ئەوە تۆنیت كە دەمبەیتە قوژبنێكی تاریك و هێزی خۆت لە دڕینی پەردەیەكی چكۆلەدا تاقی دەكەیتەوە نا، نا ئەوە تۆنیت كە لەسەر ماچێك سەرم لەلاشەم دەكەیتەوە كاتێ خۆت تینوی ماچی!

ئەوە تۆنیت كە ژن لەدوای ژن دەخەیتەژێر و زۆرانبازی بردنەوەی پیاوەتی لەگەڵ دەكەیت.

ئەوە ئەو فەرهەنگ و یاسا و رێسا داڕزاوانەن تۆیان بەدیل گرتوەو لەژێر ئەشكەنجەی دەروندا ناچارت دەكەن ببیتە دڕندە لەپێناو بردنەوە، ئەوە ئەو سیستەم و مینبەرانەن تۆیان داماڵیوە لە بەخشندەیی و ناشاریان كردویت و دەیانەوێ بە تەنها باڵێك بفڕیت.

تۆم خۆش دەوێ بێ تۆ ناژیم، وەرە با لە یەكبگەین دڵنیابە ژیان بێ تۆ مەنفایە هیچ كات ناتوانم بەتەنها باڵێك بفڕم، بەڵام ئەگەر هاتی تەنها خۆت وەرە، ئەو فەرهەنگە ماندوم دەكا.

گەرهاتی تەنها وەرە ئەو پاراستنی شەرەفە ناشرینت دەكا

خۆشم دەوی پیاو لێم حاڵیبە

چاوەڕێی ئەو چەقۆیەم كە ئێستا نا ساتێكیتر گەردنی منیش ببڕێ

نوێترین


کاریکاتێر

وێنەهەواڵ

© 2016 Dwryan.net. All Rights Reserved.