سەرەتا/ لەبارەی دابڕان/ پەیوەندی/

ئیسلامییەكانی فەلەستین

12/05/2022



حەسەن یاسین

رەنگە ئەم ناونیشانەی سەرەوە گشتگیربێ و بۆ ئەوەی هەموو لایەنەكانی ئەم ناونیشانە، سەرلەبەری باس بكەین، پێویستی  بە نووسینی كتێبێكی چەند بەرگی هەبێت، بەڵام لێرەدا نامەوێ بابەتەكە قەرەباڵغ بكەم، بۆیە دەمەوێ بەكورتی لەسەر دۆخی خەڵكی فەلەستین لەنێوان چەكوشی ئیسلامییەكان و سندانی عەلمانییەكان قسەبكەم!

هەڵبەت ئیسلامییەكانی فەلەستین، یەك دەستە و گروپ نین، بەڵام ئیخوانییەكان رۆڵێكی كاریگەریان هەیە و لەبن ناوی حەماسدا كاردەكەن و رەفتارەكانیان رێك هەمان هەڵسوكەوتەكانی ئیخوانییەكانی میسرە و بەموو لێیان لانەداوە.

دەبێ هەر لەسەرەتاوە ئەوەمان بیرنەچێ ئیسلامییەكانی فەلەستین، خەڵكی نەتەوەیین و بەناوی هێزی نیشتمانییەوە كاری سیاسی دەكەن، ئەگەرچی ئەوەی دەیكەن، زۆرجار، بیانەوێ یان نا، بە زیان بۆ بەرژەوەندیی خەڵكی فەلەستینی دەشكێتەوە.

یەكێك لەكێشەكانی ئیسلامییەكان ئەوەیە هەمیشە خۆیان لە خەڵكی موسڵمانی ئاسایی جیادەكەنەوە و وا هەڵسوكەوت دەكەن كە هەر ئەوانە موسڵمانن كە ئیسلامین و لەگەڵ گروپەكەی ئەواندان، هەر بۆ نموونە لە یەكێك لە گوندەكانی فەلەستیندا دوو مزگەوت هەیە، یەكێكیان تایبەتە بە ئەندامانی حەماس و مزگەوتەكەی دیكەیش گشتییە و هەموو خەڵكی موسڵمانی گوندەكە نوێژی تێدا دەكەن! لە مزگەوتەكەی حەماسدا ئیمامی مزگەوت لە گوتاری رۆژی هەینیدا باس لەوە دەكات كە «ئیسلام چارەسەرە» و هەموو كێشەكانی ژیانی موسڵمانان بە ئیسلام چارەسەر دەكرێن، كەچی  ئیمامی مزگەوتە گشتییەكە لە گوتاری رۆژی هەینیدا باس لە كێشەكانی خەڵك لە كۆمەڵی مەدەنیدا دەكات و رۆڵی ئیسلامیش لە ژیانی موسڵماناندا فەرامۆش ناكات!

ئەوەی لە نێوان ئیسلامییەكان و عەلمانییەكانی فەلەستیندا، لە ماوەی رابردوو گوزەراوە، بە هەڵسوكەوتی مەدەنیی نەرمڕەو و توندڕەوەوە، بە باش و خراپ، كاریگەریی لەسەر رەوشی سیاسی و كۆمەڵایەتیی خەڵكی فەلەستین دەبێت و سەرەنجامیش راستەوخۆ لەسەر ئاشتیی كۆمەڵایەتی كاریگەریی داناوە و دادەنێ!

كێشەی نێوان ئیسلامییەكان و غەیرە ئیسلامییەكان، یان ئەوانەی لەسەر عەلمانیەت حسێبن، كاریگەریی لەسەر ئایندەی كێشەی فەلەستین دەبێت و كۆمەڵی فەلەستینی، نەك هەر تووشی چەق بەستوویی دەكات، بەڵكو  بەرەو دواوەی دەبات.

فاكتەری دەرەكی لە فەلەستین، لەچاو هەموو وڵاتانی عەرەبی، كاریگەریی پترە لەسەر مەیدانی سیاسی لەنێو پڕۆسەی سیاسیی فەلەستیندا و رەنگدانەوەی هەنووكەیی و بەردەوامە و بۆ ئایندەش كاریگەرییەكەی بە ئاسانی ناسڕدرێتەوە، بۆ نموونە توركیا رۆڵێكی دووفاقی لەمبارەیەوە دەبینێ. توركیا پێوەندیی ئابووری و سیاسیی بەهێزی لەگەڵ دەوڵەتی ئیسرائیل هەیە، لەلایەكیتریشەوە پێوەندیی لەگەڵ حەماسیش هەیە و پشتیوانییان لێدەكات، ئەمەش بەناوی ئەوەی هەم داد و گەشەپێدانی فەرمانڕەوا لە توركیا ئیخوانن، هەم حەماسیش لقێكی ئیخوانی نێودەوڵەتین لە فەلەستین. بێگومان ئەم هەڵوێستە دووفاقییەی توركیا كاریگەریی سلبیی زۆری لەسەر دۆخی فەلەستینییەكان هەیە!

بۆ ئەوەی ئاشتیی كۆمەڵایەتی لەنێو كۆمەڵدا بەرقەرار بێت، دەبێ ئیسلامییەكان و عەلمانییەكان لەسەر فۆرمێكی كاركردنی پێكەوەیی رێكبكەون و خۆیان لە بەریەككەوتن و ململانێی بێلزوم بە دوور بگرن، ئەمە نەك هەر بۆ دۆخی فەلەستینییەكان، بەڵكو بۆ ئێرەش راستە!

نوێترین


کاریکاتێر

وێنەهەواڵ

© 2016 Dwryan.net. All Rights Reserved.