سەرەتا/ لەبارەی دابڕان/ پەیوەندی/

وەكو دوو مرۆڤ یەكسان بن

25/06/2022



رۆزا دڵشاد مەریوانی

چەندین ساڵە لە هەموو دونیادا ژنان خەبات دەكەن لە پێناو بەدەستهێنانی مافەكانیان و بۆ ئازادبوونیان دەجەنگن جا لە كۆمەڵگە پێشكەوتووەكاندا بێت یان كۆمەڵگە دواكەوتووە پیاوسالارەكانی وەكو كۆمەڵگەی ئێمەدا بێت، بێگومان هەر یەكە و بەپێی ئەو دۆخ و مافانەی بەدەستی نەهێناوە دەجەنگێت رەنگە لە وڵاتێكی پێشكەوتووی وەكو ئەمریكا یان ئەوروپادا راستە لەوێ خەباتی ژنان بە چەندین قۆناغ لەپێش ئێمەوەن، بەڵام هێشتا نەیانتوانیووە بە تەواوەتی هەموو ئەو ماف و تایبەتمەندیانە بەدەستبێنن كە پیاو هەیەتی بۆ نموونە لەوێ زۆرجار ژنان داوای یەكسانی لەگەڵ هاوپیشە پیاوەكانیاندا دەكەن لە مووچە و داهاتدا یان داوای توندكردنەوەی یاساكانی گێچەڵپێكردنی سێكسی دەكەن لە كار و پیشەدا، بەڵام لە وڵاتێكی وەكو وڵاتی ئێمەدا دەبینین راستە شتی زۆر كراوە لە پێناو دەستەبەركردنی مافەكانی ژناندا و بەخۆشحاڵییەوە لە ئێستادا پێداچوونەوە دەكرێت بە یاساكانی بەرەنگاربوونەوەی توندوتیژی دژی ژنان و نێو خێزان و كار بۆ هەمواركردنەوەی ئەو یاسایە دەكرێت لە پەرلەمان، بەڵام هێشتا كەلێن و بۆشایی زۆر دەمێنێتەوە بۆ نموونە كاتێك یاسایەك لەسەر ئاستی هەرێم هەموار دەكرێت دەبینێرت لەسەر ئاستی عیراق سزا بۆ ئەو تاوانە نییە یان جیاوازە یەكێك لەوانەش فرە ژنییە.

بە ئاڵۆزیی تەماشا دەكرێت

هەندێكجار زۆر بە ئاڵۆزیی تەماشای مەسەلەی ژنان و بەدەستهێنانی مافەكانیان دەكرێت، بەشێوەیەك بیردەچێتەوە ژنیش مرۆڤە و وەكو بوونەوەرێكی سەیر و جیاواز لە كۆمەڵگە تەماشای دەكرێت، ئەوە زۆرجار وادەكات پیاوان بە ترسەوە بڕواننە ژنێك كە داوای مافەكانی و یەكسانی دەكات و وا دەزانن ئەگەر ژنان مافەكانیان بەدەستبێنن ئەوە مانای وایە رۆڵ و كەسایەتی ئەوان دەسڕدرێتەوە یان زاڵ دەبن بەسەریاندا و چیتر ئەوان مافیان نامێنێت یان وتاری توندوتیژی ئەو ژنانەی ناهەقی و زوڵمی زۆریان بەرامبەركراوە وا لە پیاوان دەكات سڵ بكەنەوە و بترسن و ئەوەندەی تر توند بن بەرامبەر بە مەسەلەكانی ژنان، بەڵام ئەگەر زۆر بە سادەیی بیری لێبكەینەوە دەبێت پێش هەموو شتێك خۆمان و كۆمەڵگە تێبگەیەنین لەوەی ژن-یش مرۆڤە بە هەموو جوانی و ناشیرینیەكانییەوە و ناكرێت لە كۆی كۆمەڵگە جیابكرێتەوە ئەگەر لەو ماناو پێناسەیە بۆ ژن تێبگەین ئەو كاتە بەلامانەوە ئاسایی دەبێت كاتێك ژنێك داوای ماف و ئازادییەكانی دەكات هەروەها ئەو كەلتور و دابونەریتانەی سنور بۆ ژنێك دادەنێن پێویستە بۆ پیاویش بەهەمانشێوە بن و نەوترێت تۆ ژنیت و من پیاو! واتا لە چوارچێوەی یاسا و دابونەریتە كۆمەڵایەتییەكاندا ژن و پیاو یەكسان بن ئەگەر ئەو هاوكێشەیە لەهەر كۆمەڵگەیەكدا بەدیبێت بێگومان لە بواری مەسەلەكانی ژناندا جیاوازی و پێشكەوتنی زۆر روودەدەن.

سڕینەوەی بەرامبەر نییە

كەواتە میدیاكاران یان رێكخراوەكانی كۆمەڵگەی مەدەنی و ژنان و هەر كەسێك لەو بوارانەدا كاردەكەن لەكاتی هەوڵدان و خەباتكردندا لە پێناو بەدیهێنانی مافەكانی ژناندا ئەوەیان لەبیربێت و كۆمەڵگە بەگشتی و پیاوان بە تایبەتی لەوە تێبگەن داواكردنی ئەو مافانە واتای سڕینەوەی بەرامبەر نییە، بەڵكو ژن داوای ئەو ماف و هەلانە دەكات كە پیاو هەیەتی جا لەهەر بوارێكدا بێت كۆمەڵایەتی، یاسایی و ئابوری و تەنانەت سیاسیشدا و ژن دەیەوێت بە هەمانشێوە ئەو هەلانەی بۆ بڕەخسێت و كۆست و رێگریی لەبەردەمیدا دانەنرێت، جگەلەوەی هەر كاتێك لەهەر بوارێك لەو بوارانەدا ژنێك توانی تواناكانی خۆی دەربخات و خۆی بسەلمێنێت و ئەگەر بەجۆرێك لە جۆرەكان تاوانی بەرامبەر كرا ئەوەندە یاساكانمان توند بن بتوانن سزای گونجاوی تاوانباران بدەن و وا بەئاسانی نەتوانرێت ئەو تاوانە نەك بەرامبەر ژنێك بگرە بەرامبەر هەر مرۆڤێكی دیكە بكرێت، واتا یاساكانمان بەجۆرێك توندوتۆڵ و كاریگەر بن وەكو وڵاتانی دونیا یاسایەك بن بۆ هەموو مرۆڤەكان بەگشتی و بەیەكسانی و بێ جیاوازی.

هۆشیاركردنەوەی كۆمەڵگە

هەر كاتێك توانیمان لە رێی پەروەردە و فێركردنەوە عەقڵیەتی كۆمەڵگە بگۆڕین و چین و توێژە جیاوازەكان هۆشیاربكەینەوە بەوەی ژن مرۆڤە و پێویستە وەكو پیاو ئەو مافانەی هەبێت و وەكو ئەو بتوانێت لە چوارچێوەی دابونەریت و كەلتوری كۆمەڵگەدا ئەو ئازادییانەی پیاو هەیەتی ئەویش بەبێ كێشە پراكتیزەی بكات، هەروەها یاسای توندو مۆدرێنمان هەبێت لەگەڵ پێشكەوتنەكانی دونیادا بگونجێت بۆ داكۆكیكردن لە كۆی مرۆڤەكان بە گشتی نەك تەنیا ژن، ئەو كاتە دەتوانین بڵێین تا راددەیەك گەیشتووینەتە ئەوەی مافەكانی ژنان بەدەستبێنین و لەگەڵ پیاودا وەكو دوو مرۆڤ یەكسان بن.

نوێترین


کاریکاتێر

وێنەهەواڵ

© 2016 Dwryan.net. All Rights Reserved.