سەرەتا/ لەبارەی دابڕان/ پەیوەندی/

یەكگرتووی ئیسلامیی و كێشەی كورد

13/08/2022



د.حوسێن موحەممەد عەزیز

بەشی دووەم 

پەتای بیانییپەرستیی و‌ بەرگی ئایین


گەر لە ئاییندەدا، بە پشتیوانی (سوارەی حەمیدییه)‌ی كورد، لەبری ئیمپراتۆریای (عوسمانیی)، ئیمپراتۆریای (تووركستان)ی ئیسلامیی دامەزرا، ئەوا بێ چەند و چوون، (ئۆردووگان) یەكەمین سوڵتان دەبێ، هەموو پارتە موسوڵمانە سووننەكانیش بە گشتیی و (ئیخوان) بە تایبەتی، پیرۆزباییەكی گەرمی دامەزراندنەكەی لێ دەكەن و ئاهەنگی سەركەوتنی بۆ دەگێڕن!

قسەكانی جێنشینی نوێ (ئۆردووگان)، وەك ئەوە وایە، كێشەی كورد لە نیشتمانە ژێردەسەكەی خۆیدا، كێشەیەكی ئایینیی ڕووتبێ، بۆیە لە چوارچێوەیەكی تەسكی ئایینیی ترنجاندووە و گوتوویەتی: (لەمەودوا گوتاری ئایینیی لە مزگەوتەكان، بە زمانی كوردیی ئازادە)‌‌. ئەمە وەك ئەوە وایە، كورد هیچ جۆرە گرفتێكی دیكەی نەتەوەیی، ڕامیاریی، یاسایی، مێژوویی، جوگرافیایی، ئابووریی، كۆمەڵایەتیی و كەلتووریی نەبێ، هەموویان چارەسەركردبێ، تەنیا هەر گوتاری ئایینیی مابێ، بڕیاری لەسەر بدەن! بۆیە تووركە موسوڵمانەكان دەیانەوێ‌، بە گوتاری ئایینیی مزگەوتەكان، چارەسەرێكی بۆ بدۆزنەوه و ئەم جارەش، ڕۆڵەكانی گەلە ساویلكە هەژارەكەمان، لە باكووری وڵات بخەڵەتێن!

ئاخر ئەم تووركە موسوڵمانانەش، هەر نەوەی مەگۆله كۆنە‌كانی (جەنگیزخان، هۆلاكۆ و تەیمووری لەنگ)ن، هەرگیز لە دڵ و دەرووندا، لە دید و بۆچووندا، لە بیر و باوەڕدا، بەرانبەر به گەل و كەمینەكانی وەك‌ (كورد، ئەرمەن، ئاسووریی، سریانیی، لاز، چەركەس و عەرەب)، هیچ نەگۆڕاون، دانیان بە مافە مرۆیی و نەتەوەییە ڕەواكانیاندا نەناوە، باری ژیانیان باشتر نەبووە، بەڵام چاریان ناچارە، چونكە سەردەمەكه گۆڕاوە و‌ وا پێویستدەكا، ئەو درۆیانە بكەن، بە ڕووكەش و ڕواڵەت، شتێ بڵێن و بە كردەوەش شتێكی دیكە بكەن، هەم كوردی پێ هەڵخەڵەتێنن، هەم تا بە تەواوییش، هەموو شتێكیان لەدەس نەچووە و بانگەشەی‌ هەڵبژاردنەكانیان‌ سەربگرێ!

فاشیزمی ئیسلامیی و پوازی كوردیی

درووستكردنی هێزێكی گەورەی خۆفرۆش و جاش، بە هەر بڕوبیانوویەك و لەژێر هەر ناوێكدا بێ، بە یەكێ لە ئامانجە گەورەكانی، هەر چوار دەوڵەتە داگیركەرەكەی (كوردستان) دادەنرێ. ئەم كارەش ئەوڕۆ پتر، لەژێر چارشێوی ئایینی ئیسلامدا دەكرێ.

گەورەترین دوژمنی سەرسەختی نەتەوەی كورد لە (كوردستان)ی مەزندا، فاشیزمی ئیسلامییە. چونكە تەونی جاڵجاڵۆكەی هەموو ئەو پیلان و تاوانانەی، دژی نەتەوەی كورد دەچنرێن، لە هەردوو پایتەختی دەوڵەتی داگیركەری (ئەنقەرە) و (تاران)ی تاوانەوە، بە كردەوە پلانی بۆ دادەڕێژرێ.

سەرانی هەردوو دەوڵەتە داگیركەر و ڕژێمە فاشیستە ئیسلامییەكەی (تووركیا) و (ئێران)، بە كوشتنوبڕین و لەنێوبردنی ڕۆڵەكانی گەلی كوردی بندەسی خۆیان، دڵیان ئاوناخواتەوە، بەڵكوو پەلیش بۆ هەموو بەشەكانی دیكەی (كوردستان) دەهاوێژن و نایانەوێ، ڕۆڵەكانی نەتەوەی كورد، لە ماڵە وێرانەكەی خۆشیاندا، وەك مرۆ ئازاد و سەربەخۆ بژین. پوازی ئیسلامیی كوردیش، لە دیدگەی ئایینەكەوە، نەك هەر بەرانبەر ئەو ڕەشەكوژییە بێدەنگن، بەڵكوو دەسخۆشانەشیان لێ دەكەن و دژی مافە ڕەواكانی نەتەوەی كورد دەوەستنەوە. ئاخر پێشینان ڕاستیان فەرمووە: دار پوازی لە خۆی نەبێ، نابڕرێتەوە!

نوێترین


کاریکاتێر

وێنەهەواڵ

© 2016 Dwryan.net. All Rights Reserved.