سەرەتا/ لەبارەی دابڕان/ پەیوەندی/

یەكگرتووی ئیسلامیی و كێشەی كورد

15/08/2022



د.حوسێن موحەممەد عەزیز

بەشی سێیەم و كۆتایی

یەكگرتووی ئیسلامیی و پارتی داد و گەشەپێدان


بیانیپەرستیی لەنێو نەتەوەی كورددا، لە دوو سەرچاوەی سەرەكیی جیاوازەوە، ڕەگێكی قووڵی داكوتاوە: ئایینی ئیسلام بە گشتیی و ئیسلامیی ڕامیاریی بە تایبەتی. ئایینی ئیسلام، هەر له ئەو ڕۆژەوه، لە نێوچەكەدا‌‌ پەیدابووه،‌ تا ئێستەش، نەك هەر بایەخی بە چارەسەركردنی كێشەی نەتەوایەتی، گەلانی بندە‌س و چەوساوە نەداوە، بەڵكوو هەر سەرانی ئەو ئایینەش بوون، خاكی گەلانی نێوچەكەیان داگیركردووە و بە خراپترین شێوەش چەوساندوویاننەتەوە.

(یەكگرتوو) پارتێكی ئیسلامییە و لە ناچاریدا نەبێ، هێندە بایەخ بە كێشەی نەتەوەیی كورد نادا. گەر جارجارێكیش باسیبكا، ئەوە تەنیا هەر بۆ چەواشەكردنی كۆمەڵ نەبێ، هیچ واتایەكی دیكەی‌ نییە! جا گەر وا نییە، كەی ڕۆژێ لە ڕۆژان، دژی چەوساندنەوە و ڕەشەكوژیی، ڕۆڵەكانی هەردوو گەلی كوردی (باكوور) و (ڕۆژهەڵات)ی (كوردستان)، هەڵویستی كوردانە و مەردانەیان، بەرانبەر هەردوو دەوڵەتی داگیركەری (تووركیا) و (ئێران) دەربڕیوە؟!! چونكه لە ئەو دوو دەوڵەتەدا، دوو پارتی ڕامیاریی ئیسلامیی دەسەڵاتدارن. لە ئایینی ئیسلامیشدا، شتێ نەبووه و نییە‌، ناوی مافی چارەنووسی نەتەوەكان بێ. مەگەر نەتەوەیەكی موسوڵمان، لەژێردەسی دەوڵەتێكی ناموسوڵمانی داگیركەردا بێ، پشگێڕیبكا، داوای سەربەستیی و سەربەخۆیی تەواوی بۆ بكا، چونكه گەلێكی موسوڵمان نابێ، لەژێردەسی گەلێكی دیكەی ناموسڵماندا بێ، كەچی بە پێچەوانەوه، گەلێكی موسوڵمان بۆی هەیە، خاكی گەلێكی دیكەی ناموسوڵمان داگیركا و بیانچەوسێنێتەوە، سەر و ماڵیان ئەنفالكا و دەس بۆ ئابڕووی ئافرەتەكانیشیان درێژكا! 

لێرەدا هێندەی پێوەندیی بە ئایینپەروەران و كێشەی كوردەوە هەبێ، زۆر بە ڕاشكاویی دەڵێم: شتێكی سەیر نییە، ئیسلامییەكان بە گشتیی و (یەكگرتوو) بە تایبەتی، پێوەندییەكی باشیان، لەگەڵ ڕژێمە فاشییەكەی (تووركیا) هەبێ. چونكە (پارتی داد و گەشەپێدان AKP)، وەك پارتێكی ڕاستڕەو و میانەڕەو دەسەڵاتدارە و دەوڵەت بەڕێوەدەبا. (ئۆردووگان)یش هەم سەرۆكی پارت و هەم سەرۆك كۆماری دەوڵەتەكەشە. ئیدی هەر كارێكی خراپ بكا، پێوەندیی بە دژایەتیكردنی بزووتنەوەی ڕامیاریی نەتەوەی كورد و خاكی (كوردستان)، بەرژەوەندیی ئایینی ئیسلامیشەوە هەبێ، ئیسلامییە دۆستەكانی، بە سەركەوتن بۆی دەژمێرن و دەسخۆشانەی لێ دەكەن. بۆ نموونە:

(عەلی قەرەداخی)، نموونەیەكی زۆر زەقی لەچاوچەقیوی، جاشبیرێكی سەركردەی ئیسلامیی كورده، بە هەموو شێوەیە، لەگەڵ دەوڵەتی داگیركەری (تووركیا) دایە و زۆر بێشەرمانە، پڕوپاگەندە بۆ فاشستێكی وەك (ئۆردووگان) و دەوڵەتێكی بێ ڕەوشتی داگیركەری وەك (تووركیا) دەكا. دژی خەباتی كوردەكانی (خۆراوا) دەدوێ و پشگیریی ڕەشەكوژییەكەی تووركە داگیركەرەكان دەكا. بە مەرجێ (ئۆردووگان)یش، هێندەی تووركە، هێندە موسوڵمان نییە! چونكە ئەو باش لە كێشە و گرفتەكانی ئایین و بەرژەوەندیی دەوڵەت تێگەیشتووە، لەبەرئەوە لەسەر ڕێوشوێنی گوورگەبۆرەكانی باپیرە گەورەكانی خۆی دەڕوا،  لەپێناوی دەسەڵاتەكەی خۆی و (تووركیا)دا، هەموو كارێكی ڕەوا و ناڕەوا دەكا.

كاتێ سوپای داگیركەری (تووركیا)، بە فرمانی ڕەفتار فاشییەكی وەك (ئۆردووگان)، ڕۆژی (9. 10. 2019)، پەلاماری خۆراوای (كوردستان)ی دا، نێوچەكانی (گردەسپی، قامیشلی، عەفرێن، مەنبەج، عەینعیسا و سەرێكانی)، بە فڕۆكە و تۆپی (هاوتزر) بۆردوومانكرد، كوشتارێكی زۆری لە دانیشتووانی ئەو نێوچانە كرد و بە هەزاران خەڵكی نێوچەكەش، لە زێدی باووباپیرانی خۆیان هەڵاتن و ئەو نێوچانەیان داگیركرد. ئا لە ئەو كاتە پڕ ئازار و ناخۆشانەدا، جاشبیرێكی وەك (عەلی قەرەداخی)، پێخۆشحاڵی خۆی دەربڕی و پیرۆزبایی لە (ئۆردووگان) كرد. زۆر بە ڕاشكاویی، پشگیریی هێرشە دڕندانەكەی تووركی كرد و لە ڕۆژنامەی (حوڕیەتی توركی)دا نووسیوێتی: (هیوام وایە، چەكدارەكانی باكووری سووریا، دەرسێكی باش درابن و تێبگەن، كە چەكووشی ئۆردووگان چۆنە.)

هەروەها (عەلی قەرەداخیی)، سەبارەت بە كێشەی ئەم جەنگە نوێیەی نێوان عەرەبەكانی (فلەستین) و دەوڵەتی (ئیسرایل)، لە دیدێكی ئیسلامیی ئەخوانییەوە، جێژنانە بۆ كەسوكارە ئیسلامییەكانی (فلەستین) دەنێرێ! ئەی بۆ لایە بە لای، هاوزمانەكانی خۆیدا ناكاتەوە، كە لە هەردوو بەشەكەی (باكوور) و (ڕۆژاوا)، بە خراپترین شێوە دەچەوسێنرێنەوە؟!!

ئەم مەلا بێ ناسنامەیە، جگە لە ئەوەی، ئێستەش بە زمانیدا نایە، بڵێ: خۆراوای (كوردستان)، شەڕەڤانە هاوزمانە تێكۆشەرەكانیش، بە چەكدارەكان ناودەبا و هیواداریشە، چەكوشەكەی (ئۆردووگان)ی داگیركەری فاشیست، تەمێیكردبن و جارێكی دیكە، دژی سوڵتانە دزە درۆزنە دەسپیسەكەی نەوەستنەوە! ئەوە لە كاتیكدا، زۆربەی كەسایەتی، پارت، دەوڵەتەكانی جیهان و دەزگە نێودەوڵەتییەكان، دژی ئەو كارە پۆخڵەی سوڵتانەكەی (قەرەداخی)، زۆر بە ڕاشكاویی، هەڵوێستی مەردانەی خۆیان دەربڕیوە! جا ئیدی مەلا (عەلی) زانابێ، یا سەرۆكی موسوڵمانانی سووننەی جیهان بێ، كە بیر و هۆشی لغاوكرابێ، چی لە باری ژێردەسیی كورد دەگۆڕێ؟!!

هەڵبەتە نوێترین هەڵوێستی (عەلی قەرەداخی)، ئەم بڵاوكراوەیەیە، كە لەگەڵ داوێنپیسێكی خۆفرۆشی دوژمنی كورددا (یوسف قەرزاوی) دەریانكردووە، پیرۆزبایی لە (ئۆردووگان)ی ئاغایان دەكەن، كە (پێوەندیی تووركیا و ئیسرایل پەرەپێدەدەن.) هەروەها (سەبارەت بە سەردانەكەی سەرۆك شالیارانی ئیسرایل بۆ تووركیا، خۆشحاڵی خۆیان دەربڕیوە ...) ئەمەش هەر لەبەرئەوەی، (تووركیا) و (ئۆردووگان) كردوویانە، ئەگینا گەر هەر دەوڵەتێكی موسوڵمانی دیكە بووایە، تەنانەت گەر دەوڵەتێكی عەرەبیش بووایە، سووكوڕیسوایاندەكرد، هەر وەك چۆن كاتی خۆی، (ئەنوەر سادات) سەرۆك كۆماری (میسر)، ڕێككەوتنی (كامپ دێڤێد)ی لەگەڵ سەرانی دەوڵەتی (ئیسرایل)دا واژۆكرد و سەریشی لە (ئیسرایل) دا، هەموو پارت و دەوڵەتە ئیسلامییەكان، ئەو كارەیان بە ناپاكیی دانا و پێوەندیی دیپلۆماسیشیان لەگەڵ (میسر) بڕی!

ئاخر (ئۆردووگان)، هەر ئەو دیكتاتۆرە فاشستە نەبوو، زۆر بە ڕاشكاویی گوتی: (زمانی كوردیی، لەسەر زەوی دەسڕمەوە.) كەچی مەلا (عەلی) ورتەی لێوە نەهات، بەڵكوو مەلایەكی كوردپەروەری موسوڵمانی وەك (مەلائاراز)، وەڵامی (ئۆردووگان)ی دایەوە. لە گرتە ڤیدیۆیەكدا، زۆر بە ڕاشكاویی دەڵێ: (یەكێ ئەوەندە مەغرووربێ، بڵێ: زمانی كوردیی لەسەر زەوی دەسڕمەوە.) ئاخر (چۆن دەسكاری ئیشی خوا دەكەی. خوای گەورە بە كوردیی درووستیكردووە ...) پاشان دەڵێ: (بە خوا هەر كەسێ پشگیریی ئۆردووگان بكا، پشگیریی ڕژێمەكەی بكا، بەشدارە لە هەموو ئەو كوشتنوبڕینانەی دەیكا. هەر كەسێ پشگیریی ئۆردووگان بكا، گەر بە دڵیش خۆشیبوێ، وەك ئەو پیاوكوژە ....) دواییش دەڵێ: (خوایە، تۆ بە كوردیی منت ئەفراندووە، منیش شانازیی بە كوردبوونی خۆمەوە دەكەم. شانازیی بە كوردیەتی خۆم و بە گەلەكەم و بە ئایینەكەشم ئەكەم كە موسوڵمانم.) 

پاشان ڕوویدەمی لە (ئۆردووگان) كردووە و گوتوویەتی: (مناڵێكی كورد، لە هەموو توورك بەئابڕوومەندترە، باوەڕدارتە. ئەی نەفرەتی خوات لێ بێ، وا ماڵی هەژاران داماودەكەی.) لە كۆتاییشدا گوتوویەتی: (یا ڕەبی خودایە، هەر كەسێ لەگەڵ ئەم دەوڵەتە شەریكە، لە دۆزەخ كۆیانكەیتەوە.) وەك لە ڤیدیۆكەشدا دەردەكەوێ، چ كارێكی بە ئەو سەرە بۆگەنە كردووە.

ئەم دوو مەلایە (قەرەداخی) و (قەرزاوی)، كە داكۆكیی لە (AKP) و (ئۆردووگان) دەكەن، وا دەزانن، گەلانی (تووركیا)، لە بەهەشتەكەی خوادا دەژین! ئەز بە لامەوە گرنگ نییە و بایەخ بە قسەكانی (قەرزاوی) نادەم، چی دەڵێ و چی دەنووسێ. چونكە عەرەبێكی موسوڵمانی شۆڤێنیی نەبێ، هیچی دیكە نییە. بەڵام خۆ مەلا (عەلی) بیەوێ و نەیەوێ، كوردە و خەڵكی شارۆچكەی (قەرەداخ)یشە، ئەوە هەستی بێ، ئایا لەگەڵ جاشە ئیسلامییەكانی (سووریا)دا، جیاوازیی چییە، كە لە داگیركردنی نێوچەكانی خۆراوای (كوردستان)دا، لەگەڵ سوپای تووركدا دژی كورد دەجەنگان؟!!

ئاخر (قەرەداخی) و (قەرزاوی)، چۆن پشگیریی داگیركەرێكی وەك (ئۆردووگان) ناكەن، لە كاتێكدا ئەو دوو پێشەوایەی ئیسلام، شاری (ئەستەنبوڵ) بە پایتەختی (خەلافەتی ئیسلام) و (ئۆردووگان)یش، بە جێنشینی موسوڵمانان دادەنێن؟! جا گەر لە ئەم سەردەمەدا، ئەمە كردەوە و ڕەوشتی جێنشینی موسوڵمانان (ئۆردووگان) بێ، ئاخۆ دەبێ، هەر لە سەردەمی یەكەمین جێنشین (ئەبوبەكری سدیق 632 – 634)، تا دوا جێنشینی ئیمپراتۆریای عوسمانیی (عەبدول مەجیدی دووەم 1922-1924)، واتە لە ماوەی ئەم (1390) ساڵەی فەرمانڕەوایی جێنشینەكانی ئیسلامدا دەبێ، كردەوە و ڕەوشتی ئەو جێنشینانە چۆن بووبێ؟!!  

هەروەها، كاتێ لە پەرلەمانی (كوردستان)، باسی ڕەوانشادانی ئەو بەشەی ڕۆژاوای (كوردستان) كرا، (ئەبوبەكر هەڵەدنی) كوردزمان، ئەندامی سەركردایەتی (یەكگرتوو)، لەبەر خۆیەوە بۆڵەیەكی كرد و گوتی: ئەوانە شەهید نین. تا سەرۆكی پەرلەمان خاتوو (ڕێواز فایەق) وەڵامیدایەوە و دەمكوتیكرد.

لە ڕاستیدا، هەرگیز نەمبیستووە، هیچ نەتەوەیەك هێندەی نەتەوەی كورد، هێندە ئالوودەی ئایینی ئیسلام بێ، كەچی هەموو دەوڵەتە ئیسلامییەكان بە گشتیی، (تووركیا، ئێران، عێراق و سووریا) بە تایبەتی، دژی مافە ڕەواكانی نەتەوەی كوردن، سەربەستیی و سەربەخۆیی نەتەوەیی پێ ڕەوانابینن، بەبیانووی ئەوەی گوایە، دژی پارچەپارچەكردنی خاكی ئیسلامن، بە مەرجێ (كوردستان)، هەرگیز خاكی ئیسلام نەبووە و نییە، بەڵكوو تەنیا موڵكی كوردە. بەڵام هەر لە سەرەتاوە، هیزە داگیركەرەكانی سوپای عەرەب، بە ناوی ئایینی ئیسلامەوە داگیریانكردووە، بە زەبری شمشێر و نووكی خەنجەر، ئەو ئایینەیان بەسەردا سەپاندوون!

ئاخر گەر ڕۆڵەكانی نەتەوەی كورد، بە شێوەیەكی ڕێكوپێك، نیشتمانەكەی خۆیان خۆشبویستایە، جیاوازییان لە نێوان ئایین و مافە ڕەواكانی نەتەوەی كورددا بكردایە، هەرگیز ڕۆژمان بە ئەم ڕۆژەڕەشە نەدەگەیی، بە دەیان مەلای بێ هەست و هۆشی نەتەوەیی وەك: (مەلائیدریسی بەدلیسی، مەلای خەتێ، مەلا عەلی قەرەداخی ...)مان تێدا هەڵ نەدەكەوت، هەموو كورد بە قوربانی دەسەڵاتێ یا سەركردەیەكی ئیسلامیی (عەرەب، توورك یا فارس) بكەن.

لە كۆتاییشدا لەگەڵ نووسەر و توێژەری گەورەی شیعەكاندا (ئەحمەد قوبانی)، پرسیارێ دەكەم و دەڵێم: (من دڵنیام، گەر موحەممەد كورد بووایە، بە هیچ شێوەیە، یەك عەرەب دوای نەدەكەوت، بە تایبەتی گەر قورعانەكەی بە زمانی كوردیی بووایە.)

ئەمەش دەقی بڵاوكراوەكەی هەردوو پێشەوای ئایینزای سووننە (عەلی قەرەداخی) و (یوسف قەرزاوی)یە، كە ڕۆژی (9. 3. 2022)، بە ناوی (یەكێتیی زانایانی موسوڵمانانی جیهان)ەوە بڵاویانكردووەتەوە. جا ئایا هەموو موسوڵمانانی جیهان، بە دەقی ئەو بڵاوكراوە زەردباوە قایلدەبن؟!!

نوێترین


کاریکاتێر

وێنەهەواڵ

© 2016 Dwryan.net. All Rights Reserved.