سەرەتا/ لەبارەی دابڕان/ پەیوەندی/

دیاردەی دانانی دارەمەیت لە سەر تەوالێتی مزگەوتەكان!

پێش 4 هەفتە



ماجد خلیل

پێشنیارێكی جددی  بۆ بەرپرسانی وەزارەتی ئەوقاف


لە كەلتوری ئێمەدا زۆرێك بە باڵای مردندا هەڵدەدرێ، هەمیشە باوەڕ بە ژیانێك لە پاش مردن، جۆرێك لە قودسییەتی داوەتە مردن. بەڕادەیەك وەختە مەرگدۆستی تەنگ بە ژیاندۆستی هەڵدەچنێ. بەڵام لە ئەرزی ئەوەی دەیبینین وەها نییە، ویژدانەن چەند نموونەیەك دەهێنمەوە بۆ خۆتان گەواهی گەورەیی پێگەی مردوو یان گچكەیی و گومەساریی بەهاكەی لێكبەنەوە.

یەكەم: 

دیاردەی دانانی دارەمەیت لە كوێدایە؟ دارەمەیت ئەو كەرەستە كلتوورییەیە كە كەسی مردوو دەخرێتە ناوی و  بەشانی چوار یان زیاتر پێی دەگوازرێتەوە بۆ سەر قەبران. 

كەواتە دارەمەیت دەبێ چۆن بێ؟ دوا وێستگەی كەسێك یان كەسوكارێكمان كە لە كاتژمێرێ یان زیاتر تێیدایە. 

دارەمەیتەكان لەكوێن؟ لە مزگەوتەكاندان، نیمانە نەیبینیبێت.  نیمانە پرسیاری كردبێ  بۆچی لەوێدایە؟ بۆ دەبێ دارەمەیت لە سەرووی ریزە تەوالێتەكانەوە دابنرێ؟ ئەم بڕیارە لە تەواوی مزگەوتەكانی ئاوایی و شارەكاندا شرۆڤەكراوە، ئەڵێی ئەمركراوە، دەڵێی غەسپە لەسەر دارەمەیت كە دەبێ لە سەرووی تەوالێتەكانەوە دانرێ. 

تەوالێتەكانیش سەر بەتاڵن، هاڵاوی بۆن و بەرامیان بەربۆتە دارە مەیتەكان، راستەوخۆ رەحمەتییەكانیش دەخرێنە ناویان.

 ئایا كێ رازییە بە زیندوویی دەستبداتە دارە مەیتی بان تەوالێتەكان؟ ئەدی چۆن قبوڵە دوا وێستگەی مردووەكانمان لەو شوێنەدا دابنرێ؟

ئەزانن ئەمە مانای چییە؟ مانای رقێكی راستەقینەیە لە مەرگ، مانای پاوانخوازی مرۆڤە بۆ دەرپەڕاندنی یەكتریی، مانای بێ ئەرزشی كەسانێكە كە دەسەڵاتیان نامێنێ، مانای بێهودەیی باوەڕداریی مرۆڤە بە ژیانی پاش مەرگ؟

 هەزاران ساڵ پێش ئێستا، فیرعەونەكانی میسر، مەوتنی مەردووەكانیان بە زێڕو زمڕوت دەڕازاندەوە، بەڵام ئێمە لە دوو هەزارو بیست ودوودا دارەمەیتەكانمان بەسەر تەوالێتی مزگەوتەكانەوە دادەنێین؟ 

ئەوا ئێمە بەدەگمەن توخنی مزگەوتەكان ناكەوین، خۆ خەڵكانێ رۆژی پێنججار وەختێ قەزای حاجە دەكەن، عەترو عەبیریان دەپرژێنن لە دارەمەیتەكان، قەد بیریان كردووەتەوە، دەكرێ سبەینێ خۆیان لەنێویدا رابكشێن؟ 

هەڵبەتە نازانم بۆ ئاڵامە ئەم بابەتە، وەلێ بەڕاستی بابەتێكی جددیە، گرفتی ئێمە فەرامۆشكردنی شتانێكی وەهایە، كە لە ڕاستیدا ڕازێكی گەورەی ژیانی ڕۆژانەمانە. 

باوەڕتان بێ لە خۆرئاوادا، مردوو پێش ئەوەی بنێژرێ، لەناو گوڵ و گوڵزاری دۆستەكانیدا بۆن و بەرامە كاست دەكات، پاشان دەنرێتە سندوقێكی تەختەی وەهاوە، پێت خۆشە تێیدا راكشێی، جیا لەوەی لە گۆڕستانێكی گەشاوەی پڕ حەوز و حەرەمی گوڵدا دەنێژرێ. 

نازانم بۆچی لێرە رێ و رەسمی ناشتنی مردوو، مەیدانی شیوەن و یەخە دادڕین و دەمی شۆفڵ و دارەمەیتی سەر تەوالێتت دێتە پێشچاو. 

لەبەر ئەوە پێشنیارم بۆ وەزارەتی ئەوقاف ئەوەیە، لێپێچینەوە لە مەلاو مجێور و وەردیانی ئەو مزگەوتانە بكرێ كە دارە مەیتەكانیان خستووەتە سەر تەوالێتی مزگەوتەكان، بەڕاستی دیاردەیەكی نامرۆڤانەیە.

دووەم :

 پەلەپەلكردن لە ئەسپەردەكردنی مردوودا، وەك ئەوەی ئۆردوویەك بەشوێن تەرمێكەوە بێ و بیانەوێ نەهێڵن بمرێ، وەك ئەوەی خەمێكی گەورە لە گۆڕێدا بێ تا بابای مردوو نەكا زیندوو بێتەوە، وەك ئەوەی بەپاڵ بكرێتە دەرەوەی ژیان، وەك ئەوەی لە كۆڵی كۆمەڵی زیندوو بكرێتەوە. بۆخۆم مەشهەدی هەڵكەندنی گۆڕم دیوە، بە زەنگەنێ قەسدیانە ئاو لە گۆڕەكە دەربێنن، پەلە پەلێكە مەحاڵە یەكدوانێ پەنجەیان نەبووبێت بەدامی پاچ و بێڵی یەكترییەوە، ئاپۆراكە ئەوەندەی بڵێی یەكو دوو مردووەكە شۆڕدەكەنە خوارێ، مردووی چی، نیانە یەخەی كفنەكەی تێكوپێك نەدرێ، بەڕاستی كوتانەوەی سەر گۆڕەكە گەواهی ئەو ڕاستییەیە كە چ قینێك لە مردن هەیە، نازانم ئەو تەپوتۆز و تەكاندانە چییە بۆ پڕكردنەوەی گۆڕی كابرا، نەمدیوە نەریتێكی هێواش و هێمن ئەسپەردەیەك بكرێ، تەنانەت ئێستەكانێ بە حەفارە حەفرەكە لێدەدەن، بە شۆفڵ شاردنەوەی تەرمەكە تەختدەكەن؟ بڕواتان بێ جارێكیتر گێڕاومەتەوە، مەڵڵای وەها هەیە كابرا توشی تەنگەنەفەسییەك یان پەتایەكی وەرزی بوە، دەڵێ ئا قەزانێ ئاوی بۆ گەرمكەن با زوو ئەسپەردەی كەین.

نوێترین


کاریکاتێر

وێنەهەواڵ

© 2016 Dwryan.net. All Rights Reserved.