سەرەتا/ لەبارەی دابڕان/ پەیوەندی/

شێریش بەگوێ بگرێ، هەر ئافرەتە

پێش 3 هەفتە



هیبە فەیسەڵ

پەند و ووتەی كورت لە هەموو كۆمەڵگا و چینەكانی بوونی هەیە. لە كات و شوێنی جیاوازدا بەكار دەهێنرێت بۆ خستنە پاڵ، یان پێناسە كردن یان بۆ كورت كردنەوەی بابەتێكی درێژ.

 

كۆمەلگای كوردیش دەوڵەمەندە لەم پەند و وتانە. هەنێكیان بۆ بەرز سەنگاندنی بابەتێكە و هەنێكی تریش بۆ سەرزەنشت و گاڵتە پێكردن. 

بۆ نمونە كاتێك دەوترێت شێریش بە گوێ بگرێ، هەر ئافرەتە.

 

لەگەڵم بن با كەمێك بچینە قوڵایی لێكدانەوەی ئەم ووتەیە: 

بەڕای من ئەم وتەیە هیچ قازانجێك یان جوانیەك نا بەخشێ بە بوونی ئافرەت وەك مرۆڤ ، وەك تاكێكی یەكسان ماف لە كۆمەڵگە. بگرە پڕە لە شكاندن و گیركردنی توانای ئافرەت لە چوارچێوەیەكی دیاری كراو. واتە پێناسە كردن و بەستنەوەی (ئازایەتی)بە بەرەنگار بوونەوەی ئاژەڵ و توانای جەسەدی. 

باشە كێشە لە بوونی ئافرەت چیە؟ 

- نیو ئەقڵە؟ ئەی بۆ ئەركی پەروەردە لە ماڵدا دەخرێتە سەر دایك؟ كاتێك كێشە ڕوو دەكاتە یەكێك لە مناڵەكان، یەكەم ڕستە كە پیاو بە هاوژینی دەڵێ ئەمەیە « ئەمەش نتیجەی تەربیەتی تۆ». 

- ترسنۆكە؟ جا كەس هەیە لە ڕۆحی خۆی نەترسێ؟ ئەی كێن ئەوانەی كە زۆر بە باوەڕێكی قوڵەوە بۆ ئایدۆلۆجیای جیاواز و (ئازادی بە هەموو جۆرەكانیەوە) دەدوێن و دەجەنگێن؟ 

- دەم درێژە؟ كێ لە هەقی خۆی و ناهەقی بێ دەنگ دەبێ؟ 

- گرینۆكە؟ هەر كەسەو چۆنیەتی دەربڕینی هەست و بیری جیاوازە لە یەكێكی تر. هەیە بە فرمێسك، هەیە بە چەپۆك، هەیە بە بێدەنگی. گەر كوڕیش هەر لە مناڵیەوە پێی نەوترایە « وس بە كوڕ نابێ بگری» ئەوا دڵنیام كە ئەوانیش ئێستا لە ریزی خۆمان بوون؟

هەر ئەو فرمێسكانەشە كە پیاو لە بەردەمیا ئەژنۆی ئەشكێ. كە هەزاران شاعر لەسەری ئەنوسێ و وەسفی گەورەیی دەكات. 

جا كاتێكیش بمانەوێ كە ئەم بابەتە (بە سەر ڕوانگە)بیبینین.. واتە بابەتەكە دەرهێنین لە قاڵبی دژە بەرایەتی پیاو، و جەنگی ڕەگەز، و كێ باشتر لە كێ، و كێ مافی كێی خواردوە، دەبێ لە بیر نەچێ كە هیچ لەم خاسیەتانە زگماك نین. بەڵكو لە لایەن تاكی كۆمەڵگە و نەریتەكانی خراونەتە پاڵ ئافرەت. جا ئەو «تاكە» نێر بێ یان خودی مێ خۆی. 

سڕینەوەی ئەم جۆرە پەند و ووتانە لە فەرهەنگی زمانی كوردیدا مەحاڵە. بەلام كار كردن لەسەر تێڕوانینمان بۆ ئافرەت، پێویستە لە سەر هەموو تاكێك، لە پێشا ئافرەت خۆی. 

بە بۆچونی من مەرج نیە ئافرەت بۆ دواكردن و گەیاندنی پەیامی، هەمیشە ڕووی قەڵەمی بكاتە پیاوان. ئەوەندەی ئافرەت پێویستی بە یەكگرتووی هەیە لە ناو خۆیدا، پێویستی بە چەپڵەی پیاو نیە. هەموو گۆڕانكاری و تازەگەریەكیش لە ڕێگە پێدان و دان پێدانانی تاك بۆ كێشەكان دەست پێدەكات.

جا ژنان، پشتگیری یەك بن. بە كەمی و هەڵەی ئافرەتێكی تر خۆتان هەڵمەسێنینەوە. زمانتان بە باسی ژنێكی تر تیژ مەكەنەوە. 

با سەركەوتوویی ، جوانی و بگرە فرمێسكی ئافرەتێكی تر هی تۆش بێت. ڕێزت بە مرۆڤ بونتەوەیە. 

چۆن داوای ماف دەكەی ، بە هەمان شێوە ئەركیشت لەسەرە. 

خۆت بە بەرامبەر بناسێنە بە كەم و كووڕی یەكانتەوە پێش تواناكانت.. فرمێسكەكانت بكەرە حبر (خیماڤ) و پێناسەیی پڕاوپڕی جوانی ناخ و هێزی خۆت پێ بكە. 

هێزت بخەرە پاڵ ووشەكانت، بیخەرە پاڵ كردارت ، نەك سێبەری باوك، برا یان هاوژین. 

خۆ بەراورد كردنت بە پیاو جەنگێكی بێ مانا و بێ ئەنجامە. تەنها خۆ لەدەست دان و خنكاندنی نەوەی نوێی لەدوایە.

پیاوان، ئێوەش ئافرەت مەشكێنن و پێیان مەڵێن ئازای وەك پیاو. 

ئازایی ، زیرەكی و جوانی جۆری جیاوازی هەیە. هەریەكەیان لە كات و شوێنی خۆیان جوان و پێویستن، جا چ لە پیاو بێت یان ئافرەت.

نوێترین


کاریکاتێر

وێنەهەواڵ

© 2016 Dwryan.net. All Rights Reserved.