سەرەتا/ لەبارەی دابڕان/ پەیوەندی/

ئیسلامی سیاسی تەنها هێندەی ئەم وێنەیە مونافیقە!

پێش 2 هەفتە



رێبین ئەحمەد رەشید

دەقیق چوار ساڵ بەر لە ئێستا لەم ئەكاونتە موتەوازیعەوە نووسیم جیهان لەسەروبەندی هەڵدانەوەی ماسكی گەورەترین مونافیقی خۆیدایە، دڵنیا بووم لە بێ مۆراڵی و هەلپەرەستییە سیاسییەكەی، بەڵام دڵنیا نەبووم وا بەزوویی ماسكەكەی بكەوێت، ناخۆشی ئەم وێنەیە ئەوەیە هەڵدانەوەی ئەو ماسكە ئایدۆلۆژیا پەرەستەكانی ئیسلامی سیاسی  شۆك ناكات كە بە بوقی ئەو مونافیقە بوونە قوربانیی جەندرمەیەكی دژە دیموكراسی و كرانەوە و  خوێنڕێژی وەك فەتاح سی سی، وا ئەمڕۆ ماسك هەڵدرایەوە و چوار پەنجەكەی ڕابیعەش لەبیر برانەوە و خوێنی سەدان جوامێر كرانە قوربانی هەلپەرەستیی ئەم دوو مرۆڤە ناشیرینەی سەدەی بیستویەك.

نیفاقی سیاسیی و دین دووشتی جیاوازن لەیەك، ئیسلامی سیاسیی بەداخەوە ئەمڕۆ شەخس سەنتەرە نەك حەقیقەت سەنتەر. ئیسلامی سیاسی لای سوننەكان هەنگاوێك ویلایەتە فیقهییەكەی ئێرانیشی تێپەڕاندووە بەوەی لەوێ ئایدۆلۆژیای دوازدە ئیمامی تەقدیس دەكرێت، لای سوننەكان سوڵتانێكی بێ مۆراڵی بێ ئایدۆلۆژیای هەلپەرەست. ئێستا لە هەر كاتێكی دیكە زیاتر ئیسلامی سیاسی توركی لەسەر نیفاق و پارادۆكسی سیاسیی دەژی و هەر بەم نیفاقەش دونیای عەرەبی و ئیسلامی خستۆتە هەلەكە سەمای گەڕانەوەی ئیمپراتۆرییەتی نیۆعوسمانی.

ئیسلامی سیاسیی شێرپەنجەی گەلانی ڕۆژهەڵاتی ناوەڕاستە، دەبێت لەبنەوڕا ڕیشەكێش بكرێت و دواتر چارەسەریی كیمیایی و ڕادیۆیی بۆ كۆمەڵگەكان بەكاربهێندرێت بۆ ئەوەی ئیدی كەس جورئەتی ئەوەی نەبێ بەناوی خوداوە قسە بكات و خۆی بكاتە سێبەری ئەو لەسەر زەوی بۆ مەرامە كەسی و سیاسیەكانی.

دڵنیام كە ئەم ڕێوییە پیرە لە مرۆڤ نەزاوە و شیری سیاسی لە مەمكی بونەوەرێكی  سەیر مژیوە، بەڵام دڵم بۆ ئەو مێزەر "سپی" و عەمامانە دەسوتێ كە ڕۆژانێك دەنوشتانەوە بۆ دەستماچكردنێكی ئەم پیرە ڕێوییە و ئومێدی موزەیەفیشیان لەژێر ناونیشانی خیلافەت و ئیمامەت و موعجیزەی ژمارە 6 بۆ شوێنكەوتووەكانیان لێ دروستدەكرد. پێشنیار دەكەم هەموو ئەو مەلاشێخ و موفتییە چەنەباز و  دەڵەك و ڕێوی پۆشانە كە بەخەڵكیان دەگوت بۆ پاراستنی شكۆی خەلیفە و ئابوورییەكەی بە خۆتان و بیكینی و مایۆكانتانەوە سەفەرەكانتان ببەنە ئانتالیا و لەوێ دۆلارەكانتان ساغ كەنەوە، هەر ئەمشەو  تەوبەیەكی نەسوح بكەن و سبەینێش لە بەرچاوی خەڵك ئاشكرای بكەن كە چ هەڵەیەكیان كردووە لە ڕابردوودا، سا بەڵكو لە دیوانی حەق تەعالادا ڕوسپی لێیدەرچن.

نوێترین


کاریکاتێر

وێنەهەواڵ

© 2016 Dwryan.net. All Rights Reserved.