سەرەتا/ لەبارەی دابڕان/ پەیوەندی/

نوێنەرانی خودا .... بڕگەیەك لە وتاری ”لە پەراوێزی نامەكەی مەلا كامەراندا“

01/12/2022



مەریوان وریا قانع 

”مرۆڤ بوونەوەرێكی شوناسسازە، خۆی شوناسی خۆی بەشێوازی جیاواز دادەهێنێت، دین تاقە سەرچاوەی شوناس نییە، سەرچاوەكانی شوناس هەمەجۆر و هەمەڕەنگن. بێگومان هەمیشە كەسانێك هەن دەشێت هەموو شوناسی خۆیان لەناو دیندا بدۆزنەوە، دین سەرەتا و كۆتایی شوناسی ئەوان بێت، بەڵام هەمیشە كەسانی تر هەن شوناسی خۆیان لە هەرشتێكدا بدۆزنەوە، لە دیندا نایدۆزنەوە. مرۆڤ بوونەوەرێكی پشكنەرە، دینداریی لای هەندێك دەرەنجامی گەڕان و پشكنینێكی گەورەیە، بەناو دونیایەك دوودڵیی و گومان و پرسیار و بێباوەڕیدا تێدەپەڕێتێت. بەڵام مرۆڤ دەشێت لە گەڕان و پشكنینەكانیدا هەموو باوەڕە دینییەكانی بەهێزتر و پتەوتربێت هەم ئەو باوەڕانە بدۆڕێنێت و لەوسەرەوە وەك بوونەوەرێكی بێدین بێتەدەرێ. ئەوەی مانا بە دین دەبەخشێت ئەم توانای گەڕان و پشكنینە ناوەكییەیە، ئەم ئەزموونە شەخسیی و تاكەكەسییەیە، نەك ئەوەی كەسانێك بێن و بەناوی خوداوە ببن بە رەقیب بەسەر ژیان و مرۆڤ و كۆمەڵگاوە، بەناوی یەقینێكی دینییەوە هەموو توانا و خولیا و خواست و ئەگەرێكی گەڕان و پشكنین لە مرۆڤ و كۆمەڵگا و ژیاندا، بكوژن.

هەموو ئەوانەی كە پێیانوایە نوێنەری خودان، یان نوێنەری یاساكان و خواستەكانی خودان، یاخود بەناوی خوداوە دەدوێن و بەناوی ئەوەوە دونیایەك دروستدەكەن پڕ لە ئەمر و نەهی قەتعیی، ئەوانە كەسانێكن بەر لەهەموو شتێك نە لە قازانجی دین خۆی و نە لە قازانجی دینداراندا كارناكەن، بەڵكو لە بنەڕەتدا فوو بە دروستكردن و گەورەكردنی دەسەڵاتێكی شەخسیدا دەكەن كە بە مەبەست ڕەگوڕیشەكانی دەبەنەوە بۆ ناو دین. لای ئەمجۆرە كەسانە دین باوەڕێكی ناوەكیی نییە، گەڕانێكی بەردەوام نییە، پشكنینی مرۆڤ بۆ خۆی و بۆ جیهان نییە، بەڵكو ئامرازێكە بۆ گەشەدان بە پێگەیەكی كۆمەڵایەتیی دیاریكراو، بەشێكە لە پیشەسازی دەسەڵات پەیداكردن و دەسەڵاتدارێتی. 

لەهیچ شوێنێكی دونیادا بەقەد ئەو ناوچەیەی ئێمە ”نوێنەرانی خودا” بوونیان نییە، لەشكرێك لەو ناوچەیەدا هەیە بێماندووبوون و دوودڵیی، بەشێوەیەكی بەردەوام بەناوی خودا و ئاسمانەوە دەدوێن، كتێبە كۆنەكان دەخوێننەوە و گوێ لە فەتوا دێرینەكانی ناو مێژوو دەگرن، ئینجا بەردەبنە ژیانی ئەو منداڵانەی كە هەزاران ساڵ دواتر و لەدونیایەكی تەواو جیاوازدا لە دونیای كتێب و فەتوا كۆنەكانەدا، لەدایكبوون. گوێ لە بڕێك لە خوێندەوارە دینییە كۆنەكان دەگرن و بە ئافرتانی ئەمڕۆ دەڵێن نابێت ئازادبن. ئەم فەتوا یانی ئەویتری سەردەمە كۆنەكان دەخوێننەوە و هاواردەكەن ”خودا ئازادیی و سەربەخۆیی ئافرەتانی پێناخۆشە“، ”خودا نایەوێت ئافرەت خۆی خاوەنی لەش و عەقڵ و بڕیاری ئازادانەی خۆی بێت“. بەبۆچوونی من خودای باوەڕدارە ڕاستەقینەكان لە كتێب و فەتوا كۆنەكاندا نییە، بەڵكو لەناو دڵ و دەرون و سەر و ویژدانی ئەواندایە، دڵ و دەرون و سەر و ویژدانێك، لە دونیا و سەردەمێكی نوێدا درستبوون تەواو جیاواز لە دونیای دڵ و دەرون و سەر و ویژدانی سەردەمە كۆنەكان.“

نوێترین


کاریکاتێر

وێنەهەواڵ

© 2016 Dwryan.net. All Rights Reserved.