سەرەتا/ لەبارەی دابڕان/ پەیوەندی/

راستە ماكی گەلی كورد لە خۆیدا ئیسلامییە؟

09/12/2022



عیماد عەلی

لەم چەند رۆژەدا، ئەو گفتوگۆیانەی لەسەر جێندەر هاتە ئاراوە زۆر شتی دەرخست، بەڵام لە هەمووی سەیرتر ئەوەبو كە دەوترا ئەم گەلی كوردە لە ماكی خۆیاد ئایینیە و لە نێو ئایینەكانیشدا ئیسلامیە و نابێت هیچ سیفەتێكی تری مرۆڤایەتی تێیدا پەیدا بێت، لەو قسانەش مەبەستیان تەنها ئەوە بوو كە نابێت یەكسانی نێرو مێ لە ناو كورددا هەبێت.

كە دەمی هەر ئیسلامییەك دەكەیتەوە، پێت دەڵێت: بۆ پیشاندانی ناخی گەلی كوردستان و ئیسلامبونە سروشتیەكەی هیچ پێویست بە بەڵگە ناكات، تەنها تەماشای رەفتار و تەنانەت ماكی گەلی كورد بكەیت جگە لەوەی سروشتەكەی  ئیسلامییانە بێت هیچ مۆركێكی دیكەی پێوە دیار نیە. باشە با خاتریانە بگرین و بڵێین وایە، بەڵام با ئێمەش ناخی ئەم ئایینە هەڵخەین و پرسیاررگەلێك لەو بارەوە بوروژێنین، بۆ ئەوەی راستودروستی ئەم بۆچونە و حەقیقەتی ماكی گەلی كورد بە وور لە جەوهەری راستەقینەی ئایین و ئەم ئایینی ئیسلامەش شیبكەینەوە و حەقیقەتی ئەم بۆچونە بۆ هەموو لایەك دەرخەین. دەكرێت باوەر بەم بۆچونە بكەین و زۆر بە راستی بزانین، ئەگەر لە ناوەخنی ئەم ئایینە سیفەتە دورگەییەكان و ئەخلاقی دەشتەكیی داگیركاری و دەستبەسەرداگرتنی موڵك و ماڵی ئەویتر و هەڵگری دابونەریتی بیابانی تێدا نەبێت، بۆ ئەوەی بۆمان بسەلمێنرێت كە لە رەوتی كاروانی ئەم ئایینەدا  ئەوە پشت راست دەكرێتەوە كە ئایینێكی گشتگیری هەمەگی  مرۆڤایەتیە و تایبەتمەندی جەزیرەی عەرەبی تێدا نیە و كوردیش لە بنەچەدا هەڵگری ئەو سیفەتانەیە.

 ئەوەی راستی بێت، نەك تەنها هەر كورد وەكو گەلێكی رۆژهەڵاتیی ناوچەی دەرپەرٍینی ئایینە ئاسمانیەكان ، بەڵكو  هیچ مرۆڤێك لەسەر ئەم زەویە نادۆزیتەوە لە پێش پەرەسەندنی باری فكری و دروستبوونی ئایین، لە ماكیدا ئایینی بێت نەك ئیسلامییش بێت. ئەمە لە لایەك، لەلایەكی ترەوە، لەوانەیە لە ماوەیەكی دیاریكراودا و پاش دروستبوون و دەركەوتنی ئایینەكان و گرنگیدانی هەر كەسێك بە ئایینی دڵخوزای خۆی كە ئاسمانی بێت یان وەزعی كە  سروشت و بیركردنەوەی خۆی لەگەڵ سروت و بنەماكانیدا بگونجێت یان بگونجێنێت . ئەوە لە بارودۆخێكی تایبەتدا جەوهەری ئایینداری بەروخساریەوە دیار دەبێت، نەك ماك و مۆركی كەسەكە بگۆرٍدرێت. 

ئەگەر وابوایە و كورد بەخۆی لە ناخیدا بە سروشت ئیسلامی بوایە، ئەی بۆچی ئەم هەموو شێخ و مەلاو واعیز و فەقێ و بانگخواز و سەیدانە كوردستانی تەنیوەتە و هەر یەكە و زانیاریەكی ناكۆك لەگەڵ ئەویتردا بڵاو دەكاتەوە و كوردیش بەحۆرێك باوەرٍی رەسەنی خۆی لە كیاندیا جێگیر بووە و تەنها بۆ خۆهەڵخەڵەتاندن نەبێت لە جەوهەری خۆیدا  باوەری بە هیجیان نیە، جگە لەوەی لەگەڵ رەسەنایەتی نەتەوەیی خۆیدا نەگونجێت. ئەگەر وا بوایە چی پێویستمان بە قوتابخانە و مزگەوت و دەرس و راڤە و شیكردنەوەی ئایینیمان دەبوو. ئەی داری فەتوا و وەزارەتی ئەوقاف و دامودەزگای ئایینی و كۆمەڵە و گردبونە و حزبی ئایینی ئیسلامی بۆچیمان بوو. ئەگەر ئایین ئیسلامی ماكیی ئەم كەلەی داگیركردبێت بۆچی ئەو بەرنامە و  پەیرەوی ئیسلامیە تەنانەت خۆی دەكات بە ژووری نوستنەكەیدا و لێی نابێتەوە. ئەگەر ئیسلامی پەیوەست بە كورد لانكەی خۆشی و چاكە و خێر بێت و كوردیش ماكی سەرەكی ئیسلامگەرا بێت و ئەو سیفەتە خۆی بەسەروسیمایدا چەسپاندبێت، بۆچی شەر و كوشتن و ماڵوێرانی و  خرابە،  رەوشتی زۆرێك لەم خەڵكە بێت.  كەس هەیە ئەو هەموو گەندەڵیە لەبیر بكات كە زۆرینەیان بە بەرگی ئیسلامی داپۆشراون و دەیانەوێت بە ناوی ئایینەوە پەردەپۆشی بكەن و خۆیان لێی پاكبكەنەوە. تۆ تەماشای ئەو هەموو مزگەوتە دەكەیت كە چەندین ملیۆن دۆلاری تێدەچێت و لەولاشەوە خەڵك هەیە برسی دەیكوژێت و لە چەقی نەداری و نەبوونیدایە و زەرەیەك دادگەری لەم كوردستانەدا بوونی نیە.

ئا بەم شێوەیە ماكی كورد ئیسلامگەراییە و ئەوەی پێناسەی ئیسلام بە دادگەری و یەكسانی و خێر و خۆشی دەكات و بە ئایینی مرۆڤایەتی لەقەلەم دەدات، كە ئەمانەش سیفەتەكانی بێت، چۆن دەبێت ماكەكەی ئەو شێوە ئایینە بێت كە خێری بەو شێوەیە بۆ جیهان هێنابێت. بۆیە ماكی كورد و هیچ مروڤێكی دیكە هیچ پەیوەندیەكی بە ئایین و ئیسلامییەوە نەبووە و نیە.

نوێترین


کاریکاتێر

وێنەهەواڵ

© 2016 Dwryan.net. All Rights Reserved.