پەیكار عوسمان
بەشی سێیەم
ئەگەرچی پەڕینەوە لە میزاجی كەسەوە، بۆ دابەشكردنی دەسەڵاتەكان و كاری دەزگایی و دەستووری، خاڵێكی گەشی مێژووی مرۆڤایەتییە، بەڵام لات سەیر نەبێ، پێشڕەوییە كەسییەكان و پاشەكشێ دەزگاییەكانی لای خۆمان، بە شتێكی باش ئەزانم، لەپێناو ڕاستی. بۆ ئەوەی چیتر ئەو درۆیە كۆتایی بێت، كە دەسەڵاتدارەكان، خۆیان لە پشتی دەزگای كارتۆنییەوە بشارنەوە.
دیموكراسی و دەزگاییبوونی ڕاستەقینە، لە كۆتاییهاتنی یارییە درۆیینەكانەوە دەستپێئەكات. جا وا باشە ماسكی ئەزموونەكەمان بكەوێ و بچێتە سەر پلێت، بۆئەوە نا كە تەسلیمی خێڵ و بنەماڵەكان ببین، بەڵكو بۆ ئەوەی چیتر ڕەخنە لە خودی پلێتەكە بگرین، نەك شەڕ لەگەڵ كەڤەرە گاڵتییەكان بكەین.
بابەتێكی زانستیم كەوتە بەرچاو، ئەڵێ ئەو خانە دەمارانەی كە (پرسە ئاینییەكان و پرسە سێكسییەكان) ئەوروژێنن، هەمان ناوچەیە لە مێشكدا.. شتێكی سەیرنەبوو بەلامەوە، چونكە لە واقعیشدا هەر وایە. هەر بەڕاست باسە سكسییەكان نەبووایە كاهینەكان چییان ئەكرد؟!
لەڕاستییدا ئاینی كاهینەكان هیچ نیە جگە لە گرێیەكی سێكسی پیرۆزكراو، ئاینی ڕاستەقینەش، كافربوونە بەو ئاینە گرگنەو بەرزبوونەوەیە بۆ ئەو ئاگایی و عیشق و ئیمانەی كە لای عارف و حەكیمەكان هەبوو، كە ئەوەش لەناو مرۆڤ خۆیدایە، نەك لە هیچ دوكان و پەرستگایەك.
ئەو ئایینەی كە لە كابول خوێندنی كچان قەدەغە ئەكا، ئاینی گرێ سێكسییەكەی پیاوە، نەك ئاینی مرۆڤێكی ئاگاو خوایەكی نوور. ئەو ئاینەی كە یەكسانی ژن و پیاو هەزم ناكاو فێڵبازانە "هاوڕەگەزخوازی" ئەكاتە پاساوی لێدانی "یەكسانی جێندەری"، ئا ئەوە ئاینی دەسەڵاتی پیاوسالارییە، نەك ئاینی حەقی خوایی.
جیاكاریی ستوونی، مەشروعی هێزو زاڵیتییە نەك مەشروعی حەق. مەشروعی حەق ئاسۆییەو لە حەقدا خواش دێتە پەیوەندی ئاسۆیی و ئەبێتە خەلیل و هاوڕێ ی ئیبراهیم، كەچی كاهینی پیاوسالار، واز لە خوایەتی ناهێنێ و نابێتە هاوتاو هاوڕێ ی ژن.
ڕووكەشبینی ئیسلامییەكان، تەنیا حیكمەتەكانی ناو قورئانی نەكوشت، بەڵكو حیكمەتی ناو ئەفسانەكانی تریشی مراند. هەر دەمئەكەنەوە ئەڵێن تەورات تەحریفكراوە، چونكە لە تەوراتدا خوا لەگەڵ فڵان پێغەمبەر پیاسە ئەكا.. لەكاتێكا ئەوە جوانترین و ئەدەبیانەترین وێنەی پەیوەندی مرۆڤ و خوایە. ئەوان خوایەك هەزم ناكەن هاوڕێ ی مرۆڤبێ و مرۆڤێكیش قبوڵ ناكەن هاوڕێ ی خوابێ، بەڵكو ئەبێ خوا سەدام بێت و مرۆڤەكانیش جوندییەكی ترساوی شەڕەنگێز.
خوا چاكەیەو چاكە لەناو خۆماندایە، ببین بە هاوڕێ ی چاكە، ئەبینە هاوڕێ ی خوداو ئیتر پیاسەشی لەگەڵ ئەكەین و چاشی لەگەڵ ئەنۆشین، چونكە ئیتر ئەوەی كە چایەكە ئەنۆشێ و ئەوەی كە چاكە، هەر یەكە. تەوحید ئەوەنیە ژمارەی بتەكان كەمبكەیتەوە بۆ یەك و ناوی بنێ ی یەهوا یان ئەڵڵا.. تەوحید ڕۆحی تۆیە ئەو كاتەی ئەگاتە دۆخی پیاسەكردن لەگەڵ خودا.
ئا لێرەدا مەسیحییەت لە دینەكانی تر باشتر لە شتەكە تێگەیشت، بەو مانایەی كە خودا نابێ شتێكی جیابێ لە مرۆڤ، بەڵام لەوێدا تێكیاندا كە مرۆڤێكیان جیاكردەوە لە مرۆڤەكانی ترو كردیانەوە بە خودا، لەكاتێكا چاكبوون و خوداییبوون ئیمكانێكی كراوەی هەموو مرۆڤەكانە.
ئەگەر بچینە لای دەروونە سیانییەكەی فرۆید: (ئید و ئیگۆ و سوپەرئیگۆ)، ئاینی كاهینەكان، ڕێك ئاینی ئیدە، هەموو شت بە غەریزە تەفسیر ئەكا، پاداشتەكانی ئەودنیاشی هەر سێكس و خواردن و خواردنەوەیە، كە داواكارییەكانی ئیدە. ئەو بەهەشتەی ئادەمی لێدەركرا، قۆناغی ژیانی ئاژەڵیی بوو، كە ئەخۆیت و ئەخۆیتەوەو سێكس ئەكەیت و نەمریشی، چونكە هۆشیار نیت بە مردن.
كاتێ مرۆڤ هۆشیاربووەوەو لە سێوی مەعریفەی خوارد، ئیتر زانی مردن هەیەو لەو كاتەوە بۆ نەمری ئەگەڕێ. بەهەشتی كاهینەكان بەهەشتی مرۆڤ نیە، بەهەشتی ئاژەڵە، پشیلەیەك ئەخواو ئەخواتەوەو سێكس ئەكاو "نەمریشە" چونكە نازانێ مردن چیە. كاهینەكان ئەوەیان ناونا بەهەشت، یەعنی ئەو قۆناغەی كە مرۆڤ بە پەرەسەندنی مەلاین ساڵ تێیپەڕاند، لە ئەخیرا ئەگەڕێتەوە بۆ ئەوێ و ئەبێتەوە بە حەیوانەكەی پێش ئادەم!
با ئید غەریزەبێ و ئیگۆ عەقڵبێ و سوپەرئیگۆ ئەخلاقی كۆمەڵگا بێت. پێغەمبەرو حەكیمەكان، ئەوانەن كە لە خۆیاندا هاوسەنگی ڕوویداوەو تەعدیلی سوپەرئیگۆیان كردۆتەوە بە ئیگۆیەكی عاقڵتر لەوەی كە هەیەو باوە. كاهینەكان بە پێچەوانەوە، سوپەرئیگۆیان هێناوەتە ئاستی ئیدو بەوەش ئیگۆ عاقڵەكەیان كوشتووە.
قەت لە خۆتت پرسیوە بۆچی پێغەمبەران هەمیشە تەنیابوون، بەڵام كاهینەكان هەمیشە دەوریان قەرەباڵغە؟ چونكە داناكان دەسكاری ئەو سایكۆلۆژیا ئیدییە ئەكەن كە كۆمەڵی لەسەر گیرساوەوتەوە، بەڵام كاهینەكان ڕێك نوێنەری ئەو سایكۆلۆژیا ئیدییەی خەڵكەكەن و پاریزگاریی لێ ئەكەن!
لێرەشەوە ئیتر شەقوەشێنەكە شەرت نیە سەلەفی بێت، بەڵام سەر بە هەمان سوپەرئیگۆی كاهینەكانە. كاتێ (ژن لەش سێكس) ئەبێتە گرێ و تابۆ و هەموو ئەخلاقی پێوە ئەبەسرێتەوەو كۆی سوپەرئیگۆی لەسەر بینائەكرێ، ئیتر شەقاوەیەكی حەشیشخۆرو نوێژكەرێكی موحتەرەم، فەرقی نامێنێ و هەمان سایكۆلۆژیاو عەقڵیەت و گرێ، لەناو هەردوكیاندا كارایە.
هاوپەیمانییەكی ڕانەگەیەنراو لەنێوان خێڵ و كاهین و دەسەڵات و عامەی خەڵكدا هەیە بۆ پاریزگاریكردن لە سوپەرئیگۆی پیاوسالاری، لەو پێناوەشدا بە هاوڕەگەزبازی و قەحبەبازی و بێئەخلاقی ئەوترسێنن، لەكاتێكا دوای ئەخلاقی پیاوسالاری، ئێمە ناكەوینە ناو بێئەخلاقییەوە، ئەكەوینە ناو ئەخلاقێكی مرۆڤانەترو هاوسەنگترو خواییترەوە. ئەگەر تەعدیلی سوپەرئیگۆ، كارێكی نائەخلاقیی بێت، كەواتە هەموو پێغەمبەران بێ ئەخلاق بوون، چونكە پێغەمبەرایەتی هیچ نیە، جگە لە پرۆسەی ئەپدەیت و تەعدیلكردنەوەی سوپەرئیگۆی باوی كۆمەڵگا.
ئەمر بە مەعروف، یەعنی هێشتنەوەی كۆنێك كە شایەنی مانەوەیەو هاتنی تازەیەك كە شایەی هاتنە. نەهی لە مونكەر، یەعنی تێپەڕاندی كۆنێك كە شایەنی تێپەڕاندنەو بەرگری بەرامبەر تازەیەك كە شایەنی نەهاتنە. ئەوە یاسای ئەپدەیتی سوپەرئیگۆیە، كە پێش مۆدێرنە، پێغەمبەرو حەكیمەكان كردویانە، دوای مۆدێرنەش لەبری "شەخس" دەزگاو دەستور كارەكە ئەكەن.
بەڵام كاهینەكان یاساكە بە هەڵگەڕاوەیی بەكارئەهێنن. ئەوەی كە پیویستە بێت، نایەڵن بێت، ئەوەی كە پێویستە بڕوا، نایەڵن بڕوا. ئیتر لەبری ئەوەی ئیگۆیەكی ئازادی عەقڵانی ئەپدەیتی سوپەرئیگۆ بكاتەوە، ئیگۆیەكی ترساوی ئیدیی، توند دەسئەگرێ بەوەوە كە هەیە.
ماویەتی