پەیكار عوسمان
- هەڵبژاردنەكە لەنێوان ئیسلامی و علمانیدا نیە، بەڵكو هەردو بەرەكە لە ئاستی هاوپەیمانێتی و لە ئاستی دەنگدەریشدا تێكەڵاوە، بەڵام عەقڵی ئیسلامییەكانی ئێمە، چونكە لەسەر كۆدی "وەلا‌ء و بەرا‌ء" بەرمەجەبووە، ئیتر وێنەكە دابەشی دوو ئەكاو شتەكەی لێ ئەبێ بە شەڕی بەدر!
- لەنێوان غەرب و شەرق و فەلەستین و ئیسرائیلیشدا نیە، چونكە خودی توركیا، لەسەر ئەو پەتانە یاری ئەكاو قاچیكی لەمدیو قاچێكیشی لەودیوە، نەكئەوەی هەردو قاچی لە هیچ لایەكدا بێت، كەچی تۆ شتەكەت لێبووە بە شەڕی حەتین!
- دارولحەرب و دارولئیسلام نەماوەو ئێستا ئەوروپا بڕوخێ، بەسەر موسوڵمان و مزگەوتا ئەڕوخێ و خودی بەریتانیا ماڵە ئارامەكەی ئیخوانەو فەرەنساش بەقەت سعودیە سەلەفی لێیەو توركیاش بەقەت هەردوكیان مەلهای تیایە، كەچی تۆ هێشتا خەتێك لە مێشكتایە، وائەزانی ئەودیوی خەتەكە وڵاتی كافرانەو ئەمدیویش وڵاتی ئیسلام!
- لەنێوان سونەو شیعەشدا نیەو دەنگدەری هەردولا تێكەڵە لە سونی و عەلەوی و ئەسڵەن دابەشبوونی تائیفی لە گۆڕێدانیەو هیچ لایەك ئەونە كەر نیە، كوتلەیەكی گەورەی دەنگ لەكیسی خۆی بدا.. یەعنی ئەوەی لە دوورەوە وائەزانی جیایە، لەوێ وانیەو تێكەڵە، ئەوەی لە دوورەوە وا ئەزانی نەگۆڕە، لەوێ پراگماتی و گۆڕاوە تا ڕادەی پۆپۆلیزم.
- كابرا خۆی، لەگەڵ سبلجان دائەنیشێ گۆرانی ئەڵێ، تۆ هێشتا لەو قۆناغەدای، كە گەورەترین جیهاد بەلاتەوە، ئەوەیە كە كوڕێك دەسی هێنا، كچەكە تەوقەی لەگەڵ نەكا! دەی ئەم عەقڵە، نەك لە وێنە گشتییەكەی ئەوێ، بەڵكو تەنانەت لە فۆڕمی موسوڵمانێتی و ئیسلامیزمی ئەوێش ئاگادار نیە!
- یەعنی كێشەكە هەر ئەوەنیە، كە ڕەگەڵكەوتنێكی ئایدۆلۆژی و مێگەلیی بوونی هەیە، بەڵكو ڕەگەڵكەوتنێكی وەهمی و ناتێگەیشتنێك لە ئارادایە، چونكە بە عەینەكی سادەی ڕەشوسپییەوە، ناتوانی وێنەی ئاڵۆز و ملەوەن ببینیت!
- بینینی واقع ئاسان نیە، چونكە واقعی پوخت و "وێنەكە وەكو خۆی" بوونی نیە، ئەو بە پێشمەرجەكانی خۆیەوە بۆتی نمایش ئەكا، تۆش بە پێش مەرجەكانی خۆتەوە ئەیبینیت.. بەڵام كێشەكە ئەوەیە كە پێشمەرجەكەی تۆ وەلا‌و و بەرا‌و بێت و عەینەكەكەت ڕەش و سپی بێت، كە ئەمە نزمترین كوالیتی بینین، یاخود هەر خودی كوێری و نەبینینە!
- ئەم وەلا‌ء و بەرائە، پرەنسیپێكی سیاسی نیە، بەڵكو نەخۆشییەكی نەفسییەو ئیتر تۆ دایمە لەناو سایكۆلۆژیای شەڕدایت، دایمە دنیا دوو لەتەو لەتێكی دوژمنی تۆیە، جا لەبەرئەوەی ئەمە لە واقعدا وانیەو هەموو كات شەڕ نیە، سیاسەتیش گۆڕاوەو ڕەنگە دوژمنی دوێنێ دۆستی ئیمڕۆ بێت.. ئیتر ئیشت ئەكەوێتە نەزەریەی موئامەرەو داتاشینی دوژمنی نادیار، بۆ نمونە ماسۆنیەت!
- دەسەڵات و هێز، پێویستی بە پێچە بەدەورەی زمانیی نیە، بۆیە زمانەكەی ڕەق و ڕاستەوخۆیەو ترش و خوێ ی تیانیە، سەلەفیەت وایە، چونكە مەزهەبی سونە، ئەوەتەی هەیە مەزهەبی سوڵتەبووە، پێشتر خیلافەت و دواتریش هاوپەیمانێتی لەگەڵ ئالسعود.. بەڵام شیعە چونكە زیاتر قاچاخ و موعارەزەبووە، ئیتر هەزار پێچە بەدەورەی زمانی و تەقییەو مەزڵومیەتیان هەیەو ئەو كاتەشی كە دەسەڵاتیان هەیە، هەر ئەكڕوزێنەوەو ئەگرین!
- ئیخوانیش وەكو شیعەیە، چونكە لە سەرەتاوە لێی دراوەو هەر قاچاخ و موعارەزەبووە، ئیتر دنیایەك یاری زمانی و تەقییەو خۆفەقیركردنەوەی هەیەو كاتێ كە دەسەڵاتیشیان هەیە، هەر ئەكڕوزێنەوە. مەسەلەن، بیست ساڵە ئەردۆگان و ئیسلامیی، خۆیان دەسەڵات و ستەمگەرەكەن، كەچی ئیخوانێكی خۆمان، بە تۆنی مەزڵومیەتەوە بۆیان ئەپاڕێتەوە!
- وەلا‌و و بەرا‌و تەرجەمەی ڕەنگی بكەیت، ئەبێ بە ڕەش و سپی و دنیایەك ڕەنگ هەیە كە نایبینێ و نایخوێنێتەوە. تەرجەمەی فیكری بكەیت، ئەبێت بە فاشیزم و دۆزەخەكەی هیتلەرو ستالین، ئەتاتورك و خومەینیت بۆ دروست ئەكا، كە ئەگەرچی ئایدۆلۆژیاكەش جیاو پێچەوانەبێت، بەڵام نەتیجەكەی هەمان دۆزەخە!
- تەرجەمەی كوردی بكەیت، ئەبێ بە لۆژیكە گڵاوەكەی شۆڕش: "جاش و باش". لەگەڵمبی باشی و لەگەڵم نەبی جاشی، كە ئا لێرەدا، هیچ شتێك "بە دوژمنیشەوە"، بەقەت شۆڕش زەڕبەی لە عەقڵی كوردی نەداوە. بۆ ئازادی و ڕزگاری، ئێمە پێویستمان بە عەقڵێكی كاراو كراوەبوو، سەت ساڵە كورد بیری نەكردۆتەوەو عەقڵی تەڵاقداوە، چونكە عەینەكی شۆرش، هی بیركردنەوە نیە، هی كۆتاییهێنان بە بیركردنەوەیە، ئیتر دنیاكە ڕەش و سپییەكی پێشتر پێناسەكراوە، كە شۆرش پێنەسەكەی كردوەو تەواو!
- كورد بۆ ڕزگاری پێویستی بەوەبوو پلەیەك بچێتە سەرو عەقڵی دوژمنەوە، نەك لەگەڵ دوژمن ببن بە شێرو خەتی هەمان عەقڵیەت. شۆڕش هات دیوەكەی تری فاشیزمی دروستكردو ئیتر كورد كەوتە نێوان دوو فاشیزم. عەینەكی دەوڵەت هەر ڕەش و سپی ئەخوێنێتەوەو لەگەڵی نەبی جاشی، عەینەكی شۆڕشیش هەر ڕەش و سپی ئەخوێنێتەوەو لەگەڵی نەبی جاشی، ئیتر بە دوو فاشیزم كوردیان هاڕی.
- جا ئەوە هەر ئیسلامییەكە نیە، كە لەدوورەوە، هەڵبژاردنی توركیای سادە كردۆتەوە بۆ بەرەی ئیسلام و كافر و شەڕی بەدر، بەڵكو لاكەی تریش، كورتیكردۆتەوە بۆ جاش و باش و شەڕی دابان هەلاج، كە ئەوە هەمان ئاستی بینینە. فاشیزم پەیوەندی بە مەزڵومیەتەوە نیەو ئێمەی كورد چەنێك مەزڵومین، ئەونەی تریشی بخە سەر، ئیخوانی میسر چەنێك لێ ی دراوە، ئەونەی تریشی بخە سەر، هێشتا ئەو دیدە ڕەش وسپییە ڕزگارت ناكا لە فاشیزم، چونكە خۆی دیدێكی فاشیستانەیە!
- سەت ساڵە لەسەر مستەوای ڕۆژهەڵات، "ئیسلامیزم"و لەسەر مستەوای كوردستان، "شۆڕش"، نەیانهێشتووە مرۆڤی كوردو موسوڵمان بیر بكەنەوە. گڕێ ی باش و جاشەكەی شۆڕش و گرێ ی وەلا‌و و بەرائەكەی ئیخوان، عەقڵەكەی داخستووەو ئیتر عەینەكەكە هەمان كوالیتییەو بەس ڕەش و سپی ئەبینێت، كە بەراورد بە ئاستەكانی تری بینین، ئەوە ناوچەی كوێرەو حسابكە مزمەعیلین!
- یەك ڕێگا هەیە بۆ ڕزگاری كورد، ئەوەی كە عەقڵی بچێتە سەرو عەقڵی دوژمنەكەی، كاتێ ئەو لەسەر گێڕی فاشیزمە، تۆ لەسەر گێڕی پلۆرالیزم بیت، ئەگەر وا نەبیت، ئیتر شەڕی دوژمنیش نەبێ، شەڕی ناوخۆ دەسپێئەكاو خۆمان ئەبینە دوو بەرەو بەرئەبینە یەكتر، چونكە كۆدەكەمان دووانیی داناوە!
- ئەمریكا بۆچی لە سۆڤێتی بردەوە؟ خۆ لەبەر ئەوە نەبوو كە لیبرالیزم كۆتایی مێژووبێ و كۆمۆنیزمیش ئێكسپایەرو بەسەرچووی ناو ئەو مێژووە بووبێ.. خۆ لە ئاستی دەرەوەشدا فەرقییان نیەو عەینەكی هەردوكیان ڕەش و سپییەو دنیایان دابەشی دوو كردو هەر یەك ئەویتری بە شەیتان كرد.. فەرقەكە لەناوەوەبوو!
- لەناوەوە لیبرالیزم، پلۆرالەو ئەگەرچی بەشی عەقڵە مێگەلییەكە، كلاسیكۆی كۆماری و دیموكراتی سازكردوە، بەڵام یاساو دەزگاو دەستورەكەی، لە سەرو لۆژیكی ڕەش و سپی و حەزی مێگەلەكانەوەیە، پەیوەندی بە بەها گەردوونییەكان و مافی مرۆڤەوە هەیەو ئەمەیان قەبەلی و ناوچەی ململانێ نیە، بەڵكو ناوچەی ئازادو یەكسانە بۆ هەمووان، بەڵام سۆڤێت لەناوەوە قەبەلیی بوو، ڕەش و سپییەكەی بردە ناوەوەو ئیتر قەبیلەیەك سەركەوت و هەموو شتێكی داگیركردو ناوچەی ئازادو یەكسانی تیا نەما!
- من كارم بەوەنیە لەوێ كێ ئەیباتەوەو كێ ئەیدۆڕێنێ، كارم بەو عەقڵیەتەیە كە لێرە ئامادەیە. بۆ دەسكاریكردن و بەرزكردنەوەی لیڤڵی عەقڵەكەش، پێویستمان بە گۆڕینی ئایدۆلۆژیاكەت نیەو چیت هەر ئەوەبە، تەنیا پێویستمان بە گۆڕینی عەینەكەكەت هەیەو لە كوالیتی دووانییەوە بیكەیت بە كوالیتی فرەیی.
- ئیسلامییت هەر ئیسلامیی بە، تەنیا عەینەكی وەلا‌ء و بەرا‌ء لابە. كوردایەتی ئەكەی بیكە، تەنیا عەینەكی جاش و باش فڕێدە. چەپیت هەر ئەوە بە، تەنیا عەینەكە ڕەش و سپییەكە بكە بە ملەوەن.. چی لەوە باشترە هەموو ئەمانەمان هەبێ و هەریەك بۆشایی خۆی پڕبكاتەوە؟ بەڵام بە عەینەكی دووانییەوە، كەس بۆشایی خۆی پڕناكاتەوە، بەڵكو هەریەك شوێنی ئەوانیترو كۆی وێنەكە داگیر ئەكات.
- مەسەلەكە پرسی زانینە، شتانی وەكو هەڵبژاردنی توركیا، بۆ ئێمە گرنگێكی پلەدوون، پلە یەك ئەوەیە، كە خۆمانی لێوە بناسین، عەیبێكی خۆمانی لێوە بدۆزینەوەو زانینمانی پێ زیاد بكەین. "عەینەكی ڕەش و سپی" لە ئاستی موعارەزدا فیتنەیەو لە ئاستی دەسەڵاتدا ستەمكارییەو لە هەردوكیشیدا فاشیزمە. ئا ئەوە بزانین ئیتر لیڤڵی عەقڵەكە بەرزئەبێتەوەو (هل
يستوي الذين يعلمون والذين لا يعلمون)؟