سەرەتا/ لەبارەی دابڕان/ پەیوەندی/

ڕەوتی سەلەفییەت باڵ بەسەر زانكۆ‌ و پەیمانگاكانی کوردستاندا دەكێشێت‌

21/04/2018


بەهۆی پاشەكشەی رێكخراوە خوێندكاری‌و مەدەنییەكان جموجوڵی سەلەفییەكان لە ناوەندەكانی خوێندن فراوان دەبێت.

ئەگەر لەرابردودا زانكۆ وەك ناوەندێكی كراوە‌و رێچکەشكێن ناوی دەركردبێت، ئەوا ئێستا خەریكە ئەم تایبەتەمەندییەی لەدەستدەدات، بەهۆی پاشەكەشەی رێكخراوە خوێندكاری‌و مەدەنییەكانەوە، سەلەفییەت خەریكە باڵ بەسەر زانكۆ‌و پەیمانگاكاندا دەكێشێت‌و بەشێك لە خوێندكاران ڕوو لەو ڕەوتە ئاینییە دەكەن.

❞ ئەگەر لەرابردودا زانكۆ وەك ناوەندێكی كراوە‌و رێچکەشكێن ناوی دەركردبێت، ئەوا ئێستا خەریكە ئەم تایبەتەمەندییەی لەدەستدەدات ❝

شارۆ شیروان، (٢٣ ساڵ) خوێندكاری بەشی زانستە سیاسیەكانە لە زانكۆی سلێمانی، بە یەكێك لە گەنجە سەلەفییەكانی ناو زانكۆ ناسراوە، ئەو نیگەرانە لەوەی “زۆربەی خوێندكارانی زانكۆ و تەنانەت هاوڵاتیانیش لەڕەوتی سەلەفیەت تێنەگەیشتوون”.
شارۆ  وتی “بەرواڵەت بریار دەدەن‌و نازانن چۆن مامەڵە بكەن لەگەڵ ئێمەدا، بۆیە زۆربەی خوێندكارەكان لەسەرەتادا باش مامەڵەیان لەگەڵ ئێمەی سەلەفی نەكردوە، بەڵام دوای تێكەڵاو بوون لەگەڵمان مامەڵەیان گۆراوە”.


❞ خەڵك وادەزانی كە كەسێك ریشی درێژ بوو شەرواڵەكەی كورت بوو كەسێكی دواكەوتوەو بروای بە پێشكەوتن نیە بەڵام ئەمە راست نییە ❝

چەند ساڵێكە شەپۆلی سەلەفییەت وەك ڕەوتێكی ئاینی لە هەرێمی كوردستان ڕووی لەگەشەكردن كردوە، لە ئێستادا ئەم ڕەوتە لە ناو ناوەندەكانی خوێندندا ڕەوتێكی چالاكە‌و لەرێگەی بانگەواز‌و دابەشكردنی نامیلكەوە كار بۆ راكێشانی خوێندكارانی زانكۆ‌و پەیمانگاكان دەكەن بۆ ناو ڕەوتەكە.

محەمەد عەباس، گەنجێكی دیكەی تەمەن ٢١ساڵە، ئەو خوێندكاری كۆلێژی بازرگانییە لە زانكۆی سلێمانی، بەبڕوای محەمەد، سەلەفیەت ئێستاش لە “گەشەكردندایە” لە تەواوی جیهان‌و هەرێمی كوردستان “چونكە ئەمە تاكە فكرەی ئیسلامی راستە كە پێویستە جێبەجێبكرێت”.
ئەو وتی “پێكەوە بەستنێكی بەهێز لە ناو خوێندكارە سەلەفیەكان لەنێو زانكۆكاندا هەیە، سەلەفییەكان لە هەركوێ یەك هەبن وەك زنجیرێك پێكەوە بەستراون‌و یەكتری تەواو دەكەن”.

ئەو گەشەسەندنە بەردەوامەی سەلەفییەكان لەناو ناوەندەكانی خوێندندا، لەكاتێكدایە پێشتر لە زانكۆی سلێمانییدا بە دەیان چالاكی رۆشنبیری‌و مەدەنی ئەنجامدەدران، زانكۆش وەك ناوەندێكی باڵای مەعریفی جێدەستی بەسەر زۆربەی بوارەكانەوە دیاربوو.
د.فاتیح سەنگاوی، توێژەرو مامۆستای زانكۆی گەشەپێدانی مرۆی كە ماوەی زیاتر لە ١٠ ساڵە لە بواری بیری ئیسلامی كاردەكات‌و لەوبوارەشدا دەیان پەرتوك‌و لێكۆڵینەوەی هەیە، گەشەسەندنی سەلەفی بۆ پشتیواییەكانی دەسەڵات دەگەڕێنێتەوە بۆ ئەو ڕەوتە.


❞ سەنگاوی: سەلەفی رەوتێكی سنورداربوو، لەماوەیەكی كەمدا زۆربەیان كران بە وتاربێژی مزگەوتەكان بەمەبەستی بڵاوبونەوەی ئەم فكرە ❝

سەنگاوی وتی “سەلەفی رەوتێكی سنورداربوو، لەماوەیەكی كەمدا زۆربەیان كران بە وتاربێژی مزگەوتەكان بەمەبەستی بڵاوبونەوەی ئەم فكرە، هەروەها دەكرێ بۆ لێدان لە ئیسلام خۆشی بەكاربهێنرێتەوە، سەلەفییەكان بەهۆی فراوانبوونی میمبەرەكانیانەوە توانیان مخاتەبەی زۆرترین خەڵك بكەن، ئەمەش كاریگەری هەبوو لە سەر بڵاوبوونەوەیان بەڵام ئێستا وانەماوە”.

ئەو پسپۆڕەی بواری ئاین ئەوەش دەخاتەڕوو، لەسەر ئاستی ناوخۆو دەرەوەش هاوكاری هەیە بۆ سەلەفییەكان، دیارە ئەوەش بەمەبەستی ئەوەی دژی پارت‌و رێكخراوە ئیسلامیەكانی كوردستان بەكاریانبهێنن.
فاتیح سەنگاوی، دەڵێت سەلەفییەكان لە هەرێمی كوردستان‌و ناوەندەكانی خوێندن بە بەرنامە كار دەكەن لە سەر فراوانبوون‌و زیادكردنی ئەندامەكانیان، هەندێك ئەمە بەمەترسی دەبینن لە سەر ئایندەی هەرێمی كوردستان‌و هەندێكیش بەشتێكی ئاسای سەیری دەكەن، چونكە ئەو جۆرە سەلەفیەتەی كە بلاو دەبێتەوە سەلەفیەتێكی كراوەیە.

بەڵام ئەگەر هاتوو ئەم سەلەفیەتە كە وتە ژێركاریگەری رەوتی سەلەفیەتی جیهادیەو گۆرا ئەوە بێگومان مەترسی گەورە دروست دەبێت لە سەر تاك بە تاكی هەرێمی كوردستان”. سەنگاوی وای وت.
ئەگەرچی كاریگەری سەلەفییەكان بەسەر زانكۆوە بە ڕوونی دەبینرێت، بەشێك لە كوڕان ڕیش دەهێڵنەوە‌و پانتۆڵ‌و شەرواڵی كورت لەبەردەكەن‌و خوێندكارە كچەكانیش حیجاب‌و پەچە دەكەن، بەڵام ئەمە نەبووەتە هۆی ئەوەی سەرۆكایەتی زانكۆ بە دیاردەییەكی دیاری ببینێت.


❞  سەلەفییەكان لە هەرێمی كوردستان‌و ناوەندەكانی خوێندن بە بەرنامە كار دەكەن لە سەر فراوانبوون‌و زیادكردنی ئەندامەكانیان❝
د.ئاراس فەریق زەینەڵ، جێگری سەرۆكی زانكۆی سلێمانی بۆ كاروباری خوێندكاران ڕایگەیاند، ئەو گروپانەی كە لەناو زانكۆن سەلەفی بێت یان هەر رەوتێكی دیكەی ئاینی، بە فەرمی نەهاتوون داوای چالاكی بكەن، هیچ شتێكیشیان دیار نییە كە ئایا ئەو گروپانە سەلەفین یان سەر بەهەر رێكخراوێكی دیكەی ئیسلامی بن.

د.ئاراس زەینەڵ، وتیشی”ئەوان هەندێك شتی تایبەتییان هەیە كە نەبۆتە كێشەیەك لەناو زانكۆ، یاخود تاوەكو ئێستا كەسێك سكاڵای لەدژیان نەكردوون، بۆیە ئێمەش لەو روانگەیەوە بەمەترسییان نابینین”.

سەرچاوە – ژیان

نوێترین


کاریکاتێر

وێنەهەواڵ

© 2016 Dwryan.net. All Rights Reserved.