سەرەتا/ لەبارەی دابڕان/ پەیوەندی/

لە کێشمەکێشی سیاسی و نیشتمانیدا... فەتوایان بۆ کوفراندن و کوشتنی کورد سازو ئامادەیە

16/11/2019


 

سەروەر پێنجوێنی

گەلانی ئیسلامیی سەردەست و خاوەن دەسەڵات و بەرژەوەندیی سیاسی و ئابووری و نەتەوەیی و بنەماڵەیی، لە هەموو قۆناغەکاندا بەرامبەر کورد (و هەر گەل و نەتەوەیەکی تری ژێردەست و بەش‌خوراوی کۆمەڵگای ئیسلامی) بۆ پاراستنی بەرژەوەندیەکانیان پەنایان بۆ بەکارهێنانی چەکی ئایینی و فەتوای "تەکفیر" و ڕاگەیاندنی هەڵمەتی سەربازیی "جیهاد" و "غەزو" بردووە، و بۆ ئەمەش هەموو جیاوازی و تایبەتمەندییەکی کولتووری و ئایینداری و مەزهەبیی کوردیان قۆزتووەتەوە، و هەموو جووڵانەوەیەک و هەموو سەر-بە-خۆییەکی کوردیان بە پۆلێن‌کردنێکی ئایینی و ناووناتۆرەی ئایینی ئابڵووقە داوە. ئەمە لە کاتێکیشدا کە هەموو کاتێک سۆزی ئایینیی کوردیان بەکارهێناوە بۆ مەبەستە سیاسیەکانی خۆیان، و لە جەنگاوەرانی کورد هەڵمەتی جیهاد و جەنگی پیرۆزی خۆیان سەر ڕێ خستووە، و هەر بە بەشێکی کورد کە وابەستە و چاولەبەر و چاوبەرەوژێری خۆیانن ڕووبەڕووی بەشە ئازادی‌خواز و سەربەستەکە بوونەتەوە.
ئەم مێژووە بەدناوەی چینی فەمانڕەوا و دەسەڵاتی سیاسی و ئایینیی گەلانی سەردەست و دەسەڵاتداری موسوڵمانی دەوروبەرمان، هەمیشە خۆی دووبارە دەکاتەوە. لەم وتارەدا چەند دیمەنێکی کۆن و تازەی ئەم مێژووە دەخەینەوە بەر چاو.

تورکە عوسمانیەکان و تێڕوانینیان بۆ کورد
سوڵتانە عوسمانیەکان هەمیشە گەلی کوردی موسوڵمانی سوننیی ژێر دەستی خۆیان لە کێشمەکێشە سیاسی-مەزهەبیەکانی خۆیاندا بەکارهێناوە، و کردویانن بە گژی کەمایەتیە ئایینی و مەزهەبی و ئێتنیکیە ژێردەستەکانی دراوسێیاندا، و لە کێشمەکێشی خۆیان لەگەڵ دەوڵەتی صەفەوییش کردوویانن بە ئامڕاز و سەرەنێزە. لەگەڵ ئەوەشدا تورک هەمیشە بە گومانەوە بۆ موسوڵمانێتی (بە قەولی خۆیان "مسلمانلق")ی کوردیان ڕوانیوە. بەتایبەتی کە کورد فرەڕەنگی لە ژیانی ئایینداری و مەزهەبییدا هەبووە و هەیە، و هەبوونی چەند ئایین و ئایینزا و شێوازێکی ئایینداری لە کۆمەڵگای کوردەواریدا واقیعێكە، و کورد بە شێوەیەکی گشتی، و هەتاکوو زۆرینە موسوڵمانە سوننیەکەیشی، بە دەمارگیری و توندڕەویی ئایینی و مەزهەبی نەناسراوە و زیاتر مەیلی بەلای لێک‌بوردن و قبووڵ‌کردنی جیاوازیەکاندا هەیە، ئیتر کۆمەڵگای موسوڵمانی سوننیی تورکی و عەرەبییش بەم دەمارگیریە ئایینی-مەزهەبیە دەناسرێتەوە و ئەم دەمارگیریە بووەتە نیشانە و پێوەری باوەڕداری تێیدا (زۆربەی کات، دەمارگیریی ئایینی و ڕق‌بوونەوە لە ئەوانی جیاواز لە ئاییندا؛ دەبێتە پێوەری باوەڕداری! ئێستەش زۆر موسوڵمان هەن جگە لە دەمارگیری و ڕق لە ناموسوڵمان هیچی تری لە ئیسلام پێ نەبڕاوە، و خۆیشی بە موسوڵمانی نموونەیی دەزانێت).. بە هۆی ئەمانەوە کورد، هەتاکوو کوردی موسوڵمانی سوننی، کەم‌باوەڕ و ئایین‌کاڵ هاتووەتە پێش چاویان. ئەم تێڕوانینە، لە پەندێک و گوتەیەکی میللیی تورکیدا بەم شێوەیە کورت کراوەتەوە کە ـ وەکوو خۆرهەڵاتناسی ڕووسی (بازیل نیکیتین) لە "کوردەکان: لێکۆڵینەوەیەکی سۆسیۆلۆجیایی و مێژوویی" (١٩٥٦)ـدا لێیان دەگێڕێتەوە ـ دەڵێت: "کورد هەر بەبەراورد بە بتپەرستەکان موسوڵمانن"!! (١) یانی کاتێک کوردی موسوڵمان بە گەلێکی فرەپەرست (یان هەتا کۆمەڵگای ئێزدیی کوردی کە عوسمانیەکان بە بتپەرست و "شەیتان‌پەرست" ناویان بردوون) بەراورد بکرێن؛ ئەمان لە ئیسلامەوە نزیکترن، ئەگەرنا موسوڵمانی ستاندارد نین!
بە جۆرێک ڕاستیش دەکەن: موسوڵمانێتیی کورد ـ بەگشتی ـ وەکوو موسوڵمانێتیەکەی ئەوان نیە! موسوڵمانێتیەکەی ئەوان لە جەوهەردا شکۆمەندکردنی ڕەگەزی تورکی و سەرکردەی تورکی و مێژووی تورکیە، ئایدیۆلۆجیایەکە بۆ داگیرکاری و زەوت‌کردن. ئەوان ئیسلامیان ناوێت ئەگەر دەسەڵات و بەرژەوەندیی تورک دەستەبەر نەکات، و موسوڵمانیشیان ناوێت ئەگەر لە خزمەتی بەرژەوەندیی ئەواندا نەبێت. مێژوویان شاهیدە.

فەتوای خومەینی بۆ "جیهاد" دژی کورد
دوای سەرکەوتنی شۆڕش بەسەر ڕژێمی شاهەنشایی لە ئێران، و بە هاوکاری و هاوبەشیی هەموو پێکهێنەرەکانی کۆمەڵگای ئێرانی، بە چەپ و بەرەی ئایینیەوە، بە شیعە و ئەهلی سوننەوە، بە فارس و کورد و بەلۆچ و گەلانی ترەوە، "ئیمام" (خومەینی) و دارودەستەکەی، کردیان بە شۆڕشی ئیسلامی و هەلی مێژوویی هاتنەسەرکاری ڕێبازی شیعەی دوازدە ئیمامی و "حکوومەتی مەهدی" و دەسەڵاتی "وەلیی فەقیهـ"ی سێبەری. بۆیە هەر زوو بۆ دزینی تەواوەتیی شۆڕش و بۆ "پاراستنی دەسکەوتەکانی شۆڕشی ئیسلامی" هەموو بەرەکانی تر ئابڵووقە دا و سەرکوت کرد. هەموو ڕابەرانی پێکهێنەری سوننی ڕاوەدوونران و لەناوبران، و چەپەکان قەدەغە کران، و بۆ سەرکوت‌کردنی دەنگی کورد و بزووتنەوەکەی لە خۆرهەڵاتی کوردستان، خومەینی لە (١٩ / ٨ / ١٩٧٩)، هەر دوای کەمتر لە ساڵێک لە شۆڕش، فەتوای "جیهاد" و کوشتاری دژی کوردی ژێردەستی ئێران دەرکرد، کە بۆ جێبەجێ‌کردنی هەڵمەتێکی سەربازی کرایە سەر ناوچە کوردنشینەکان، و بەتایبەتی ئەوەی پێی دەڵێن "ئوستانی کوردستان"، و بە زەبری "ئەرتەش" و "سوپاسی پاسداران" (یانی "حەرەسی شۆڕشی ئیسلامی"!)، بە هێرشی سەربازی و زنجیرەی لەسێ‌دارەدان دەرهەق بە چەکدار و مەدەنیی بێ‌چەک، هەموو جووڵانەوەیەکی کورد و داوای هەر جۆرە سەربەخۆییەکیان داپڵۆسی، لەژێر ناونیشانی "فەتوا"ی "ئیمام" کە هەموو کوردێکی بەرهەڵستکاری بە "کافر" و ناموسوڵمان دادەنا، و مەلا (صادق خەلخالی)ی وەکوو نوێنەری خۆی ناردبووە کوردستان، کە "حاکمی شەرع"ی "دادگاکانی شۆڕش" بوو، و لە دادگایی‌کردنێکی شکڵیی چەند خولەکیدا بڕیاری کوشتنی گەنج و لاوەکانی دەردەکرد و جێبەجێ دەکرا. ئەوەش لە وەڵامی داواکاریی کوردیدا کە داوای دیمۆکراسی لە ئێران و مافی خۆبەڕێوەبردنی کوردستان بوو. ئێستە چل ساڵ بەسەر ئەو هەڵمەتە نەگریسەدا تێپەڕیوە، بەڵام شوێنەوارەکانی هەر بەردەوامن، و هیچ کاتێک ئەو تاوانە گەورەیە لە بیر ناچێتەوە، بەتایبەتی کە لەژێر ناوی "فەتوا" و "شەرع"ـدا ئەنجام دراوە.

 

ئەنفالی صەددام و ناموسوڵمان پێشاندانی کورد
ڕژێمی بەعسیی صەددام، بۆ گرتنی هەموو ڕێگەیەک لە بزووتنەوەی کوردیی "کوردستانی باشوور" و دابڕینی ئەو بزووتنەوەیە لە ئاوەدانیەکانی کوردستان و قەدەغەکردنی ئەو ناوچانەی کۆنتڕۆڵی تێدا لاواز بوو، چەند هەڵمەتێکی دوورخستنەوە و ڕاگواستن و لەناوبردن و بێ‌سەروشوێن‌کردنی دەرهەق بە خەڵکی کوردی ئەو ناوچانە سەر ڕێ خست، کە بە هەڵمەتەکانی "ئەنفال" ناسران. لە بەیاننامە سەربازیەکانی ئەم هەڵمەتانەدا ڕژێمی صەددام هەندێک ئایەتی سوورەتی "الأنفال"ی وەکوو دروشم و سەرمەشق بەکارهێنابوو، و ـ لێرەوە ـ وەکوو دەسکەوتی جەنگی ئیسلامی ("أنفال" ص "غنائم") بەرامبەر "کافران" گیان و ماڵ و سامانی کورد پێشان درابوو. لە هەمان کاتیشدا و بۆ دەستخستنی ڕەوایەتیی ئەم هەڵمەتانە، بەتایبەتی لە کۆمەڵگای عەرەبی-ئیسلامیدا، جگە لەوەی کوردی بەگشتی بە هاوکار ڕژێمی ئێرانی (و ڕژێمەکەی خۆیشی بە "پاسەوانی دەروازەی خۆرهەڵاتی"ی "نیشتمانی عەرەبی") پێشانی عەرەب دابوو؛ هەوڵی دابوو کورد لەبەر چاوی گەلانی عەرەبدا وەکوو کۆمەڵگایەکی یاخی لە ئیسلام کە دروشمە سەرەکیەکانی ئیسلامی پشت‌گوێ خستووە و وازی لە ئیسلام هێناوە بخاتەڕوو. هەتا دەگێڕنەوە وەفدی عەرەبییان بە هەندێک شاری کوردستاندا گێڕاوە و لەو کاتەدا دەنگی بڵنگۆی مزگەوتەکانیان بڕیوە بۆ ئەوەی وا دەرکەوێت کە دروشم و ئەرکە سەرەکیەکانی ئیسلام لە شارەکەدا پەک‌خراون و کورد وازی لە ئیسلام هێناوە!  

ئەردۆغان و بەکارهێنانی گوتاری ئایینی و هەست‌وسۆزی ئایینی
و سوپا "موحەممەدی"ـەکەی 
و بەرزکردنەوەی سوورەتی "ئەل-فەتح" بەرامبەر کورد
ڕەنگە هیچ سەرکردەیەکی دژ-بە-کوردی گەلانی دەوروبەری کوردستان بە ئەندازەی (ئەردۆغان) پەنای بۆ گوتاری چەواشەکاری و چاوبەستی و فریودان نەبردبێت، بە شێوەیەک توانیویەتی بەشێک لە کوردیش، لە باکوور (و هەتاکوو لە باشووریش!)، بکاتە پاشکۆی سیاسەتەکانی خۆی. ئەردۆغان نایەوێت هاوسۆزیی جەماوەرێکی کوردی چاولەبەری خۆی لە دەست بدات کە وابەستەی ئایدیۆلۆجیا مەزهەبی و سیاسیەکەی خۆین، بۆیە هەمیشە لە گوتاریدا دەیدات بە گوێی خەڵکدا کە ئەوان کێشەیان لەگەڵ کورد وەکوو گەلێک نیە، بەڵکوو کێشەیان لەگەڵ ئەو هێزە چەکدار و بەرهەڵستیکارانەیە کە ئەو بە "تێرۆریست" ناویان دەبا (هەندێک سیاسیی کوردی هەرێمی کوردستانیش هەمان گوتار دووبارە دەکەنەوە! دیارە سەر بە ئەون!). شتێکی بەڵگەنەویستە کە هەموو ستەمکار و داگیرکەرێک هەر کێشەی لەگەڵ ئەو بەشەی کۆمەڵگادایە کە بەرهەڵستیی دەکەن و زۆرداری و داگیرکاریەکەی لێ قبووڵ ناکەن، و کێشەی لەگەڵ مێگەلە سەرکزەکە و لەگەڵ جاش و چڵکاوخۆر و پاشکۆ و کۆیلەکانی خۆی لەو کۆمەڵگایەدا نیە. جا وایش هەڵ‌کەوتووە بزووتنەوەی ڕزگاری‌خوازیی کوردی لە باکوور لە ئایدیۆلۆجیایدا باکگراوندێکی چەپی هەیە، بۆیە ئەردۆغان (و بەدوایدا ئیسلامیەکانی کوردستانی خۆیشمان!) بیانووی کەوتووەتە دەست بۆ ناشیرین‌کردن و "تەکفیر"کردنی ئەو بزووتنەوەیە، لە کاتێکدا داواکاریەکە داواکارییەکی دیمۆکراتانەیە و داوای مافی خۆڕێبەڕی و مافی نەتەوەییە کە مافێکی یاسایی و شەرعییشە، و پەیوەندیی بە ئینتیمای ئایینی و مەزهەبیەوە نیە. 


هەر بۆیە ئەردۆغان، جگە لەوەی لە هەموو هەلێکدا تۆمەتی هەمیشەیی "تێرۆریستی"ی خستووەتە دوای هەموو هێزە ڕزگاری‌خوازە کوردیەکان لە باکوور و لە خۆرئاوایش؛ لە چەند بۆنەیەکدا (وەکوو وتەیەکی بە بۆنەی کردنەوەی فڕۆکەخانەی نوێی دیاربەکر ٢٠١٦، کە فڕۆکەخانەیەکی سەربازییشە) بە هەلیشی دەزانێت بڵێت: ئەوانە ئاتێیست ("مولحید")ـن، و "زەردەشتی"ـن Bunlar ateist, bunlar zerdüşt، و خەریکی بڵاوکردنەوەی ئایینی زەردەشتین!(٢) جا ناشزانێت بڵێت "زەردەشتی" zerdüştî، بەڵکوو وەکوو عەوام دەڵێت "زەردەشت" zerdüşt، وەکوو ئەوانەی بە "مەسیحی" دەڵێن "مەسیح" و بە "مارکسی" دەڵێن "مارکس"!
لە هەڵمەتە سەربازیەکەیشیدا بۆسەر خۆرئاوای کوردستان، بۆسەر عەفرین و کۆبانێ و شار و ئاوەدانیەکانی خۆرهەڵاتی کوردستانی خۆرئاوا، دیسان ئەردۆغان هەمان گوتار دووپات دەکاتەوە، و بەڵکوو هاوشێوەی صەددام کە سوپاکەی و چەکەکانی بە ناوی ئیسلامی ناودەنا، ئەمیش ئەو سوپایەی کە ناردوویەتی بۆسەر کوردستان ناوناوە "سوپای موحەممەد"! و بە فەرمانی سەرۆکی کاروباری ئایینی لە تورکیا مزگەوتەکانی تورکیا سوورەتی "ئەل-فەتح" لە نوێژەکاندا دەخوێنرێت! کە دەقێکی قورئانە سەبارەت بە "فەتح‌"کردنی مەککە، واتە گرتنەوەی مەککە و سەندنی لە دەستی "کافر" و "موشریک"ـەکانی. ئەمەش ئەو پەیامە دەدات کە کوردەکان "کافر"ن و دەبێتە ناوچەکانیان "فەتح" بکرێن لە هەڵمەتی "جیهاد"دا! بەم شێوەتە "شەرعیەت"ی ئیسلامی دەکرێت بە بەری ئەو لەشکرکێشیە ناڕەوایەدا کە جگە لە پاراستنی بەرژەوەندیەکان و سەرکوت‌کردنی کورد و ڕێ‌گرتن لە هەر جۆرە سەربەخۆییەکی کورد هیچ ئامانجێکی تری نیە، کە لە پێناوی ئەو ئامانجەدا ئامادەن باری دیمۆگرافیایی ناوچەکەش بگۆڕن و کوردی تێدا بکەن بە کەمینە و لاوەکی. هەر بۆیە لە هەمان کاتدا پاڵنەری بەرژەوەندیخوازی و کێشمەکێشی نەتەوەیی و مەزهەبییش لە ناوچەکانی باکووری سووریا لە دژی کورد بەکاردهێنن، و هۆزە عەرەبیەکان و گرووپە تورکمانیەکان و "ئیخوان"ی سووریا و هەتاکوو بانگەوازچیانی "یەکێتیی خاکی سووریا"(!) و هەر شتێکی تر (هەتاکوو سوپای ڕژێمی سووریا!) دەکەن بە گژی کورددا و گەلەکۆمەیان لە کورد پێ دەکەن. ئەو هێزە کوردیانەش کە ڕووبەڕووی وەستاونەتەوە، کە پێشتر تاکە هێزی ڕاستگۆی ڕووبەڕووبوونەوەی داعش بوون، لە گوتاری ئەردۆغاندا هەم "تێرۆریست" و هەم "مولحید"ن!

داعش و پۆلێنە ئایینیەکانی بۆ کورد
هەروەکوو ئەردۆغانی پشت‌وپەنایان، داعش لە ڕاگەیاندنی خۆیاندا، هەمیشە پۆلێنی ئایینی و چەکی "تەکفیر"یان دژ بە کورد بەکارهێناوە: دەسەڵاتی کوردی و هێزی پێشمەرگەی هەرێمی کوردستانیان بە "موڕتەددەکان" ناوبردووە، و هێزە کوردیە چەکدارەکانی کوردستانی باکوور و خۆرئاوایان بە بیانووی باکگراوندی چەپیان بە "مولحیدەکان" ناوبردووە. جگە لە پۆلێن و ناووناتۆرەکانی تریان بۆ هەموو لایەک، جگە لە ئەردۆغان و حکوومەتەکەی کە هەتا ئێستە هیچ ناووناتۆرەیەکی ئیسلامییان شوێن نەخستووە.
شایەنی ئاماژەیە و جێی داخە، کە هەندێک لە ئیسلامیەکانی کوردستانیش هەمان بیانوو لە هێزەکانی (پ‌ك‌ك) و هەتاکوو (ی‌پ‌گ‌) و (پ‌ی‌د) دەگرن! بەوانە دەڵێن "مارکسی" و "مولحید"، و لایەنگری هێزە ئیسلامیەکانی سووریان کاتێک لەگەڵ هێزە کوردیەکان کێشمەکێش دەکەن! لە کاتێکدا کورد لەو ناوچانە تەنها دەیەوێت خۆی بپارێزێت لە هەر دەستدرێژی و داگیرکاری و تێرۆرێک، و بەڵکوو دەستی هاوکاریی بۆ کەمینەکانی تر و هۆزە عەرەبیەکانی ئەو ناوچەیەش درێژ کردووە و لەگەڵ هێزە هاوکارەکانی تردا بەرەی "هێزە دیمۆکراتەکانی سووریا" (هـ‌س‌د)ی پێك‌هێناوە. لەم حاڵەتەدا کورد خاوەنی مافی "شەرعی"ـە نەک ئەو هێزە بەکرێ‌گیراو و هاندراوانە دژی کورد، بەڵام ئیتر وابەستەیی ئایدیۆلۆجیایی؛ تۆوی چاوبەستەیی پێوەیە! ئیسلامیەکانی کوردستان بە حوکمی ئایدیۆلۆجیا دڵیان لەگەڵ پڕۆژەی ئیسلامی-سوننیە بۆ سووریای دوای ئەسەد، نەک سەربەخۆییەکی کورد کە سەر بەو پرۆژەیە نەبێت و لەو چوارچێوە ئیسلامیە خوازراوەدا نەبێت.

فەتوای سەربڕینی کورد،
لە ڕابەرێکی گرووپەکانی سوپای نیشتمانیی سوریایی سەر بە ئەردۆغانەوە
لەناو ئەو هێزە چەکدارە عەرەب و تورکمانی و سوننی-ئیخوانیانەی سووریا کە ئەردۆغان ڕای‌گرتوون و ڕاهێنانی پێ کردوون و ئەجێندای خۆییان پێ دەخاتە سەر پێ و بەریان دەداتە دژەکانی خۆی بەتایبەتی کورد، لە سەرکردەیەکی بەشێک لەو هێزانەی پێشتر بە ناو (سوپای ئازادی سووریا) بوون و ئێستە لەژێر ناوی (سوپای نیشتمانیی سوریایی) ("الجيش الوطني السوري") ڕێکخراونەتەوە و هاوکاری سەرەکیی ئۆپەراسیۆن و هەڵمەتەکانی سوپای تورکیان، فەتوایەک بۆ کوشتن و سەربڕینی کورد بەگشتی دەرچووە.
جانەوەرێکە پێی دەڵێن (ئەبوو ئیسلامی دێری) ("أبو إسلام الديري")، گوایە مەلایەکی سەلەفیە، و سەرکردەیەکە لە فەیلەقی ناوبراو بە "المجد" کە سەر بە (سوپای نیشتمانیی سوریایی)ی ناوبراوە.

ئەم کرێ‌گرتە و چڵکاوخۆرەی سوپای تورکیا، لە تۆمارێکی دەنگیدا کە (موستەفا بالی) لێپرسراوی نووسینەی ڕاگەیاندنی (هـ‌س‌د) لە تویتەری خۆی(٣) بڵاوی کردەوە (٣ / ١١ / ٢٠١٩) [هەرچەند مێژووی خودی تۆمارە دەنگیەکە بەوردی دیار نیە]، لە مزگەوتێکی شاری (رأس العين) (بە کوردی "سەرێ کانیێ")ـەوە دوای داگیرکردنی، کە شارێکی سەرسنووریە لە سنووری سووریا-تورکیا، "فەتوایەکی شەرعی" ڕادەگەیەنێت دەرهەق بە کورد، بەگشتی، دوای ئەوەی بە "بەراز" ناویان دەبات، سوێند بە قورئان دەخوات و دەڵێت: فەتواکە کە دەرچووە بە دەق فەرمان دەدات کە کوردەکان وەکوو مەڕ سەربڕرێن، بە فەرمانی "شەرع"(!) دەبێت بکوژرێن، و نەفرەت "لعنة"ی خوایان لێ بێت! ("هؤلاء يقتل شرعا, ويذبح كذبح الأنعاج والغنم, و‌‌أقسم بالقرآن الكريم هذه فتوى: هؤلاء يذبح شرعا, يقتل شرعا هؤلاء الأكراد، لعنة الله عليهم"). و دەڵێت: ئەگەر ئێمە ئەم جارە ئەم فەرمانە جێبەجێ نەکەین و هەر وا بهێڵین بڕوات؛ ئیتر هیچ "خێر"ێکمان تێدا نیە!  
وەکوو پاساوێکیش بۆ ئەم فەتوایە کە بەم شێوەیە پێشینەی نەبووە؛ دەڵێت: ئەوانیش ژن و منداڵی ئێمەیان کوشتووە! و لە کۆتاییدا دەڵێت "کوردەکانی پەکەکە". 
بەم شێوەیە بە بیانووی ئەوەی لەگەڵ هێزە کوردیەکانی خۆرئاوا، کە گوتاری ئەردۆغان هەمیشە بە لقی (پ‌ك‌ك) ناوزەدیان دەکات، بەشەڕهاتوون و ڕووبەڕوو بوونەتەوە؛ لەسەر مینبەری مزگەوتەوە فەتوای کوشتن و سەربڕینی کورد دەردەکات. ڕوونیش دیارە کە مەبەستی تەنها کوشتنی جەنگاوەر و بەرەی جەنگ نیە، کوشتنی جەنگاوەر لە بەرەی جەنگ پێویستیی بە فەتوا نیە، و جەنگاوەر وەکوو مەڕ سەرنابڕرێت. بەڵکوو دیارە ئامانج لە فەتواکە هەر هاوڵاتییەکی کوردی ئەو ناوچانەیە کە سەر بە خۆیان نین، و وەکوو خۆیان چڵکاوخۆری سوپای تورکیا و کلکەکانیان نین.  

پەراوێز:
(١) نيكيتين، باسيلي، الكرد: دراسة سوسيولوجية وتاريخية. ترجمة: د. نوري طالباني. بيروت: دار الساقي. الطبعة الثانية،٢٠٠١. ص. ٣٤٠.
(٢) بۆ نموونە؛ بڕوانە:
Erdoğan: Bunlar ateist, bunlar zerdüşt.... (Cumhuriyet), 28 Mayıs 2016
(٣) بڕوانە:
Mustafa Bali: "An imam called Abu Islam who is working with Turkish-backed proxies avdises to fighters..."@mustefabali, 3 November 2019

نوێترین


کاریکاتێر

وێنەهەواڵ

© 2016 Dwryan.net. All Rights Reserved.