سەرەتا/ لەبارەی دابڕان/ پەیوەندی/

ژنان ئامادەكاری بۆ سێیەمین كۆنفرانسی فێمێنیزمی رۆشنگەری دەكەن

11/01/2020


ژنانی فێمێنیزمی ڕۆشنگەری، لە هۆڵی ئازاد هەورامی لە سلێمانی كۆبوونەوە، ئامانجی كۆبوونەوەكەش تاوتوێكردنی بەرنامە و تەوەری سێیەمین كۆنفرانسی فێمێنیزمی رۆشنگەری بوو، كە بڕیارە لە كۆتایی مانگی سێی ئەمساڵ بە دروشمی "بەرەو هەڵوێستی فێمینیستی و ڕۆشنگەری كۆمەڵایەتی"  بەڕێوەبچێت.

لە كۆبوونەوەكەدا كە مەلا بەختیار سەرپەرشتیاری گشتی پلاتفۆڕمی دابڕان ئامادەیبوو، بیروڕا ئاڵوگۆڕ كرا لەسەر تەوەری سێیەم كۆنفرانس و ئامادەكارییەكان بۆ بەڕێوەچوونی، بەتایبەت كە وەك ژنانی فێمێنیزمی ڕۆشنگەری ئاماژەیان پێكرد، ئێستا هەوڵەكان و هێزی بەردەوامی فێمێنیزمی ڕۆشنگەری لە قۆناغ و قەڵەمبازێكی گۆڕانكاری بەریندا خۆی دەبینێتەوە، نەریتی ناوچەكەش لە پێودانگی سیاسەت و كۆمەڵایەتیدا خۆی لە ساتەوەختێكی هەستیاردا نومایندەكات.

 لە كۆبوونەوەكەدا مەلا بەختیار  بەپێدانی ڕاوێژ و گفتوگۆكردن لەسەر تەوەرەكانی كۆنفرانسی داهاتوو بەشداری كرد و چەند پێشنیازێكی خستەڕوو، بە ئامانجی ئەوەی تەوەرەكانی كۆنفرانسی ئایندەی فێمێنیزمی ڕۆشنگەری بابەتگەلێكی زیندووی قۆناغەكە بن  و توێژینەوەكانیش هەر لەو چوارچێوەیەدا پێشكەش بە سێیەمین كۆنفرانسی فێمێنیزمی ڕۆشنگەری بكرێن.

لە كۆتایی كۆبوونەوەكەدا ژنان لەسەر پێنج تەوەر گفتوگۆیان كرد كە ئەوانیش:
یەكەم: ڕۆڵ و هۆشیاری ژنان لە گۆڕانكارییە هەنوكەییەكانی ناوچەكەدا.
دووەم: ، فێمێنیزم و بەرگری شۆڕشگێڕانە و ڕۆڵی سیاسی ژنانی ڕۆژئاوای كوردستان.
سێیەم: خوێندنەوەی هاوچەرخ بە چەمكی جێندەر.
چوارەم: ژن لە دونیای سەرمایەداریدا.
پێنجەم: پێگەی ژنان لە دۆخی ئێستای ئیسلامی سیاسی دا.

نوێترین


کاریکاتێر

وێنەهەواڵ

© 2016 Dwryan.net. All Rights Reserved.