سەرەتا/ لەبارەی دابڕان/ پەیوەندی/

لە ساڵیادی تێرۆركردنی هونەرمەندێكی رۆشنگەردا
هونەرمەند و رۆشنگەری شەهید سلێمان حەسەن

18/07/2020


* ناوی تەواوی (سلێمان حاجی حەسەن)ـە.
* لە ۱۹٦۹ لە خێزانێكی رۆشنبیر لە رانیە لەدایكبوە.
* لە ۱۹۸۱ لە خولێكی فێربونی موزیك بە سەرپەرشتیی (م. هیوا مستەفا) تێكەڵی كاری هونەریی و موزیك بوە.
* لە ۱۹۸۲ بەشداریی یەكەمین چالاكیی هونەریی كردوە.
* بۆ پەرەپێدانی هونەرەكەی، زۆر خولیای بوە لە دوای تەواوكردنی قۆناغی ناوەندییەوە بچێتە پەیمانگای هونەرەجوانەكان، بەڵام بە هۆی بارودۆخی ئابوریی خێزانەكەیەوە، ئەو خەونەی نەهاتۆتەدیی.
* ئارەزومەندانە و بە عەشقێكی زۆرەوە، خۆی پەرەی بە بەهرە و تواناكانی داوە و بەردەوام سەرقاڵی راهێنان و خۆپەروەردەكردنی موزیك بوە، هاوكات بەردەوام خوێندویەتییەوە و هەوڵی بەرزكردنەوەی ئاستی رۆشنبیریی و مەعریفیی خۆی داوە.
* ساڵانە بەشداریی لە چالاكیی قوتابخانەكاندا كردوە.
* ساڵانی هەشتاكانی سەدەی رابردو و دوای راپەڕینیش بەشداریی چەندین فێستیڤاڵ و ئاهەنگ و چالاكیی هونەریی (تیپی مۆسیقای كێوەڕەش، تیپی مۆسیقای رانیە)ـی كردوە لە رانیە و شار و شارۆچكە جیاوازەكانی كوردستان و عیراقدا، لەوانە: رۆژی جیهانیی موزیك، جەژنی نەورۆز، ساڵیادی پێنجی ئازار، ساڵیادی كیمیابارانی هەڵەبجە، رۆژی جیهانیی كرێكاران، ۲۲ـی رێبەندان، ۲٥ــی گەلاوێژ، ساڵیادی حزبی شیوعیی، ...
* هاوكاری (تیپی مۆسیقای زۆزگ)ـی منداڵانی رانیە بوە.
* لە چەند بەرهەمێكی هونەریی جیاوازدا بەشداریكردوە، چ لە تۆماركردنی سرود و چ گۆرانیی، جگە لە هونەرمەندانی ناوچەكە، لە بەرهەمی هونەرمەندان: (نەجمەدینی غوڵامیی، بەكری لەگزیی، حەمە رانیەیی، ...)  بەشداری كردووە.
* لە كۆڕەوەكەی ۱۹۹۱ـدا، وەك هەڵوێستێكی نیشتمانیی و رۆشنبیرانە، هەمو ئامێرەكانی تیپی مۆسیقای رانیەی بردۆتەوە ماڵەوە و لە فەوتان و دەستی تاڵان پاراستونی.
* لە ۱۹۹۲ ئامادەیی بازرگانیی رانیەی تەواوكردوە.
* ئەندامی حزبی شیوعیی بو.
* خاوەن كەسێتییەكی رۆشنبیر و رۆشنگەر و بیركراوە بو، بەردەوام گفتوگۆی فیكریی و مەعریفیی دەكرد، بە تایبەت سەبارەت بە ئەقڵانییەت و كرانەوە و ئازادیی ویژدان و باوەڕ، بۆیە لایەنێكی ئیسلامی سیاسیی فتوای تێرۆركردنی دەدات و، شەوی ۱۹۹۳/۷/۱۷ لەبەردەم مزگەوتی (نەوڕەسیی) لە رانیە تێرۆركرا و، بوە قوربانیی بەرگریكردنی لە هونەر و كەلتور و موزیك و جوانییەكانی ژیان، دژی داخران و تاریكیی و مەرگدۆستیی. هونەرمەندی جوانەمەرگ، شەهیدی دەستی غەدر و تاریكاندنە، بە داخەوە دوای تێرۆركردنیشی وەك پێویست یادی نەكراوەتەوە و ئاوڕ لە هزر و بەخششەكانی نەدراوەتەوە.
درود بۆ گیانی شەهید سلێمانی هونەرمەندی رۆشنگەر و، یادی هەمیشە زیندو.

نوێترین


کاریکاتێر

وێنەهەواڵ

© 2016 Dwryan.net. All Rights Reserved.